-ОСОЛ БОЛСОН БАРИЛГА НЬ ЗАСГИЙН ГАЗРЫН 21:100 ХӨТӨЛБӨРИЙН ХҮРЭЭНД ЖИЛД 300 МЯНГАН ТОНН ЦЕМЕНТ ҮЙЛДВЭРЛЭЖ, БАРУУН БҮСИЙН ЦЕМЕНТИЙН ХЭРЭГЛЭЭГ 100 ХУВЬ ХАНГАХААР ТӨЛӨВЛӨЖ БУЙ ҮЙЛДВЭР-

Ховд аймгийн Буянт сумын Өгөөмөр багийн Хөх булан гэх газарт баригдаж байгаа барилгын багана, таазны хэсэг нурж, таван хүн дарагдаж, эмнэлэгт хүргэгджээ. Тодруулбал, тус суманд баригдаж байгаа “Ховд-Эко цемент” үйлдвэрийн барилгад хөдөлмөрийн аюулгүй байдал алдагдаж, осол гарчээ. Ослын тухай дуудлага Ховд аймгийн Онцгой байдлын газарт уржигдар буюу тавдугаар сарын 3-ны 20:43 цагт ирсэн байна. Дуудлагын дагуу тус аймгийн Онцгой байдлын газрын Эрэн хайх, аврах ангийн алба хаагчид тус өдрийн 21:30 цагт очиход 20х30 метрийн хэмжээтэй, цутгалтаа хийж байсан нэг давхар цементийн үйлдвэрийн барилгын тулгуур багана, таазны хэсэг нурсан байжээ. Барилгад ажиллаж байсан 25 настай, эрэгтэй Г, Э, 31 настай, эрэгтэй Б, 22 настай, эрэгтэй Г, 51 настай, эрэгтэй Т нар барилгын хийцэд дарагдсан байсныг гаргаж авсан байна. Бэртсэн дөрвөн хүний биеийн байдал хэвийн, нэг хүний бие хүндэвтэр байгаа бөгөөд Баруун бүсийн оношилгоо, эмчилгээний төвд эмчлүүлж байна хэмээн өчигдөр Онцгой байдлын ерөнхий газраас мэдээлсэн.

Осол болсон барилга нь Засгийн газрын 21:100 хөтөлбөрийн хүрээнд жилд 300 мянган тонн цемент үйлдвэрлэж, баруун бүсийн цементийн хэрэглээг 100 хувь хангахаар төлөвлөж буй үйлдвэр гэнэ. Тус үйлдвэрийн барилгыг  “Вестерн холд” ХХК барьж, таван компани туслан гүйцэтгэгчээр ажиллаж байгаа аж. Үйлдвэрийн барилгын шавь тавих ёслол өнгөрсөн 2019 оны тавдугаар сард болж, 2020 онд ашиглалтад оруулахаар төлөвлөсөн байжээ. Шавь тавих ёслолд тухайн үеийн Ерөнхий сайд У.Хүрэлсүх оролцож, Засгийн газрын Хэвлэл мэдээлэл олон нийттэй харилцах хэлтсээс “Ховд-Эко Цемент”-ийн үйлдвэрийн барилгын ажилд орон нутгаас 100 гаруй хүн ажиллана. 2020 онд үйлдвэр ашиглалтад орсноор 250 хүн тогтмол ажлын байртай болно. Зөвхөн тээвэрлэлтээс гэхэд баруун аймгууд жилдээ 43 тэрбум төгрөг хэмнэх тооцоо судалгаа байна. Нэг тонн цементийн өртгийг 150 мянга орчим төгрөг буюу Улаанбаатар хотын үнэ ханштай дүйцүүлнэ. Үүний үр дүнд баруун аймгуудад орон сууцны м.кв талбайн үнэ 30-40 хувь хямдарч, 800 орчим мянган төгрөг болж, үнэ нь тогтворжино” хэмээн мэдэгдэж байлаа. Харамсалтай нь, одоогийн байдлаар ашиглалтад орох нь бүү хэл хөдөлмөрийн аюулгүй байдал алдагдаж, таван хүн гэмтлээ. 

