Дорнод аймгийн Хэрлэн суманд долдугаар сарын 21-ний 03:00 цагийн үед 18 настай эрэгтэй Б.Д “Harrier” маркийн автомашинаар 18 настай эрэгтэй Э.С-ыг мөргөж, биед нь хүнд гэмтэл учруулж, хэргийн газраас зугтсан.

        Тус хэргийг үйлдэж, хэргийн газраас зугтсан 18 настай Б.Д гэгч нь Дорнод аймгийн ИТХ-ын МАН-ын төлөөлөгч М.Басхүүгийн хүү Дөлгөөн гэх. Тэрбээр “Сити” их сургуулийн хоёрдугаар дамжааны оюутан аж. Тэгвэл хэрэг үйлдсэн тус залууг цагдан хорисон эсэх талаар олон нийтийн дунд маргаан үүсээд буй. Тухайлбал, "Эрх мэдэл, албан тушаал, эд хөрөнгөтэй хүний хүүхэд хэрэг хийсэн ч хоригддоггүй юм байна" хэмээх яриа олон нийтийн сүлжээнд тарсан. Иймээс бид тус хэргийг үйлдсэн Б.Д-г цагдан хорьсон эсэх талаар түүний аав М.Бас-Эрдэнэ болон ЦЕГ-ын Хэвлэл мэдээллийн төвөөс тодрууллаа. 

     СЭЖИГТЭН Б.ДӨЛГӨӨНИЙ ААВ М.БАС-ЭРДЭНЭ:  Энэ хэрэгт холбогдуулан 13 хүүхдээс байцаалт авч байгаа. Цагдаа нар манай хүүг “Сэтгэл зүйн хямралтай байна. Хараа хяналтаа сайжруулахгүй бол амиа хорлох магадлалтай” гэсэн. Тиймээс хүүгээ цагдаагийн газар хүргэж өгч, орой очиж авдаг. Цагдаагийн газар миний хүүг баривчилж, саатуулаагүй. Иргэд тус хэргийг миний албан тушаалтай хэтэрхий холбож ойлгоод байна. Би улс төр, нам, эрх бүхий албан тушаалтнаас тусламж хүсэж үзээгүй. Би 12 жил ИХТ-өөр ажилласан. Надаас болж эдгээр хүүхэд улс төрийн золиос болж болохгүй. Харин бүгд хуулийн дагуу зохих ёстой шийтгэлээ хүртэх ёстой. Тэгээсэй ч гэж хүсэж байна" гэв. 

     ЦЕГ-ын Хэвлэл мэдээлэл, олон нийттэй харилцах хэлтсийн дарга, хурандаа Б.Баатархүү:  Хэрэг үйлдэж, хэргийн газраас санаатай зугтсан сэжигтэн Б.Д-ийг цагдаагийн байгууллагаас саатуулсан. Өнөөдөр прокурорын газраас хэргийг ямар үндэслэлээр хэрхэн үргэлжлүүлэн шалгах талаар чиглэл өгнө" гэв.