-УЛСЫН МӨНГӨ ХУВЬДАА ЗАВШСАН НЭР БҮХИЙ АЛБАН ТУШААЛТАН, УЛСТӨРЧДӨД ХАМААРАХ ХЭРГИЙГ ШАЛГАХ ХУУЛЬ, ХЯНАЛТЫН БАЙГУУЛЛАГА, ШУДАРГА ШҮҮХ МОНГОЛД БАЙНА УУ-

Албан тушаал, эрх мэдлээ урвуулан ашиглаж, улсаас их хэмжээний хөрөнгө завшсан төрийн “томчууд”-ын дуулиант хэргүүд ковидоор халхавч хийж, зарим нь хаагдаж, замхарч байна. Авлига, хээл хахууль, албан тушаалын гэмт хэргүүд сүр дуулиантай шалгагдаж эхэлдэг ч тэсгхийгээд намждаг болоод удаж буй. Адаг сүүлд нь хэрэгсэхгүй гэх ганцхан үгтэй цагаан цаас “тэврээд” үлдэж байна, монголчууд.

Х.Бадамсүрэнгийн тансаглалд ковид “хачир” болов уу

“Эрдэнэт” үйлдвэрийн Ерөнхий захирал Х.Бадамсүрэнгийн хэрэг хаана замхарсан бэ. Төрийн өмчит үйлдвэрийн мөнгөөр охиныхоо сургалтын төлбөр болох 100 гаруй сая төгрөгийг төлсөн гэх “Эрдэнэт” үйлдвэрийн захирал Х.Бадамсүрэнгийн хэргийг ингээд өнгөрөөж байгаа хэрэг үү. Ковидын халдвар намжиж л байвал хэний ч хэргийг өршөөж, замхрааж байгаа юм уу. Тус үйлдвэрийн Шилэн дансны мэдээллээр Х.Бадамсүрэн нь хувийн орон сууцаа тохижуулсан, хагас тэрбумын үнэтэй автомашин, мөнгөн аяга, массажны сандал, уран зураг, согтууруулах ундаа худалдаж авахыг зэхсэн гээд тэрбум, тэрбумаар тоологдох хөрөнгийг хувьдаа завшсан нь ил болоод он дамжлаа. Мөн “Эрдэнэт” үйлдвэрийн Тамгын газрын дарга Д.Баярболд, Тэргүүлэх менежер Н.Энхбаатар нар тус үйлдвэрийн мөнгөөр сар бүр өндөр үнэтэй орон сууцны түрээсээ төлүүлдэг баримт байгаа. Ингэхдээ сар бүр 6-12 сая төгрөг бэлнээр авч байсан гэх мэт олон ноцтой баримт бий.

Төрийн өмчит үйлдвэрийн мөнгөөр охиныхоо сургалтын төлбөр болох 100 гаруй сая төгрөгийг төлсөн гэх “Эрдэнэт” үйлдвэрийн захирал Х.Бадамсүрэн

Гаднын зургаан оронд Сү.Батболдын хууль бус хөрөнгийг битүүмжилсэн гэх баримтыг хэн ч шалгахгүй хэрэг үү

УИХ-ын гишүүн Сү.Батболдыг нийтийн албан тушаалтнуудтай холбоотой оффшор бүсэд компани эзэмшдэг, хууль бус орлогоо нуусан, эсэх талаарх мэдээллийн дагуу АТГ-аас шалгаж байсан билээ. Мөн түүнийг Ерөнхий сайд байхдаа Оюутолгой төслийн хүрээнд Монгол Улсын Засгийн газар, “Айвенхоу Майнз Монголия Инк” ХХК, “Айвенхоу Майнз Лимитед”, “Рио Тинто Интернэшнл Холдингс Лимитед” компанийн хооронд 2009 оны аравдугаар сарын 6-ны өдөр байгуулсан хөрөнгө оруулалтын гэрээ, хувь нийлүүлэгчдийн гэрээг батлахад нэр бүхий албан тушаалтнууд эрх мэдэл, албан тушаалын байдлаа урвуулан ашиглаж, илт хууль бус шийдвэр гаргаж, бусдад давуу байдал бий болгон хохирол учруулсан байж болзошгүй хэрэгт холбогдуулан шалгаж байсан юм.

Нийслэлийн прокурорын газрын орлогч прокурор асан Ц.Насанбат УИХ-ын гишүүн Сү.Батболдыг нийтийн албан тушаалтнуудтай холбоотой оффшор бүсэд компани эзэмшдэг, хууль бус орлогоо нуусантай холбоотой мөрдөн шалгалт хийж байгаа талаар мэдээлээд 70 хоног өнгөрлөө. АНУ-ын Нью Йорк мужийн Дээд шүүх болон бусад зургаан улсад хөрөнгө хамгаалах, хөрөнгө буцаахтай холбоотой иргэний хэрэг хянан шийдвэрлэх ажиллагаа эхлээд байгаа.

Конвенцын заалтын дагуу хөрөнгө байршиж байгаа улсууд болох Англид 20 сая, Хонконгод 30 сая, Сингапурт нэг сая, Жерсид 16 сая ам.долларын үнийн дүн бүхий хөрөнгө, эрхийг битүүмжлэх, царцаах захирамж тухайн улс орны шүүхээс гаргасан.