Тус барилгын үйл ажиллагааг зогсоож, битүүмжилж, тус аймгийн ЗДТГ-аас ажлын хэсэг байгуулагдаж, шалгалтын ажиллагаа явуулж байгаа гэх мэдээлэл бий. Үүний дагуу ХОВД АЙМГИЙН ЗАСАГ ДАРГА Ж.ДҮГЭРЖАВААС ТОДРУУЛАХАД “Аймгийн Засаг даргын Тамгын газарт энэ талаар гомдол ирээгүй. Ямар ч асуудал байхгүй. Ажлын хэсэг томилогдож ажиллах бол хуулийн байгууллагаас мэдэгдэл ирэх ёстой” гэв. Үйлдвэрийн осол болсон газарт шалгалтын ажиллагаа явуулах нь бүү хэл гомдол ирээгүй гэх нэрийдлээр хэргийг ихэд нууцалж байгаа бололтой.

Мөн БУЯНТ СУМЫН ЗАСАГ ДАРГА Н.НЭРГҮЙГЭЭС ТОДРУУЛАХАД “Манай сумын төвөөс 12 километрийн зайтай баригдаж байгаа цементийн үйлдвэрт осол гарсан нь үнэн. Бэртэж, гэмтсэн хүмүүсийг Баруун бүсийн оношилгоо, эмчилгээний төвд хүргэсэн гэсэн. Тус үйлдвэр нь өнгөрсөн оноос эхэлж баригдаж байгаа. Одоогийн байдлаар 400 гаруй хүн барилга дээр ажиллаж байгаа юм билээ. Манай суманд халдвар бүртгэгдээгүй, ногоон бүс учраас барилгын ажил хэвийн явагдаж байсан. Гэмтсэн хүмүүс нь манай сумынх биш учраас сайн мэдэхгүй” гэсэн юм.

Хуурай аргын эко буюу ус бага хэрэглэдэг, байгаль орчинд хамгийн бага сөрөг нөлөөтэй байх үйлдвэрийн төсөл нийтдээ 60 сая ам.долларын өртөгтэй аж. Үйлдвэрийн барилгын ажлыг монгол ажилчид гүйцэтгэх бол тоног төхөөрөмж угсралтыг БНХАУ-аас ажилчид ирж хийж гүйцэтгэхээр төлөвлөжээ. ОСОЛ ЮУНААС БОЛЖ ГАРСАН ТАЛААР “ВЕСТЕРН ХОЛД” ХХК-ИЙН УДИРДЛАГААС ТОДРУУЛАХАД “Барилгын тулаас багана хол зайтай байснаас болж нурсан. Хүмүүс барилгын нурангид дарагдаагүй. Манай компанийн таван ажилтан хөнгөн гэмтэл авсан. Одоогийн байдлаар дөрвөн хүн нь эрүүл, гэмтэлгүй гэсэн учраас үйлдвэр рүү явсан. Харин нэг хүн нь хөнгөн бэртэлтэй эмнэлэгт байгаа. Толгой, дух хэсэг нь шалбарсан юм шиг билээ. Түүнээс өөрөөр гэмтэж, амь насанд хүрэх хэмжээний гэмтэл биш. Цементийн үйлдвэрийн барилга биш учраас олон давхар байгаагүй. Хоёр давхрын барилгын л тулаас унасан шиг байна лээ. Манай “Верстерн холд” ХХК-ийн 100 хувийн санхүүжилтээр баригдаж байгаа үйлдвэр. Одоогийн байдлаар 430 орчим хүн ажиллаж байна. Үйлдвэр баригдаж байгаа хэсэгт сүлжээгүй учраас хүмүүстэйгээ холбогдож чадахгүй байна. Эмнэлэгт үлдсэн нэг хүн бие нь зүгээр бол үйлдвэр рүүгээ өнөөдөр (өчигдөр) бараг явж байгаа байх. Гэмтсэн ажилтнууд монгол. БНХАУ-аас ажилтнууд орж ирээгүй байгаа” гэх мэдээлэл өглөө.

            Харин хүмүүсийн биеийн байдлын талаар  ХОВД АЙМГИЙН БАРУУН БҮСИЙН ОНОШИЛГОО, ЭМЧИЛГЭЭНИЙ ТӨВИЙН ЭМЧИЛГЭЭ ЭРХЭЛСЭН ОРЛОГЧ ДАРГААС ТОДРУУЛАХАД “Хүмүүсийн биеийн байдал тогтвортой байна” хэмээгээд утсаа салгав.

Эмнэлгийн байгууллагын өгсөн тайлбараас үзвэл осолд орсон иргэд эмнэлэгт эмчлүүлж байгаа бөгөөд үйлдвэр рүүгээ явсан гэдэг нь худал аж.