“Бургер кинг” сүлжээ рестораны бургерээс шрүп гарчээ. Тодруулбал, тавдугаар сарын 12-нд Чингэлтэй дүүрэгт байрлах “Бургер кинг” сүлжээ ресторанаар нэгэн эмэгтэй бага насны хүүхэдтэйгээ үйлчлүүлсэн байна. Түүний авсан бүтээгдэхүүн шрүптэй байсан бөгөөд хүүхэд нь уг төмрийн талыг залгиж, хахсан ч азаар эсэн мэнд үлджээ. .

Хохирогч Б.Д энэ талаар цахим хуудастаа

            “Бургер кинг” сүлжээ ресторанаас зургаан настай хүүдээ бургер авч өгчихөөд сууж байсан юм. Гэтэл хүү минь хахаж, цацаад, бөөлжиж эхэлсэн. Хүүгийнхээ нуруун дээр цохиж, цээжийг нь шахаж байж арай гэж гайгүй болгосон. Хүүгээсээ яагаад хахсан талаар нь асуухад миний хүү “Хатуу зүйл зажилагдсан, сандраад залгисан чинь хоолойд тээглэсэн” гэж хэлсэн. Хүүгээ тайвшруулж, шингэн зүйл уулгасныхаа дараа идэж байсан бургерыг нь харахад гуриланд нь шрүп наалдчихсан байсан. Хүү минь нэг хэсгийг нь залгисан бололтой. Би болсон явдлын талаар тус хоолны газрын зөөгчид хэлэхэд “Өө шрүп байна уу. Та мөнгөө буцааж авах уу, эсвэл дахиад өөр бургер авах уу” гэж асуусан. Тэгээд төв оффисийн менежерт нь хэлэхэд “Та хүүхдээ эмнэлэгт үзүүлээд, гэдсэнд нь шрүп байвал хэлээрэй. Бид эмчид үзүүлсэн зардлыг өгье” гэж хэлсэн. Хэчнээн хүүхэд мэдэлгүй шрүп идсэн бол. Тус компанийнхны хувьд шрүптэй бургер байдаг л асуудал бололтой. Энэ талаар  МХЕГ-т мэдэгдсэн. Эрүүл, аюулгүй хүнсийг шаардах эрхтэй, бид. Хариуцлагатай байхыг шаардаж байна” хэмээн бичжээ.

            Болсон явдлын талаар “Бургер кинг” сүлжээ рестроны зохион байгуулагчаас тодруулах гэсэн боловч “Манайх энэ хэрэгт холбогдуулан мэдэгдэл гаргасан байгаа. Өөр мэдээлэл өгөх боломжгүй” гэв.

Тус хоолны газар нь цахим хуудастаа

       “Бургер Кинг” сүлжээ ресторан Монгол Улсын хоол үйлдвэрлэл, үйлчилгээний газрын мөрдвөл зохих хууль, дүрмийг биелүүлэхээс гадна олон улсын хөндлөнгийн шалгалтаар баталгаажсан үйл ажиллагааны стандартыг баримтлан ажилладаг. Тавдугаар сарын 12-нд “Бургер Кинг” сүлжээ рестораны Чингэлтэй дүүрэгт байрлах салбараар үйлчлүүлсэн үйлчлүүлэгчийн бүтээгдэхүүнээс гаднын биет шигдсэн байсныг зургаар баримтжуулж, тухайн салбарын ахлах менежерт ирүүлсэн. Бид энэхүү гомдлын дагуу шалгалт хийн, талхны нийлүүлэгч болох Жүр-Үр ХХК-д мэдэгдсэн. Тус компанийн үүссэн нөхцөл байдалд бүрэн хариуцлага хүлээж, гомдол гаргасан үйлчлүүлэгчтэй холбогдон, хариуцлагаа хүлээсэн болно.

“Бургер Кинг” сүлжээ рестораны хамт олон алдаа гаргасандаа үйлчлүүлэгч та бүхнээс хүлцэл өчье. Бид цаашид үйл ажиллагаандаа илүү хариуцлагатай, анхаарч ажиллах болно” хэмээсэн байна.

      Тус сүлжээ рестораны мэдэгдэж буйгаар “Жүр-Үр” ХХК-ийн нийлүүлсэн бургерээс шрүп гарсан аж. “Жүр-Үр” ХХК нь өөрсдийн буруугаа хүлээж, хариуцлагаа хүлээсэн гэж бичжээ.

Б.МӨНХЗУЛ: Талхан дотор шрүп байсан бол манай алдаа байх байсан

       Бид энэ талаар “Жүр-Үр” ХХК-ийн захирал Б.Мөнхзулаас тодруулсан юм. Тэрбээр “Энэ асуудлыг хариуцсан алба нь судалж, албан ёсны хариу тайлбар өгөх байх. Би компанийн нэг л хэсэг шүү дээ. Манай компани бүх бүтээгдэхүүнээ металл илрүүлэгч төхөөрөмжөөр шалгадаг. Бургерын талхыг ширхэг бүрчлэн шалгаж, өндөр стандартын дагуу үйлдвэрлэж, хүмүүс шалгадаг. Тухайлбал, нэг талханд ноогдох үрийн тоо нь хүртэл нарийн заагдсан байдаг. Энэ стандартад нийцэж байгаа эсэхийг хүмүүс шалгадаг юм. Ийм байхад манайхаас алдаа гарах нөхцөл, боломж харагдахгүй байгаа. Өмнө нь ийм тохиолдол гарч байгаагүй. Мөн тухайн шрүп нь бургерын гадна байсан гэдэг нь асуудалтай. Хэрэв талхан дотор байсан бол манай алдаа байх байсан. Гэтэл гадна нь байсан гэхээр үйлдвэрлэл, савлагааны явцад алдаа гарсан байхыг ч үгүйсгэхгүй” гэсэн юм.

Тус хэргийг Нийслэлийн мэргэжлийн хяналтын газраас шалгаж байна.