Өчигдөр нэгэн охин цахим хуудастаа “Миний ээж тавдугаар сарын 9-нд БНХАУ-ын вакцины нэгдүгээр тунг тариулсан. Гэтэл тавдугаар сарын 10-ны 21:40 цагийн үед бурхан болчихлоо. Ээж минь 44 настай бөгөөд амаржаад удаагүй байсан. Миний нялх дүү төрөөд дөнгөж 40 хонож байна. Ээжид минь вакцин хийсэн эмч “Төрөөд нэг сар болсон бол вакцин хийж болно” гэж хэлсэн юм билээ. Гэтэл миний ээж ганцхан хоногийн дараа өлгийтэй үрээ орхиод үүрд биднээс явчихлаа. Бид маш их гомдолтой байна. Олон хүүхэд өнчрөөд үлдэж байхад сайд дарга нар энэ хэргийг нууж байна” хэмээн бичсэн юм. Энэ хэргийн талаар талийгаач Ш-ийн охин Ш.Нандиндуламтай ярилцлаа.

-Танай гэр бүлд маш харамсалтай зүйл тохиолджээ. Юу болсон талаар дэлгэрэнгүй мэдээлэл өгч болох уу?

-Би эмээ, аав, ээж, ах, хоёр дүүгийн хамт Чингэлтэй дүүргийн 17 дугаар хороонд амьдардаг. Ээж минь тавдугаар сарын 9-ний өдөр вакцины цэг рүү “Төрсөн хүнд вакцин хийж болох эсэхийг асуугаад ирье. Халдвар авахаасаа өмнө эртхэн тариулчихсан нь зүгээр байх” гээд явсан юм. Очоод вакцин хийж байсан эмчээс нь “Төрөөд нэг сар болж байгаа хүн вакцин хийлгэж болох уу” гэж асуусан юм билээ. Эмч нь “Сар болчихсон бол болно. Вакцинаа хийлгэ” гэж хэлсэн гэсэн. Тэгээд вакцины нэгдүгээр тунгаа тариулаад гэртээ ирсэн. Вакцин тариулсан өдрөө хариу урвал илрээгүй, зүгээр байсан. Гэтэл маргааш орой нь гэнэт бурхан болчихлоо. Бидэнд маш хэцүү байна. Тавхан минутын өмнө дүүг минь хөхүүлээд, “Миний охин дүүгээ тэвэрч бай. Ээж нь гарч, нойл орчихоод ирье” гээд яваад эргэж ирсэнгүй.

“Төрөөд нэг сар болж байгаа хүн вакцин хийлгэж болох уу” гэж асуусан юм билээ. Эмч нь “Сар болчихсон бол болно. Вакцинаа хийлгэ” гэж хэлсэн гэсэн. 

-Тухайн үед бие нь өвдөж байгаа шинж тэмдэг ажиглагдаагүй юү. Бие нь зүгээр байсан юм уу?

-Инээгээд, бидэнтэй юм яриад зүгээр байсан. Гэхдээ өөрөө өвдөж байна гэдгээ бидэнд хэлэхгүй нуугаад байсан байж магадгүй. Өндөр настай эмээгийн даралт нь ихсэж, санаа нь зовох байх гэж бодсондоо бие нь өвдөж байгаагаа хэлээгүй юм болов уу. Бид үнэхээр юу ч мэдэхгүй байна.

-Ээжийнх нь бие өвдөж, эмчийн хяналтад байдаг байсан уу. Хууч өвчтэй байгаагүй юу?

-Үгүй ээ. Эрүүл байсан гэдгийг нь илтгэх бичиг баримт байгаа. Төрөхдөө эмчийн хяналтад байж, эрүүл мэндийн карт дээр нь бүх зүйлийг нь бичсэн байдаг. Харин даралт нь ихсэж, байнга даралтны эм уудаг байсан. Төрөх үеэр хордлого өгч, даралт нь ихэсдэг болсон юм. Төрснөөсөө хойш бие нь эрүүл, эмчид үзүүлж байгаагүй.

-Вакцин хийлгэх үедээ даралтыг нь үзсэн юм болов уу?

-Ээжийн хэлснээр бол даралтыг нь үзээгүй, асуумж бөглүүлсэн гэсэн. Тухайн үед хамт байгаагүй болохоор сайн мэдэхгүй байна.

-Гэрээсээ гараад ухаан алдаад уначихсан байсан юм уу?

-Гараад, орж ирэхгүй 10 минут орчим болсон. Бид удаад байхаар нь санаа зовоод араас нь гарсан юм. Гэтэл ээж минь жорлонгийн хажууд уначихсан, хэвтэж байсан. Ээжийг гэр рүү өргөж, оруулаад түргэн дуудсан. Түргэний эмч ирээд “Энэ хүн чинь нас барчихсан байна” гэж хэлсэн. Тэгээд цагдаа нар ирээд ээжийн цогцсыг Шүүх шинжилгээний хүрээлэн рүү аваад явсан. Ээжийг минь аваад явсны дараа дэрлүүлсэн дэрийг нь үзэхэд шал нойтон болчихсон байсан.

-Урьдчилсан байдлаар юунаас болж нас барсныг нь хэлсэн үү. Ээжийнх цогцсыг нь та нарт өгсөн үү?

-Шүүх шинжилгээний дүгнэлт нь 14 хоногийн дараа гарах юм билээ. Урьдчилсан байдлаар тархины цус харвалтаас болж амиа алдсан гэсэн. Гэхдээ сайн мэдэхгүй байна. Бидэнд ээжийн минь цогцсыг өгөөгүй байгаа. Аав өнөөдөр (өчигдөр) албаны хүмүүстэй очиж уулзсан. “Цогцсыг нь чандарлах шаардлагатай гэж байна” л гэж хэлсэн. Аав минь сэтгэл санааны хямралтай байгаа учраас юу ч ярихгүй байгаа.

-Нялх дүү нь ямар байна вэ?

-Миний дүү ээж нь байхгүй болохоор байнга уйлж байгаа. Мөөмөө санаад байх шиг байна. Нэмэлт тэжээл ууж байгаа. Нэг сартай, найман настай дүүд минь үнэхээр хэцүү байна. Би арванхоёрдугаар ангиа энэ жил төгсөнө. Ах минь одоо дөнгөж 20 настай. Бид яах учраа олохгүй үнэхээр хэцүү байна. Эрүүл байсан ээж минь вакцин хийлгээд л нас барчихлаа. Бидэнд тохиолдсон зовлон олон хүнд битгий тохиолдоосой гэсэндээ энэ бүхнийг ярьж байна.