АТГ-аас өнгөрсөн 2019 оны тавдугаар сард тухайн үеийн ЗХЖШ-ын Хуурай замын цэргийн командлалын хэлтсийн дарга, хурандаа Ц.Жавхланбаатарыг авлигын хэргээр шалгаж байлаа. Тодруулбал, Зэвсэгт хүчний 284 дүгээр ангийн ахлагч .. –ийн ээж “Хурандаа Ц.Жавхланбаатар нь миний хүүг “Энхийг сахиулах ажиллагаанд явуулж өгнө” гэж хэлээд 3.5 сая төгрөг аваад, залилчихлаа. Энэ асуудлыг шалгаж өгөөд, мөнгийг минь буцааж олгоно уу” гэх утга бүхий өргөдлийг хууль хяналтын байгууллагад өгсөн байдаг. Үүнтэй холбогдуулан түүнийг эрх мэдэл, албан тушаалын байдлын байдлаа урвуулан ашиглаж, бусдаас авлига авсан үндэслэлээр Эрүүгийн хэргээр үүсгэж, шалгаж эхэлсэн юм.  

          Эл хэрэг 2018 оны тавдугаар сард болжээ. Хурандаа Ц.Жавхланбаатар нь Зэвсэгт хүчний 284 ангийн ахлагч ..-г Исламын Бүгд Найрамдах Афганистан Улсад явагдаж буй “Шийдвэртэй дэмжлэг” энхийг дэмжих ажиллагаанд явуулж өгнө хэмээн мөнгө авчээ. Тэрбээр “Би чамайг эмчийн үзлэг, биеийн тамирын шалгалт, ажиллагааны 45 хоногийн бэлтгэлд гаргахгүйгээр энхийг дэмжих ажиллагаанд явуулна. Чи авч явах зүйлээ бэлдээд, нисэхэд бэлэн байгаарай. Бэлтгэлээс бууж ирсэн хүмүүсээс алдаа дутагдал гаргасан нэгний оронд оруулна” хэмээн 3.5 сая төгрөг бэлнээр авсан гэдэг. Тэдний харилцан яриа бүтэлгүйтэж, ахлагч залуу Афганистан руу явж чадаагүй байна. Харин үүний дараа түүнийг Бүгд Найрамдах Өмнөд Судан Улсад энхийг сахиулах 850 алба хаагчийн тоонд багтааж, явуулахаар тохирчээ. Ингэхдээ үүргээ гүйцэтгээд ирсний дараа ахлагчаас 2-2.5 сая төгрөг нэмж авахаар тохирсон байж болзошгүй гэнэ. Учир нь, Афганистан, Судан Улсад үүрэг гүйцэтгэхэд 6-12 сарын хугацаатай байдаг бөгөөд авах цалингийн хэмжээ өөр аж. Өөрөөр хэлбэл, Афганистан, Судан Улс руу энхийг сахиулах ажиллагаанд явуулахад ханш өөр гэсэн үг. Хоёр тал тохиролцоонд хүрсэн ч ахлагч залуу 2019 оны тавдугаар сар хүртэл ажиллагаанд явж чадаагүй тул ар гэрийнхэн нь хууль хяналтын байгууллагад хандсан гэдэг.

Монгол Улсын Ерөнхийлөгч, Зэвсэгт хүчний Ерөнхий командлагч Халтмаагийн Баттулга зарлиг буулгаж, Ц.Жавхланбаатарт Бригадын генерал цол олголоо.

Хурандаа Ц.Жавхланбаатар хууль хяналтын байгууллагад шалгагдаж эхэлсэн даруйдаа ахлагчийн мөнгийг буцааж өгсөн гэх мэдээлэл тухайн үед гарч байсан юм. Хоёр жил гаруйн хугацаанд шалгагдаж, хууль хяналтын байгууллагад “ээрэгдсэн” хурандаа Ц.Жавхланбаатарт яллах дүгнэлт үйлдэх хүсэлт хүргүүлж, хэргийг прокурорт шилжүүлсэн байдаг. Энэ хугацаанд Ц.Жавхланбаатарт залилуулсан гэх 2-3 хохирч гарч ирэн, 10 орчим сая төгрөг нэхэмжилсэн ч байж болзошгүй байгаа аж. Хачирхалтай нь, прокуророос түүнийг гэм буруугүйд тооцож, хэргийг хэрэгсэхгүй болгожээ. Өөрөөр хэлбэл, албан тушаалаа урвуулан ашиглаж, бусдаас авлига авсан хурандаагийн хэргийг хаасан гэсэн үг .

Мөн Ц.Жавхланбаатар нь эл хэрэгт холбогдохоосоо өмнө Сонгинохайрхан дүүргийн Цагдаагийн II хэлтэст Эрүүгийн хуулийн 17.3-т заасан улсаас их хэмжээний мөнгө залилан мэхэлсэн хэрэгт шалгагдаж байсан гэнэ. Тодруулбал, тэрбээр хамтран амьдрагчаа цэргийн ангид ажилладаг болгож, сул цалин авч байсан аж. Түүнд Эрүүгийн хэрэг үүсгэж, хууль хяналтын байгууллагаас шалгаж байсан ч хэрэг мөн л хаагдсан байна. Хоёр ч удаа Эрүүгийн хэрэгт холбогдож, шалгагдаж байсан тэрбээр 2019 оны есдүгээр сард тушаал дэвшиж, ЗХЖШ-ын орлогч дарга болжээ.

Хурандаа Ц.Жавхланбаатарын авлигын хэрэг хаагдаж, хэрэгсэхгүй болохтой зэрэгцэн Монгол Улсад генерал цол бий болсны 77 жилийн ой боллоо. Тэрбээр энэ өдөр цэргийн дээд цол болох генерал цол хүртэхээр болжээ. Тодруулбал, Монгол Улсын Ерөнхийлөгч, Зэвсэгт хүчний Ерөнхий командлагч Халтмаагийн Баттулга зарлиг буулгаж, Ц.Жавхланбаатарт Бригадын генерал цол олголоо.

            Салбарынхаа нэрийг шавартай хутгаж, авлига авч, мөнгө “идэж” хөлжсөн Ц.Жавхланбаатарын ард хэн байдаг вэ. Авлига авч, эрүүгийн хэрэгт шалгагдаад байхад хэн мундагдаж хэргийг нь хаалгадаг вэ. Үүгээр ч зогсохгүй Зэвсэгт хүчинд олон жил зүтгэсэн хурандаа, генералуудын хашаагүй албыг хэн түүнд “бэлэглэдэг” вэ. Тэр хэний хүн бэ гэх асуулт салбарынхан дунд нь хөвөрч байна.