-ЭРЧИМ ХҮЧНИЙ ЯАМНЫХАН ЭРДЭНЭБҮРЭНГИЙН УСАН ЦАХИЛГААН СТАНЦЫГ БАРИХ ТЕНДЕРТ САНХҮҮГИЙН ЧАДАМЖГҮЙ КОМПАНИ ХУУЛЬ БУСААР ШАЛГАРУУЛСАН УУ-

        Олон жил яригдсан Эрдэнэбүрэнгийн усан цахилгаан станц барих тендерийг БНХАУ-ын хөнгөлөлттэй зээлээр санхүүжүүлэхээр энэ оны зургадугаар сарын 30-нд зарласан. 30 хоногийн хугацаатай зарласан тендер шалгаруултад гурван компани оролцсоноос “Power Construction Corporation of China Ltd” болон “Powerchina Chengdu Engineering Corporation Limited” компанийн түншлэл шалгарсан билээ.

       Тендерийн тухай хуулийн ТОӨЗ-ын 39.1-т зааснаар шалгарсан компани гэрээ байгуулах мэдэгдэлээ 2021 оны наймдугаар сарын 10-нд авснаар хуулийн дагуу 21 хоногийн дотор ТӨШХ-д заасан дүнгээр багтаан гүйцэтгэлийн баталгааг байршуулах үүрэгтэй. Гэвч тендерт шалгарсан “Power Construction Corporation of China Ltd” болон “Powerchina Chengdu Engineering Corporation Limited” компанийн түншлэл өнөөдрийг хүртэл гүйцэтгэлийн баталгаагаа байршуулаагүй байна. Бүр тодруулбал, хуульд ТОӨЗ-ны 39.1 -т “Тендерт оролцогч нь гүйцэтгэлийн батлагааг гэрээ байгуулах эрх олгох тухай мэдэгдлийг хүлээн авснаас хойш 21 хоногийн ТШӨХ-д заасан дүнгээр, тендерийн баримт бичгийн 6 дугаар бүлэгт заасан маягтын дагуу үйлдэж захиалагчийн хүлээн зөвшөөрөх хэлбэрээр ирүүлнэ” хэмээн заажээ. Гэвч шалгарсан компани нь өнөөг хүртэл уг мэдээллийг байршуулаагүй нь УСЦ-ын төслийг хэрэгжүүлэх санхүүжилтээ бүрдүүлж чадаагүй компанийг тендерт шалгаруулсан болж таарч байгаа юм.

Гэвч тендерт шалгарсан “Power Construction Corporation of China Ltd” болон “Powerchina Chengdu Engineering Corporation Limited” компанийн түншлэл өнөөдрийг хүртэл гүйцэтгэлийн баталгаагаа байршуулаагүй байна

       Өөрөөр хэлбэл, тендерт шалгарсан компани санхүүгийн боломжгүй байдлаас болж олон жил яригдсан Эрдэнэбүрэнгийн УЦС-ын барилгын ажил мөн л хойшлогдож мэдэхээр нөхцөл байдал үүсчээ. Угтаа бол хууль зөрчигдсөн энэ тохиолдолд дараагийн компанийг шалгаруулах эсвэл шинээр тендер зарлах ёстой ч, Эрчим хүчний яам мөн л хуулийн зөрчил үүсгээд байна. Хуульд “Шалгарсан тендерт оролцогч ТОӨЗ-ны 39.3-т заасан шаардлагыг биелүүлээгүй нь гэрээ байгуулах эрхийг хүчингүй болгож, тендерийн батлагааг гүйцэтгүүлэх хангалттай үндэслэл болох ба энэ тохиолдолд захиалагч дараагийн хамгийн сайн үнэлэгдсэн тендерт оролцогчид гэрээ байгуулах эрх олгох эсвэл шинээр тендер зарлана” хэмээн заажээ.

       Гэтэл Эрчим хүчний яамныхан гүйцэтгэлийн баталгаагаа шийдэж чадаагүй компанийг ямар үндэслэл, журмаар сонгон шалгаруулсан нь тодорхойгүй байгаа бөгөөд Эрчим хүчний сайд Н.Тавинбэх, түүний хүмүүсийн эрх ашиг энд мөн явж байна уу гэх хардлагыг олон нийтэд төрүүлж байгаа юм. Учир нь, уг төслийг БНХАУ-ын Засгийн газраас Монгол Улсын Засгийн газарт нэг тэрбум ам.долларын хөнгөлөлттэй зээлээр хэрэгжүүлэхээр болсон билээ. Иймд санхүүгийн чадамжгүй ч өөрсдийн компаниа тендерт шалгаруулах нь нэр бүхий хүмүүсийн зорилго байсан гэдгийг зарим эх сурвалж хэлж байна. Энэ талаар бид үргэлжлүүлэн сурвалжилж мэдээлэх болно.

Эрчим хүчний яамныхан гүйцэтгэлийн баталгаагаа шийдэж чадаагүй компанийг ямар үндэслэл, журмаар сонгон шалгаруулсан нь тодорхойгүй байгаа бөгөөд Эрчим хүчний сайд Н.Тавинбэх, түүний хүмүүсийн эрх ашиг энд мөн явж байна уу гэх хардлагыг олон нийтэд төрүүлж байгаа юм