Ерөнхийлөгчийн сонгуулийн сурталчилгаа үргэлжилж буй энэ өдрүүдэд Г.Ган-Очир гэх залуу МАН-ынхан санал тоолох төхөөрөмж буюу хар машиныг хакердсан, сонгуулийн үр дүнд нөлөөлсөн хэмээн мэдэгдэж, үүнтэй холбоотой мэдээлэл хэвлэл мэдээллийн хэрэгслээр хөвөрч  байна.

Г.Ган-Очир:Сонгуулийн хар машины программын хугацаа 2018 онд дууссаны дараа МАН-ын удирдах албан тушаалтан ямар ч нууцлалгүй болгосон

      Тэрбээр “Сонгуулийн санал тоолох төхөөрөмжийг хакердах ажлыг өнгөрсөн оны орон нутгийн сонгуулиар зохион байгуулсан бөгөөд тухайн хэргийг прокуророос хаасан. Миний бие сонгуулийг хууль бусаар авах гэсэн гэмт хэргийн хохирогч болсон. Цагдаа, тагнуулын байгууллагаар зургаан сар шалгуулсан. Сонгуулийн хар машины программын хугацаа 2018 онд дууссаны дараагаар МАН-ын удирдах албан тушаалтан ямар ч нууцлалгүй болгосон. Уг хэрэгт МАН-ын удирдах албан тушаалтан, СЕХ-ны хар машиныг хариуцаж ажилладаг IT инженер, мөн АН-ын хэрэг эрхлэх газрын дарга П.Нүрзэд, Нийслэлийн Ардчилсан намын дарга Д.Пүрэвдаваа нар хамаатай. МАН-ын Ерөнхий нарийн бичгийн дарга Д.Амарбаясгалан, нийслэлийн Засаг дарга Д.Сумъяабазар нар өнгөрсөн оны наймдугаар сард маргалдсан. Ингээд Ерөнхий нарийн бичгийн дарга Д.Амарбаясгаланд мөнгө өгвөл ямар ч хүн сонгогдоно. Д.Сумъяабазар надад “Сонгуулийн хар машиныг хакердуулахаар 500 сая төгрөг өгье, хамтарч ажиллая гэсэн” би зөвшөөрөөгүй. Дараагаар нь Улаанбаатар хот дахь "Эрдэнэт"-ийн төлөөлөгчийн газраас нэг тэрбум төгрөг гаргуулахаар МАН-ын удирдлагууд ярилцаж тохирсон. Сонгуулийн хар машиныг программчлаад, хакердаад 175 тэрбум төгрөг шилжүүлснийг утсан дээрээ харуулсан. Дараагаар нь хохирогчгүй хэрэг гэж хэргийг хаасан” хэмээн ярьсан билээ.

        Хэрэв түүний ярьсан, олон нийтэд мэдээлсэн мэдээлэл үнэн, сонгуулийн хар машиныг хакердсан, сонгуулийн үр дүнд нөлөөлсөн бол Үндэсний аюулгүй байдлын эсрэг үйлдэж байгаа онц ноцтой гэмт хэрэг. Монгол төрийн тогтвортой байдалд сөргөөр нөлөөлж, байж боломгүй аргаар төрийн эрх мэдэл эдлэхийг санаархсан үйлдэл гэсэн үг. Өөрөөр хэлбэл, МАН-ын удирдах албан тушаалтнууд 60 тэрбум төгрөг босгож, төрийн эрх мэдлийг хууль бусаар авах, хуйвалдаан зохион байгуулсан хэрэгтэй адил гэсэн үг юм.

АН: Г.Ган-Очирыг С.Эрдэнийн гэрээс баривчилж, АН-аас 75 сая төгрөг өгсөн гэдэг нь худал мэдээлэл

         Хэрэв Г.Ган-Очирын мэдэгдэл худал бол Ерөнхийлөгчийн сонгуулийн энэ өдрүүдийг  “сонирхолтой” болгох гэсэн хэн нэгний, аль нэг намын явуулга болж таарна. Хэн нэгэн Г.Ган-Очир гэх залууг захиалж, зохиомлоор энэ хэргийг үүсгэж, тавилттайгаар олон нийтийг төөрөгдүүлж, Ерөнхийлөгчийн сонгуулийг дуулиан шуугиантай болгох гэсэн үйлдэл. Тэр бүүхэл нэртэй нь, зурагтай нь өөрөөр нь мэдэгдэл хийлгэж, үнэн мэт харагдуулахын тулд бусдын амийг хөсөрдүүлсэн “шоглоом” байлаа. Мэдэгдэл хийлгээд зогсохгүй, ярилцлага зохиож, хэвлэлд төлбөртэй, санаатайгаар нэвтрүүлж, олны анхаарлын төвд оруулахын тулд Г.Ган-Очирыг зориудаар нууж, эрэн сурвалжлуулсан юм. Худал мэдээлэл зохиож, өөрсдөө найруулагчаар нь ажилласан “найруулагч”-д Цагдаагийн ерөнхий газрыг хүртэл хөдөлгөж, үндэстнээр “дайжигнасан” үйлдэл хийлээ. Энэ үйлдлийг өдөөн турхирч, санаачилсан этгээдүүийг хууль хяналтын байгууллага шалгаж, тодорхой болгох хэрэгтэй. Юуны тулд хүний амь нас, эрх чөлөө, алдар нэрд халдаж, бусдыг золиосолсон бэ гэдгийг шалгаж, тогтоох нь зүйтэй. Хууль хяналтын байгууллагаас Г.Ган-Очирыг эрэн сурвалжилж, хоёр хоногийн дараа Ерөнхийлөгчийн сонгуульд Ардчилсан намаас нэр дэвшигч С.Эрдэнийн гэрээс баривчилсан гэх мэдээлэл бий. Мөн Г.Ган-Очир нь өгсөн мэдүүлэгтээ М.Тулгат даргатай Ардчилсан намаас 75 сая төгрөг авсан гэж мэдүүлсэн талаар зарим хэвлэл мэдээллээд байна. Энэ талаар М.Тулгат даргатай Ардчилсан намын хэвлэлийн төлөөлөгчөөс тодруулахад “Энэ бүх мэдээлэл худал. Манай намаас нэг ч төгрөг өгөөгүй” гэв.

