УИХ-ын гишүүн Б.Пүрэвдорж согтууруулах удааны зүйл хэрэглэсэн үедээ жолоо барьж, зам тээврийн ноцтой осол гаргасан талаар бид мэдээлсэн. Тэрбээр өчигдөр шөнө “Ниссан тиана” загварын автомашин жолоодож явахдаа тоёота приус-20 маркын автомашиныг шүргээд, замын хашлага давж, явган хүний зам руу орж, хашаа мөргөн зогссон байна. Ослын дараа автомашин урд хэсгээсээ шатаж эхэлсэн бөгөөд онцгой байдлын албанд дуудлага мэдээлэл өгчээ. Тус дуудлагын дагуу  Хан-Уул дүүргийн Онцгой байдлын хэлтсийн Гал түймэр унтраах, аврах 14 дүгээр ангийн алба хаагчид нэг км зам туулан 22:58 цагт очиж “Ниссан тиана” загварын суудлын автомашины хөдөлгүүрийн хэсэг шатаж байсныг таван минут ажиллаж унтраасан байна. Энэ талаар Цагдаагийн ерөнхий газрын Хэвлэл мэдээллийн төвийн дарга, хурандаа Б.Баатархүүгээс тодруулахад “Б.Пүрэвдорж гишүүн зам тээврийн осол гаргасан нь үнэн. Зам тээврийн осолтой холбоотой асуудлыг шалгаж байна” гэсэн юм.

Б.Пүрэвдорж гишүүн согтуугаар тээврийн хэрэгсэл жолоодсон учир осол гаргаж, хамар, завжнаас нь цус гарч, уруул нь сэтэрч эмнэлгийн яаралтай түргэн тусламжийн автомашинаар ГССҮТ рүү хүргэгдсэн гэх мэдээлэл бий.

Түүний согтолтын зэрэг нь 1.31 хувьтай гарсан байна. Иймд түүнийг Зөрчлийн тухай хуулийн 14.7-3.1 дэх хэсгийн "Согтууруулах ундаа, мансууруулах эм, сэтгэцэд нөлөөт бодис хэрэглэсэн үедээ тээврийн хэрэгсэл жолоодсон", 14.7-51-ийн "Жолооч замын хөдөлгөөний дүрэм зөрчиж бусдын эд хөрөнгөд хохирол учруулсан нь эрүүгийн хариуцлага хүлээлгэхээргүй бол хүнийг нэг зуун нэгжтэй тэнцэх хэмжээний төгрөгөөр торгоно" гэх хуулийн заалтаар шийтгэх боломжтой аж. Түүнд Зөрчлийн хэрэг нээж шалгаж байгаа гэнэ.