-МОНГОЛЧУУД ХЯТАД ИРГЭНИЙГ ҮҮРЧ, ХУУЛЬ БУСААР ХИЛ ДАВУУЛЖЭЭ-

Өмнөговь аймаг дахь хилийн 0166 дугаар ангийн хариуцсан ... дугаар тэмдэгтээр Монгол Улсын хоёр, БНХАУ-ын нэг иргэн нэвтэрч, хил зөрчсөн хэрэг гарчээ. Тодруулбал, өнгөрсөн дөрөвдүгээр сарын 10-11-нд шилжих шөнө гурван хүн Монгол Улсын талаас БНХАУ руу хууль бусаар зорчсоныг хилийн 0166 дугаар ангийн манаанд гарч байсан хилчид илрүүлжээ. Хилийн манааны ахлагч хил зөрчсөн иргэдийн мөрийг илрүүлсэн даруйдаа буюу дөрөвдүгээр сарын 11-ний 08:00 цагт ангийн удирдлагууддаа мэдэгдсэн аж. Харин хилийн 0166 дугаар захирагч Б.Мөнхбат энэ тухай мэдээллийг Хил хамгаалах ерөнхий газарт 14:30 цагт мэдэгджээ.

Гурван хүн Монгол Улсын талаас БНХАУ руу хууль бусаар зорчсоныг хилийн 0166 дугаар ангийн манаанд гарч байсан хилчид илрүүлжээ

Тэрбээр “Үндэсний аюулгүй байдалд заналхийлсэн хэргийг ямар шалтгааны улмаас цаг алдаж, түүгээр ч зогсохгүй буруу ташаа хүргэснийг таашгүй. Тодруулбал, Б.Мөнхбат захирагч Хил хамгаалах газрын удирдлагат “Нэг хүн хилийн торгон зурваст тулаад буцсан мөр илэрсэн. Хил зөрчиж, даваагүй” гэх мэдээлэл өгсөн байж болзошгүй талаар эх сурвалж мэдээлэв.

БНХАУ-ын иргэнийг монголчууд нууцаар хил давуулаад баригджээ

Эх сурвалжийн мэдээлж буйгаар “Гурван хүн хилийн торон хаалтад тулж очсон байна лээ. Ингэхдээ гурвуулаа явсан гэдгээ нууцалж, нэгийгээ үүрч явсан бололтой байсан. Тэгээд хилийн зурваст очоод үүрч явсан хүнээ хил давуулж, хоёр нь буцсан байгаа юм. Хууль бусаар хил давсан иргэн нь дөрөвдүгээр сарын 11-ний 01:00 цагийн орчимд БНХАУ-ын хилчдэд саатуулагдсан байна лээ. Тодруулбал, манай улсын хоёр иргэн БНХАУ-ын нэг иргэнийг үүрч, хилийн зурваст хүргээд, хууль бусаар хил давуулсан гэсэн үг. Энэ нь хууль хяналтын байгууллагын шалгалтаар тогтоогдож, тухайн хоёр иргэнийг дөрөвдүгээр сарын 11-ний 16:00 цагийн орчимд Өмнөговь аймгийн нутаг дэвсгэрээс саатуулсан гэсэн. Энэ хэрэгтэй холбоотойгоор хилийн 0166 дугаар ангийн захирагч, хурандаа Б.Мөнхбатыг ажлаас нь чөлөөлсөн гэх мэдээлэл гарсан. Гэхдээ тэр хүн одоо хүртэл ажлаа хэвийн хийж байгаа. Шалгалт ирсэн хэдий ч захирагчийг нь ажлаас нь чөлөөлөөгүй. Бүхэл бүтэн өөрийнх нь ангийн хариуцаж байгаа хилийн зурвасаар БНХАУ-ын иргэнийг монголчууд хил давуулж, улс орноосоо урвасан хэргийг хаацайлж, нууцалж байна. Магад хил зөрчигчидтэй тохиролцсон ч байж болзошгүй шүү дээ” гэлээ.

Хятадуудыг хууль бусаар хил давуулсан хэргийг ТЕГ шалгаж байна

Энэ хэргийн Өмнөговь аймгийн Цагдаагийн газар шалгаж байгаад ТЕГ-т шилжүүлжээ. Өөрөөр хэлбэл, эл хэргийг тагнуулын байгууллага шалгаж байгаа гэсэн үг. Хэргийг шалгаж байх явцад хэд хэдэн ноцтой зөрчил илэрч, хилийн 0166 дугаар ангийн удирдлагуудыг хэрэгт холбогдуулан шалгаж байгаа гэх мэдээлэл бий.

Эх орноосоо урваж, урд хөршийн иргэнийг үүрч түүрээд хилийн зурваст хүргэсэн Монгол Улсын хоёр иргэн хэн бэ гэдэг нь одоо хүртэл тодорхойгүй байна.

