Говь-Алтай аймгийн Алтай сумын Хилийн цэргийн 0214 дүгээр ангийн Баянтоорой заставын хугацаат цэргийн алба хаагчид дөрөвдүгээр сарын 8-ны 18:00 цагийн үед харуулын даргаа хөнөөгөөд зугтсан хэрэг гарсан. Тодруулбал, байлдагч Х, М нар харуулын манаанд явж ирээд, харуулын дарга Г-ийн цээжин тус газарт гурван удаа буудаж, амийг нь хөнөөсөн гэдэг. Тэд 47 ширхэг сумтай хоёр буу үүрээд, хилээс 15 орчим километр зайд байрлах Алтай сумын малчин М гэдэг айлаас мотоцикл авч уул руу зугтаасан юм. Байлдагч нарыг дөрөвдүгээр сарын 11-нд Алтай сумын Зөөлөн богд уулнаас баривчилсан билээ. Одоогийн байдлаар тэднийг Говь-Алтай аймагт цагдан хорьж, шалгалтын ажиллагааг үргэлжлүүлж байгаа.

Мөн байлдагч нар малчин н.Мөнхбатыг дарамталж, буу тулгаж, техник хэрэгслийг нь дээрэмдсэн гэх мэдээлэл гараад байгаа.

Энэ талаар малчин н.Мөнхбатаас тодруулахад “Тухайн өдөр байлдагч нар манайд явган ирсэн. Орж ирээд “Ах аа, бидэнд унаа хэрэгтэй байна” гэж хэлсэн. Би машин эвдэрсэн тул мотоцикл өгөөд явуулсан. Тэд маш их ядарсан, цангасан байдалтай ирсэн. Тэд биднийг дарамталж, сүрдүүлээгүй. “Ална, аминдаа хайртай бол унаа өг” гэж бидэнд хэлээгүй. Манай гэрт орж ирээд хоол унд идээд л хөдөлсөн. Мөн “Гүйж яваа морь, гэр рүүгээ явж байгаа эр хүнийг битгий зогсоо” гэж хэлсэн гэдэг нь ч худал. Яарч, сандарсан байдалтай орж ирээд, мотоцикл унаад л хөдөлсөн” гэлээ.