Жерси гэдэг Үндсэн хуульт хаант засаглалтай, Европ тив дэх арлын улс болох нь харагдана. Нью-Йорк мужийн Дээд шүүхийн хувьд нэхэмжлэгч талаас битүүмжлэх шаардлагатай гэж үзсэн хөрөнгүүдийг эзэмшигч, хариуцагчаар татагдсан этгээдүүд нь бусдад шилжүүлэхгүй, захиран зарцуулахгүй байх, шилжүүлэх тохиолдолд 60 хоногийн өмнө урьдчилж мэдэгдэх баталгааг шүүхэд гаргаж өгсөн. Одоо АНУ-ын “JPMorgan Chase NA” банкнаас шүүхийн журмаар нотлох баримтууд гаргуулах ажиллагаа АНУ-ын Нью-Йоркийн Өмнөд дүүргийн шүүхэд тус тус явагдаж байна гэж тэр мэдээлсэн. Гэхдээ яг үнэндээ энэ хэрэг замхрах тийшээ хандлаа.

Сү.Батболд ч үгүй, оффшор бүсийн хөрөнгө ч үгүй, сүүлдээ ноцтой мэдээлэл өгсөн прокурор Ц.Насанбат ч үгүй боллоо.

Оффшорын мөнгө угаагдсаар Богд хан ууланд барилга болон сүндэрлэв

АТГ болон хууль хяналтын байгууллагаас оффшор бүс дэх мөнгийг Монгол Улсад оруулж ирсэн гэх хэргийн мөрөөр хяналт, шалгалт хийсэн байдаг. Шалгалтаар оффшор бүсэд байсан мөнгө Монгол Улсад орж ирээд байшин, барилга болсон талаарх баримтууд хууль хяналтын байгууллагад олджээ.Баримтын дагуу шалгалтын ажиллагаа явуулахад оффшорын мөнгөний ихэнх хувь нь Богд хан ууланд хаус, орон сууцны хороолол болж, сүндэрлэсэн нь тогтоогдсон юм. Байгаль орчин аялал жуулчлалын яам, Эрүүгийн цагдаагийн газар, АТГ-ын болон бусад хууль хяналтын байгууллагынхан ажлын хэсэг томилж, Богд хан ууланд цогц шалгалт явуулж байлаа.

Өөрөөр хэлбэл, Богд хан ууланд баригдсан барилга хэнийх, хэчнээн тооных байгаа, хаана, хаана баригдсан зэрэг тоо баримтыг нэгдсэн санд төвлөрүүлэхээр төлөвлөж, уг ажлыг хийсэн гэх. Уг ажлыг гурван сарын хугацаанд хийсэн бөгөөд энэ хугацаанд хэд хэдэн ноцтой зөрчил илэрлүүлсэн гэдэг. Хууль хяналтын байгууллагынхан хуулиа мөрдөж,

Богд хан ууланд хууль бусаар барилга байгууламж барьсан иргэдийг эрүүгийн хэрэгтэн болгох уу. Эсвэл төр буруутай шийдвэр гаргаснаа хүлээн зөвшөөрөх үү шийдүүлэхээр Засгийн газарт санал оруулсан. Уг асуудлыг буюу хуулиа өөрчлөх эсэхийг Засгийн газраас эцэслэн шийдэх ёстой ч одоо хүртэл нүдэн балай чихэн дүлий байсаар.

Өөрөөр хэлбэл, Төрийн тусгай хамгаалалттай газрын нутгийн тухай хууль НЗДТГ-ын тогтоол хоёр хоорондоо зөрчилдөж байгааг нэг тийш болгохоор төлөвлөж, уг хэрэг гацаанд орсон гэсэн үг.

Туулын бургасын хядаж, байгаль орчны эсрэг гэмт хэрэг үйлдсэн С.Амарсайханы төрсөн ахын хэрэг хаана “төөрсөн” бэ

Дархан цаазат Богдхан уулын хязгаарлалтын бүс буюу Бага тэнгэрийн амны чанх хойно, Туул голын эрэг дагуу аялал жуулчлалын зориулалтаар дөрвөн га газар эзэмшдэг “Зүүнбаян рефайнери” гэх компани Туул голын эргийн бургасыг үндсээр нь хядаж, эрэгт нь тулган 50 айлын таун хаус босгосон нь 2014 оноос дуулиан болж байлаа. Аялал жуулчлалын бааз байгуулна гэх нэрээр газар авсан “Зүүнбаян рефайнери” ингэж Туул голын бургасыг хядаж, эргийг нь сэндийчиж, элс хайргыг нь ухаж зайлуулсан нь байгаль орчны холбогдолтой бүхэл бүтэн зургаан хууль тогтоомжийг зөрчсөн ноцтой хэрэг үйлдсэн. Тэд таван жилийн хугацаанд иргэдийн ч, салбар яам, байгаль орчны байгууллагуудын ч шаардлагыг үйл хайхран, бургас хядаж, барилгаа барьсаар л байлаа.

Туул голын амийг таслахаар улайран дайрсан “Зүүнбаян рефайнери” нь  Шадар сайд С.Амарсайханы төрсөн ах С.Уламбаярын нэр дээр улсын бүртгэлийн санд бүртгэлтэй байдаг. Ах дүү нараараа нийлж, Туул голын эрэгт хууль бусаар хэдэн арван га газар эзэмшиж, бургасыг нь хядаж, барилгажуулж байгаагийн цаад эзэн нь С.Амарсайхан бөгөөд “Оюуны ундраа” группээрээ дамжуулан удирддаг гэх асуудал Саарал ордон хүртэл хүчээ авсан юм.

Шадар сайд С.Амарсайхан “Зүүнбаян рефайнери” ХХК-ийн тусгай зөвшөөрлийг цуцална, нөхөн сэргээлт хийлгэнэ, хууль бусаар барьсан барилгуудыг нь буулгана гэж сүр дуулиантай мэдэгдэж байснаас хойш хоёр жилийн хугацаа өнгөрлөө. Гэтэл С.Амарсайхан Шадар сайд болсноос өөрөөр өөрчлөгдсөн юм алга.