Д.ЭНХТАЙВАН: Хилийн 0166 дугаар ангийн захирагч Б.Мөнхбатыг буруу мэдээлэл дамжуулсан үндэслэлээр ажлаас нь чөлөөлсөн

Хил хамгаалах ерөнхий газраас хилийн 0166 дугаар ангийн захирагч Б.Мөнхбатыг мэдээллийг үнэн бодитоор өгөөгүй, хил зөрчигчдийг хайх ажлыг удирдаж оролцоогүй, хаана байгаа нь тодорхойгүй байсан гэх шалтгаанаар хариуцлага тооцож, ажлаас нь чөлөөлсөн гэх мэдээлэл гарсан. Хил хамгаалах ерөнхий газрын Олон нийттэй харилцах албаны дарга Д.Энхтайванаас хил зөрчсөн хэрэг гарсан эсэх, тус ангийн захирагчийг ажлаас нь чөлөөлсөн эсэх талаар тодруулсан юм.

Тэрбээр “Манай улсын хоёр иргэн хуйвалдаж, БНХАУ-ын иргэнийг хил давуулсан хэрэг дөрөвдүгээр сарын 10-11-нд шилжих шөнө гарсан нь үнэн. Энэ хэргийг Тагнуулын ерөнхий газраас шалгаж байгаа учир нарийн мэдээлэл өгөх боломжгүй. Эл хэргийг манай улсын Эрүүгийн хуулиар шийднэ. Гэхдээ Үндэсний аюулгүй байдалд заналхийлсэн хэрэг учраас тагнуулын байгууллагаас эхлээд заавал шалгадаг юм. Хилийн 0166 дугаар ангийн захирагч Б.Мөнхбатыг буруу мэдээлэл өгсөн үндэслэлээр ажлаас нь чөлөөлсөн. Буруу мэдээлэл өгсөн эсэхийг нь хууль хяналтын байгууллага шалгаж байгаа. Манай байгууллагаас эхний ээлжинд буруу мэдээлэл дамжуулсан гэж үзээд ажлаас нь чөлөөлсөн” гэлээ.  

Нууцаар хил давуулсан БНХАУ-ын иргэн нь манай улсад их хэмжээний залилан хийгээд оргосон байж болзошгүй.

Б.МӨНХБАТ: Намайг ажлаас чөлөөлөөгүй

Албаны хүний хэлж буйгаар хилийн 0166 дугаар ангийн захирагч Б.Мөнхбатыг ажлаас нь чөлөөлж, хэргийг тагнуулын байгууллагаас шалгаж байгаа аж. Харин энэ хэргийн талаар хилийн 0166 дугаар ангийн захирагч Б.Мөнхбатаас тодруулахад, тэрбээр “Монголчууд БНХАУ-ын иргэнийг хууль бусаар хил давуулсан хэрэгтэй холбоотойгоор намайг ажлаас чөлөөлөөгүй. Энэ буруу ташаа мэдээлэл байна. Хил давуулсан иргэдийг бид олж, хуулийн байгууллагад хүлээлгэж өгсөн. Би худлаа мэдээлэл өгөөгүй. Хил хамгаалах байгууллагад насаараа буюу 39 жил ажиллаж байна шүү дээ. Би өгөх ёстой мэдээллийг ХХЕГ-т мэдээлэх журмынхаа дагуу, хэлэх ёстой цагтаа хэлсэн. Би үүнээс өөр мэдээлэл өгөхгүй” гэлээ.

Монголчууд БНХАУ-ын иргэнийг хууль бусаар хил давуулсан хэрэгтэй холбоотойгоор намайг ажлаас чөлөөлөөгүй

Эх орноосоо урваж, урд хөршийн иргэнийг хилийн зурвасаар хил нэвтрүүлсэн гэх иргэд хэн бэ

Эл хэргийг хууль хяналтын байгууллага шалгаад өдгөө нэг сар орчим болж байна. Эх орноосоо урваж, урд хөршийн иргэнийг үүрч түүрээд хилийн зурваст хүргэсэн Монгол Улсын хоёр иргэн хэн бэ гэдэг нь одоо хүртэл тодорхойгүй байна. Албан бус эх сурвалжийн хэлж буйгаар “Нууцаар хил давуулсан БНХАУ-ын иргэн нь манай улсад их хэмжээний залилан хийж байгаад оргосон байж болзошгүй. Монголчууд сурамгай нь аргагүй хил давуулсан байна лээ. Харин БНХАУ-ын хилчид хил даваад хэдхэн минут болоход нь л баривчилсан байгаа юм. Гэхдээ манай хилчид өглөө нь хил давсан мөрийг илрүүлж, хурдан шуурхай ажилласан нь сайшаалтай. Хятадыг хил давуулсан Монгол Улсын хоёр иргэн нь Өмнөговь аймгийн харьяат байж магадгүй. Тэд малчин айлын ойролцоо машинаа үлдээгээд харуй бүрийгээр явган алхсан гэсэн. Шөнө дунд хилийн зурваст хүрч очсон байна лээ” гэв.

Монгол Улсын хил халдашгүй дархан байх ёстой. Гэтэл харийнханд найр тавьж, улсынхаа хилийг айлын хашаа давж байгаа мэт дуртайг нь дураар нь давуулсан талаарх мэдээллийг үргэлжлүүлэн хүргэх болно.