Б.Эрдэнэчимэг гэх эмэгтэй хүн амины хэрэгт буруутгагдаж, 20 жилийн хорих ял авсан хүүгээ гүтгэгдсэн хэмээн тэмцэл өрнүүлээд зургаан жил өнгөрчээ. Тэрбээр өнөөдөр төв талбайд хүүгийнхээ төлөө суулт зарлаж байгаагаа мэдэгдсэн. Хүүгийнх нь хэргийн талаар түүнтэй ярилцлаа.

-Таны хүү яагаад хүн амины хэрэгт холбогдож, та хүүгээ гүтгэгдсэн гэж үзэж байгаа талаар тодорхой яриад өгөөч?

         -Миний хүү 18 настай байхдаа хүн амины хэрэгт буруутгагдаж, 20 жилийн хорих ял авсан. Хүүгийн минь холбогдсон хэрэг 2015 оны хоёрдугаар сарын 17-18-нд шилжих шөнө Баянзүрх дүүргийн нутагт дэвсгэрт байрлах .. дугаар байрны .. тоотод болсон юм билээ. Миний хүү тухайн үед их сургуулийн нэгдүгээр дамжааны оюутан байсан. Дорнод аймгаас Улаанбаатар хотод ирж сурч байсан юм. Их сургуулийнх нь амралт болж, ерөнхий боловсролын сургуулийн ангийнхан нь хэд хоног уулзсан юм билээ. Талийгаач миний хүүтэй нэг ангид сурч байсан хүү юм л даа. Хэрэг гардаг өдөр дөрвүүлээ талийгаачийн гэрт байсан гэсэн. Шөнийн 02:00-03:00 цагийн үед хэрэг гарч, талийгаачийн гүрээний судсанд хутгалж, амийг нь хөнөөсөн гэсэн дүгнэлт гарсан. Энэ хэрэгт хүүг минь буруутгаж, хүчээр ял эдлүүлээд байна. Хүү минь гурван жилийн хугацаанд хэргээ ганц ч удаа хүлээгээгүй. “Би энэ хэргийг хийгээгүй” гэж байнга хэлдэг. Тэгээд арга буюу шүүхээс хүчээр ял өгөөд байна. Үүний эсрэг зургаан жил тэмцэж, хүүгээ хэрэг хийгээгүй гэсэн нотлох баримтуудыг цуглуулаад явж байна.

-Таны хүү энэ хэргийг үйлдсэн гэх нотлох баримт байхгүй гэсэн үг үү?

         -Тухайн өдөр миний хүү, талийгаачаас гадна ангийнх нь нэг хүү ахтайгаа хамт байсан. Талийгаачийн биед 62 удаа хутгаар сийчиж, гүрээний хоёр судас тасарч, уушгиндаа хутгалуулж, нас барсан гэсэн дүгнэлт гарсан юм билээ. Хэрэг 02:00 цагийн үед гарсан байхад хамт байсан хоёр хүн нь түргэн тусламж 05:15 цагт буюу хоёр цагийн дараа дуудсан. Талийгаач түргэний эмчийг ирэхэд ухаан алдсан байсан бөгөөд машин дотор амьсгал хураасан гэсэн. Гүрээний судас нь тасарсан байхад хоёр цаг амьсгаатай байсан гэсэн үг шүү дээ. Миний хүү хэргийн газраас 03:50 цагт гарч, тус байрны .. дугаар тоотод очсон байгаа юм. Ингэхдээ миний хүүг хүчээр чирж, ах, дүү хоёр танихгүй айлд оруулсан гэсэн.