 Г.Ган-Очир гэж хэн бэ

         Г.Ган-Очир нь өөрийгөө Боловсролын яамны хэвлэлийн төлөөлөгч, "Ийгл" телевизэд компьютер графикч, Боловсролын яамны хэвлэлийн төлөөлөгчөөр ажиллаж байсан хэмээн танилцуулсан. Тэрбээр ОХУ-д компьютер графикч мэргэжлээр төгссөн гэнэ. Мөн тэрбээр “Ийгл” телевизд ажиллаж байсан нь үнэн аж.

        Г.Ган-Очир нь Боловсролын сайд асан Л.Цогзолмаагийн хэвлэлийн төлөөлөгчөөр ажиллаж байсан гэх мэдээлэл бий. Тэрбээр Ардчилсан намын шуурхай штабд өгсөн ярицлагадаа “МАН-д гэхээсээ МАН-ын гишүүдтэй нь хамтарч ажиллаж байлаа. Л.Цогзолмаа сайд болон Баянгол дүүргийн МАН-ын хорооны дарга Ж.Ганбаатар гишүүн, дарга Б.Сэмжидмаа гэх мэт хүмүүстэй нэлээн ойр ажилласан. Намайг анх энэ ажилд зуучилж, санал тавьсан хүн бол өдгөө Баянгол дүүргийн  ИТХ-ын даргаар ажиллаж байгаа Б.Сэмжидмаа. Явцын дунд өөрсдийгөө СЕХ-ны IT инженер гэдэг Мөөгий, Мөнхбат гэх хоёр залуу, мөн МАН-ын генсек Д.Амарбаясгалангийн туслах Доогий, одоо нийслэлийн ЖДҮ-ийн дарга хийж буй Г.Гангамөрөн, Нийслэлийн МАН-ын хорооны дэд дарга асан одоогийн Сонгинохайрхан дүүргийн Засаг дарга Н.Алтаншагай болон нийслэлийн Засаг дарга Д.Сумъяабазар, МАН-ын ерөнхий нарийн бичгийн дарга Д.Амарбаясгалан нартай танилцаж, нэг баг болж ажиллаж байгаагаа мэдсэн” хэмээсэн юм.

Л.Цогзолмаа: Г.Ган-Очир миний хэвлэлийн төлөөлөгч байгаагүй

          Бид Боловсролын сайд асан Л.Цогзолмаатай холбогдож, Г.Ган-Очир гэх залууг таних эсэх талаар тодруулахад “Би сонгуулийн сурталчилгааны ажлаар Ховд аймагт ажиллаж байна. Намайг Боловсролын сайд байхад Г.Ган-Очир миний хэвлэлийн төлөөлөгч байгаагүй. Тийм нэртэй хүн байгаагүй” гэв.

          Мөн дээр нэр дурдагдсан хүмүүстэй холбогдож, лавлах гэсэн боловч утсаа аваагүй юм. Харин Сонгинохайрхан дүүргийн Засаг дарга Н.Алтаншагайтай холбогдоход “Орон нутгийн сонгуулийн өмнө есдүгээр сард Г.Ган-Очир гэх залуу миний өрөөнд орж ирээд гарсан. Тэрнээс хойш уулзаагүй. Тэр залуугийн ярьсан зүйл 100 хувийн гүтгэлэг. Би үүнтэй холбоотойгоор холбогдох хууль хяналтын байгууллагад гомдол гаргасан байгаа” гэлээ.

ТЕГ хар машинтай холбоотой хэргийг шалгажээ

         Үнэхээр Г.Ган-Очир төрийн эрх мэдлийг хууль бусаар авах схем арга барилыг мэдэж, сонгуулийн хар машиныг хакердахыг мэддэг бол манай улсын тагнуулын байгууллага юу хийж байна вэ. Захын нэг компьютер графикч сонгуульд нөлөөлж, ард түмний саналыг хэний л бол хэний талд эргүүлж байгааг мэдэхгүй, ганц ч мэдээлэлгүйгээр хакердуулаад сууж байна гэж байх уу.

Үндэсний аюулгүй байдлын эсрэг үйлдсэн байж болзошгүй энэ хэргийг Тагнуулын ерөнхий газраас шалгах ёстой. Үүнтэй холбоотойгоор албаны эх сурвалжаас тодруулахад “Тагнуулын ерөнхий газраас орон нутгийн сонгуулиар бичлэг задарснаас хойш санал тоолох төхөөрөмжид гаднын нөлөө орсон эсэхийг шалгасан” гэв. Харин хохирогч байхгүй учраас эл хэргийг хаагаад байжээ. Г.Ган-Очирыг мэдээлэл хийсний дараа дахин энэ хэргийг шалгаж эхэлсэн эсэх нь одоогийн байдлаар тодорхойгүй байгаа гэнэ.

Г.Ган-Очир шүгэл үлээгч үү, хохирогч уу гэдэг нь хэсэг хугацааны дараа тодорхой болно.