Говь-Алтай аймгийн Чандмань сумын иргэн болох 40 настай эрэгтэй Г, 21 настай эрэгтэй Б нар энэ сарын 25-ны өдрийн 11:00 цагийн үед Эрдэнэ сумаас Чандмань сум руу явган яваад нас барсан тухай бид мэдээлсэн. Талийгаач нар Чандмань сумаас дөрөвдүгээр сарын 23-нд гарч Эрдэнэ суманд очжээ. Буцахад нь хөл хорио тогтоож, гаргахгүй байсан учир явган явсан байна. Энэ талаар талийгаач Г-ийн дүүгээс тодрууллаа.

-Таны ах Г ямар ажлаар Эрдэнэ сум руу явсан юм бэ. Та мэдээлэл өгч болох уу?

-Дөрөвдүгээр сарын 23-нд Чандмань суманд том машинаар ачаа буусан юм. Тэгээд хэдэн төгрөг олох санаатай зарим ачааг нь ачаад Эрдэнэ сум руу хөдөлсөн. Гэхдээ яг сумын төв хүрэхгүй газарт ачаагаа буулгасан. Таван тонн гурил, хоёр тонн будаа хүргэхээр явсан юм. Буцаж ирэхэд цас орж, шуураад ийм аймшигтай хэрэг боллоо. Ах минь Улаанбаатар хотод эхнэр, хоёр хүүхдийн хамт амьдардаг байсан. Улаанбаатар хотод хөл хорио тогтоож, ажил нь зогссон учир сарын өмнө Чандмань суманд ирсэн. Суманд манай том машинаар ачаа зөөж, хэдэн төгрөг олох санаатай л ирсэн юм. Чандмань суманд төрж өсөөд, хотод суурьшсан гэсэн гэсэн үг.

-Талийгаач Б танай хамаатан уу. Туслахаар хамт явсан юм уу?

            -Ахыг ачаа ачаад гарах гэж байхад нь хамт явахаар болсон юм билээ. Б ачаа таваар буулгах, ачих ажилд тус болдог юм. Чандмань суманд ээжтэйгээ амьдардаг байсан. Туслахаар хамт яваад л өөд болчихлоо. Нүүр нүдгүй цасан дунд шөнөжингөө алхаад, ядарч, хөлс нь их гарч, хайрагдсан байна лээ.

-Талийгаач нар Эрдэнэ сумаас яагаад явган гарсан юм бэ?

            -Хөл хорио тогтоож, цасан шуургатай байна гээд Эрдэнэ сумын нутаг дэвсгэрээс гаргахгүй байсан юм билээ. Тэгээд ах айлын хүүхэд аваад явсан, дээрээс нь хөл хорио тогтоож, нааш, цааш явж чадахгүй болох нь гээд яараад л гарчихсан байх. Гэхдээ нарийн сайн мэдэхгүй байна.

-Эрдэнэ сумаас явган гарсан гэдгийг нь та нар мэдэж байсан уу?

-Тэд 11:00 цагийн үед гарсан байна лээ. 15:00 цагийн үед гарсан газраасаа таван километр алхаад даваан дээр ирчихсэн байна гээд утсаар ярьсан. Ах “Даваан дээрээс хурдан ирж ав. Урдаас машинтайгаа гар” гэж хэлсэн. Тэгэхээр нь “Машин явах аргагүй байна. Та одоо наанаасаа буц” гэж хэлсэн юм. Гэтэл “Одоо буцна гэж байхгүй. Даваан дор малчин Ш-ийнх байгаа гэнэ. Тэнд очоод байж байя. Тэндээс ирж аваарай” гэж хэлсэн. Тэр хоёр цаанаа “Одоохон уруудаад л очно” гэж ярьж байгаа нь сонсогдсон. Бид 16:00 цагийн үед Чандмань сумаас гарсан боловч нүүр нүдгүй цасан шуурга шуурч, явах аргагүй болоод буцсан.  Тэгээд 18:00 цагийн үед утас нь холбогдохгүй болохоор нь Онцгой байдлын газарт мэдэгдсэн. Өглөө нь цогцсыг нь олсон.

-Очно гэж хэлсэн малчин айлынхаас нь хэр зайтай олдсон бэ?

-Яг очно гэж хэлсэн малчин Ш-ийнхээс 2-3 километрийн зайтай цасан дунд өөд болчихсон байсан. Уг нь хажуухан талд нь өөр нэг малчин айлынх байсан юм билээ. Цасан дунд шөнө явсан болохоор сайн харагдаагүй байх. Малчин айлын үүдэнд шахуу 500-хан метрийн зайтай нас барсан байсан.

-Талийгаачийн эхнэр, хүүхдэд нь хэлсэн үү?

            -Тиймээ, хэл дуулгасан. Гэнэтийн зүйл болохоор бидэнд үнэхээр хэцүү байна. Эхнэртэй нь ярихаас халшраад ярьж чадахгүй байгаа. Удахгүй Улаанбаатар хотоос гарах байх.