 Түргэн, цагдаа ирэхээс өмнө хэргийн газарт хамт байсан ах, дүү хоёрын дүү нь бүтэн нэг цагийн турш хүмүүс рүү утсаар ярьсан байна лээ. Дорнод аймагт байдаг ангийнхаа хүүхдүүдтэй хүртэл ярьсан гэдгийг нь би мэдсэн. Өөрсдийнхөө хийсэн хэргийг хайцаалахын тулд утсаар ярьж хүмүүсээс зөвөлгөө авсан байж магадгүй гэж би хардаж байгаа. Тэд хэрэг болсноос хойш хэргийн газраас гарч, өмсөж явсан хувцсаа сольсон. Хутган дээр байсан хурууны хээг арчсан гээд ноцтой баримтууд бий. Хэргийн газрын анхны үзлэг 05:20 цагт хийгдсэн байдаг юм. Гэтэл тэр нотлох баримтууд хавтаст хэрэгт багтаагүй байгаа нь миний хүүд зохиомолоор хэрэг үүрүүлэх нэг шалтгаан. Цагдаа нар хэргийн газарт хамт байсан ах, дүү хоёрыг сэжигтнээр шалгалгүй, шууд гэрчээр мэдүүлэг авсан. Тэд миний хүүг талийгаачийг хутгалж байхыг хараагүй, хутга бариад зогсож байхыг нь харсан гэж мэдүүлсэн байдаг. Хутган дээрээс миний хүүгийн хурууны хээ илрээгүй. Арчихсан учраас хэний ч хурууны хээ илрээгүй.

-Хамт байсан ах, дүү хоёр согтуу байсан юм уу?

-Ах, дүү хоёр өвөр монгол хүнээс таван литрийн саванд архи хийж, авчирж тэд уусан байгаа юм. Гэтэл архи авчирсан дүү С гэгч нь тэр архинаасаа уугаагүй, ах нь бага зэрэг уусан гэсэн шинжээчийн дүгнэлт гарсан. Хүний амь хохирч, талийгаач хоёр цаг тарчилж байхад тэд яагаад түргэн дуудаагүй юм гэсэн асуултыг бид үргэлж асуусаар байгаа. Анхны мэдүүлгээр эрүүл байсан хүмүүс жилийн дараа ой санамж алдалттай, согтуу байсан гэсэн дүгнэлт хуурамчаар гаргуулсан. Би энэ хэрэгт ах, дүү хоёрыг шалгах ёстой гэж тэмцэж, гуравдугаар сарын 15-нд албан бичиг хүргүүлсэн. Гэтэл “Шалгах боломжгүй” гэсэн хариу ирлээ. Ийм учраас би дахин тэмцлээ өрнүүлж байна. Баримтуудыг шат дараатайгаар дэлгэх болно.

-Хэрэг болох үед хүү тань их согтолттой байсан юм уу?

            -Миний хүү тухайн үед унтаж байсан гэж мэдүүлсэн байдаг. 04:00 цагийн үед хоёр хүн чирээд, танихгүй айлд хүргэсэн гэж хэлсэн. Тэрнээс хойш хэргийн газар руу дахин очоогүй. Миний хүүгийн тухайн үед өмсөж явсан хувцас нь хүртэл алга болчихсон. Хохирогч талын өмгөөлөгч “Хувцас чинь хаана байна” гэж асуугаад байсан. Гэтэл миний хүүгийн хувцсыг ах, дүү хоёр урж, тасдаад хаясан.

-Хүү тань хамгийн сүүлд хэзээ тань руу ярьсан байдаг юм бэ?

           -Хэрэг гарахаас хоёр хоногийн өмнө надтай ярьсан. Тухайн үед Цагаан сар дөхөж байсан болохоор “Би битүүний өдөр машинд сууна” гэж байсан юм. Тэгээд утасных нь орох ярианы эрх хаагдаад ярьж чадаагүй. Гэтэл миний хүүгийн утсыг хэргийн газарт хамт байсан С хэрэглэж байсныг сүүлд мэдсэн. 

-Та талийгаачийн ар гэрийнхэнтэй уулзаж үзсэн үү?

-Нэг удаа зориглоод очиж уулзсан. Сайхан хүүгээ алдчихсан хүмүүс ямар олиг байх вэ дээ. Гэнэтийн зүйл гэдэг чинь үнэхээр хэцүү байдаг юм билээ. Биднийг тухайн үед хүлээж аваагүй. Дараа нь шүүх хурал дээр хохирогчийн талд дарамт үзүүлсэн гэж мэдүүлсэн. Тийм учраас би дахиж уулзаагүй. Дараа нь биднийг юу гэж ч гүтгэх юм гээд.

-Танд нэмж хэлэх юм байгаа болов уу?

-Хэргийн газарт хамт байсан ах, дүү хоёрыг шалгаад өгөөч гэж хүсэж байгаа. Мөн хэргийн газрын анхны үзлэгийн нотлох баримтуудыг хавтаст хэрэгт хамруулах хэрэгтэй. Миний хүү хилсээр хэрэгт гүтгэгдэж, ял эдэлж байна.