Төр нийгмийн нэр зүтгэлтэн С.Зоригийн амийг хөнөөсөн хэрэгт ял эдэлж буй Т.Чимгээ, Б.Содномдаржаа нарыг батлан даалтад суллах эсэх талаар Б.Содномдаржаагийн өмгөөлөгч Д.Оюунчимэгээс тодрууллаа.

Өмгөөлөгч Д.Оюунчимэг “Улсын Дээд шүүхийн Эрүүгийн хэргийн хяналтын шатны шүүхийн тогтоол өнгөрсөн долоо хоногт  албажиж, энэ сарын 26-нд оролцогчдод танилцуулна гэсэн. Олон нийтийн сүлжээгээр Б.Содномдаржаа, Т.Чимгээ хоёрыг батлан даалтад гаргах гэж байгаа тухай бичиж байна. Миний хувьд Улсын ерөнхий прокурорт хандаж,  “Хоёр удаа шинээр илэрсэн нөхцөл байдал гэсэн үндэслэлээр Б.Содномдаржаа, Т.Чимгээ нарт холбогдох Эрүүгийн хэргийг Улсын дээд шүүхэд хянуулах дүгнэлт гаргана уу” гэсэн хүсэлт гаргасан. Эхний хүсэлтэд Б.Хурц нарт холбогдох хэрэгт яллах дүгнэлт үйлдэж шүүхэд шилжүүлсэн тул хүлээж авах боломжгүй гэсэн хариу өгсөн. Дараагийн хүсэлтдээ нэгэнт илэрхий болсон нотлох баримтыг дахин нотлох шаардлагагүй, өөрөөр хэлбэл эрүү шүүлт тулгаж байгаа нотлох баримт нь нэгэнт ил тод болсон тул Эрүүгийн хэрэг хянан шийдвэрлэх тухай хуулийн 41.1 дүгээр зүйлийн 1.4 дэх хэсэгт заасан үндэслэлээр прокурорын дүгнэлт гаргана уу гэсэн.Хүсэлтийн хариуд боломжтой гэсэн хариу ирүүлсэн. Одоогоор прокурорын дүгнэлт гарсан эсэх талаар ямар нэг мэдээлэл байхгүй байна. Хяналтын шатны шүүхийн тогтоолыг оролцогчдод танилцуулж байгаа болохоор удахгүй прокурор дүгнэлт гаргаж Дээд шүүхэд хүргүүлэх байх гэж найдаж байна. Мөн Дээд шүүх дүгнэлтийг хүлээж аваад хэлэлцээсэй гэж хүсэж байна. Хэлэлцэхээр болбол цаг хугацаа орно. Прокурорын дүгнэлтийг хүлээж авангуутаа Б.Содномдаржаа, Т.Чимгээ хоёрыг шууд суллачихна гэж байхгүй. С.Зоригийн амийг хохироосон хэргийг Эрүүгийн хэргийн хяналтын шатны нийт шүүгчдийн  хуралдаанаар хэлэлцэж Б.Содномдаржаа, Т.Чимгээ нарыг шийтгэсэн тогтоолыг хүчингүй болгох эсэхийг шийдэх үед л тэр хоёр хүнийг суллах эсэх нь шийдэгдэнэ.Тэгэхээр цаг хугацаа орно гэсэн үг” гэлээ.