Нийслэлийн Сүхбаатар дүүргийн 11 дүгээр хороонд байрлах “Хангай хотхон”-ы 502 дугаар байрны есөн давхраас эрэгтэй хүн унаж, нас барсан хэрэг гарсан талаар бид өчигдөр мэдээлсэн. Энэ хэргийн талаар Цагдаагийн ерөнхий газрын Хэвлэл мэдээллийн төвийн дарга Б.Баатархүүгээс тодруулахад “Хангай хотхон”-ы есөн давхраас хүн унаж, нас барсан хэрэг бүртгэгдсэн. Мөрдөн шалгах ажиллагаа үргэлжилж байна. Талийгаачийн биеэс гэрээслэл олдсон. Эл хэрэг гарахаас өмнө Баянгол дүүргийн нутаг дэвсгэрт гадны нөлөөтэй амиа алдсан хэрэг гарсан. Талийгаачийн биеэс олдсон гэрээслэлд Баянгол дүүрэгт амиа алдсан хүний талаар бичсэн байсан. Талийгаач нар хоорондоо хамаарал бүхий овог нэгтэй хүмүүс байгаа” гэв.

Баттай эх сурвалжийн мэдээлж буйгаар “Хангай хотхон”-ы есөн давхраас унаж амиа алдсан А.Т нь төрсөн ахыгаа хутгалж, хөнөөгөөд нэг хоногийн дараа амиа хорложээ. Тодруулбал, талийгаач 32 настай А.Т нь төрсөн ах 33 настай А.М-ыг гэрт нь 76 удаа цээж, толгой, хэвлий, өгзөг, гуя хэсэгт нь хутгалж, хөнөөжээ. Тэрээр өндрөөс үсрэхдээ гэрээслэл бичиж, ахыгаа хөнөөсөн гэдгээ хүлээн зөвшөөрсөн байна. Гэрээслэлд “Баянгол дүүргийн хоёрдугаар хороонд ... дугаар тоотод төрсөн ах А.М-ыг хөнөөсөн. Энэ хүн амины хэрэг тавдугаар сарын 5-нд болсон” гэж бичсэн байжээ.

Мөн өөр нэг эх сурвалжийн мэдээлж буйгаар “Хангай хотхон”-ны есөн давхрын цонхноос эрэгтэй хүн гэнэт үсэрчихсэн. Цонхоор толгой гаргаж ирээд гадна орчныг харж, ажиглаж байгаа бололтой харагдаж байсан. Гэнэт л дээрээс юм унах чимээ гарч, хогийн савны хажууд унасан. Энэ хэрэг тавдугаар сарын 6-ны 18:00 цагийн үед болсон” гэлээ.

Талийгаач нар хувийн таарамжгүй харилцаанаас болж уг хэргийг үйлдсэн байж болзошгүй нөхцөл байдал тогтоогдож, хэргийг цагдаагийн байгууллагаас үргэлжлүүлэн шалгаж байна.