Баянзүрх дүүргийн 15 дугаар хороо, IV байрны тавдугаар орцонд аюултай хог хаягдал хаясан талаарх иргэний гомдол мэдээллийн дагуу дараах сурвалжилгыг бэлтгэлээ.

         Баянзүрх дүүргийн 15 дугаар хороонд байх IV байр буюу Бөхийн өргөөний зүүн талд байрлах байрны тавдугаар орцны 10 дугаар давхрын шатан дээр аюултай хог хаягдал бүхий мансуурахад ашигласан байж болдзошгүй цустай зүү тариур, эмийн капсул, архи, пивоны шил, лааз хаяжээ. Тус давхарт хүн амьдардаггүй бөгөөд хоёр, гурван хоногийн өмнөөс тус байрны 5-7 дугаар орцноос дээрх аюултай хог хаягдал удаа дараа олджээ.

“Цагдаагийн байгууллагад дуудлага өгсөн ч ирж, шалгаагүй”

Энэ талаар тус байрны жижүүр “Өчигдөр би шал угааж байхдаа орцонд зүү тариур хаясан байхыг харсан. “Яаж гараараа авч хаях билээ дээ” гэж бодоод хогийн шүүр авахаар яваад, өнөөх хогийг авч хаяхаа мартсан байна лээ. “Цагдаад дуудлага өгье” гэж яаж санах билээ дээ. Харин нэг жижүүр маань өчигдөр “Орцонд удаа дараа аюултай хог хаяад байна. Цагдаад дуудлага өгтөл тоохгүй, ирж шалгахгүй юм” гэж хэлсэн.  

“2-3 хоногийн өмнө VI, VII орцонд цустай зүү тариур, архи пивоны шил лааз хаясан байна лээ”

Манай байранд архи дарс ууж, чимээ шуугиан гаргадаг хүн байхгүй. Сэжигтэй хүн ирсэн тохиолдол ч байхгүй. Хоёр, гурван хоногийн өмнө зургаа, долдугаар орцонд мөн цустай зүү тариур, архи пивоны шил лааз хаясан байсан. Манай орцонд хяналтын камер байхгүй” гэлээ.

 “Өнгөрсөн долоо хоногоос хойш байрны орц болгонд аюултай хог хаяж байна”

Харин тус байрны V орцны долдугаар давхрын оршин суугч “Манай давхарт дөрвөн айл амьдардаг. Уг нь чимээ шуугиан гаргаад байдаг хүн байхгүй. Хүүхдүүд ч явдаггүй. Харин сүүлийн хэдэн өдөр гадаа дулаан байсан учир орцны хаалганы кодыг унтраачихсан юм. Тэгтэл өнгөрсөн долоо хоногоос эхлээд ийм жигтэй явдал ажиглагдаад байна. Зүү тариур хаяж, архи дарс уугаад байгаа. Ганц хоёр л хүн яваад байгаа болов уу даа. Ийм аюултай хог хаягдал орцонд байгаа талаар СӨХ-нд өнөөдөр 10:00 цагийн үед хэлсэн. Гэтэл одоог  хүртэл (13:00 цаг) ирээгүй байна ” гэлээ.

Цагдаагийн байгууллагаас энэ талаарх иргэний дуудлага мэдээллийн дагуу яагаад шалгалтын ажил явуулахгүй байгаа талаар тодруулахад “Газар дээр нь очиж шалгалтын ажиллагаа явуулна” гэх тайлбар өглөө.