-ЭМЧ НАР ИРГЭДИЙН ШИНЖИЛГЭЭНИЙ ХАРИУГ ЗАСВАРЛАХ БҮРЭН БОЛОМЖТОЙ ГЭВ-

ХӨСҮТ-ийн Тандалт, судалгааны албаны сувилагч өөрийн хамаарал бүхий  хүнд PCR шинжилгээний хариуг хуурамчаар гаргаж өгсөн нь тогтоогдсон талаар ЦЕГ-ын Хэвлэл мэдээллийн төвийн дарга Б.Баатархүү өнгөрсөн гуравдугаар сарын 20-нд мэдээлсэн байдаг. Уг асуудлаар ХӨСҮТ-өөс цагдаагийн байгууллагад шалгуулах хүсэлт гаргаж, шалгалтаар шинжилгээ өгөөгүй хүнд хуурамч хариу гаргасан зэрэг зөрчил илрүүлсэн билээ. Тэгвэл эл хэрэгт ганцхан сувилагч бус, ХӨСҮТ-ийн 10 орчим эмч, ажилтан оролцож, бүлэглэл үүсгэснийг олж тогтоогоод байгаа аж.

ХӨСҮТ-ийн нэр бүхий ажилтнууд PCR шинжилгээний хариуг хуурамчаар үйлдэж, улмаар коронавирусийн халдвар нийслэлээс орон нутаг руу зөөвөрлөгдөн тархсан байж болзошгүй нөхцөл байдал үүсээд байна. Уг асуудлыг ТЕГ-ын ажилтнууд удаа дараагийн гүйцэтгэх ажиллагаагаар баримтжуулсан гэгдэж буй. Мөн өнгөрсөн баасан гарагт Тагнуул, Эрүүгийн цагдаагийн албаны Эдийн засгийн гэмт хэрэгтэй тэмцэх хэлтсийн алба хаагчид ХӨСҮТ-д нэгжлэг хийгээд байгаа.

       Шалгалтаар ХӨСҮТ-ийн хэчнээн ажилтан энэ хэрэгт холбогдсон, хэдэн төгрөг завшсан, хэдэн иргэний шинжилгээний хариуг хуурамчаар үйлдсэн гэдгийг тогтоох аж. Одоогийн байдлаар шалгалтын хариу гараагүй бөгөөд ХӨСҮТ-ийн нэр бүхий ажилтнуудаас тайлбар, мэдүүлэг авч байгаа гэнэ.Тэгвэл бид дараах эх сурвалжуудтай холбогдож, тайлбар авсан юм.

ТЕГ, ЦЕГ: Шалгагдаж байгаа хэрэг учраас мэдээлэл өгөхгүй

ЦЕГ-ын Хэвлэл мэдээллийн төвийн дарга, хурандаа Б.Баатархүү: “Тус хэргийг шалгаж байгаа нь үнэн. Гэхдээ тийм албан тушаалтай, төчнөөн хүн шалгаж байгаа гэх мэдээлэл алга. Тагнуултай хамтарсан шалгалт хийсэн учраас нарийн мэдээлэл өгөх боломжгүй байна” гэсэн юм.

Тагнуулын ерөнхий газрын Олон нийттэй харилцах хэлтсийн дарга Т.Баярхүү: “Бид энэ хэргийн талаар мэдээлэл өгөх болоогүй” гэв.  

Иргэдийн шинжилгээний хариуг хуурамчаар үйлдэж, их хэмжээний мөнгө хувьдаа завшсан байж болзошгүй эл хэрэгт ХӨСҮТ-ийн Вирус судлалын лабораторийн эрхлэгч Д, тус лабораторийн ажилтан О, О, Сүрьеэгийн тасгийн эрхлэгч Э тэргүүтэй 10 орчим хүн холбогдсон талаар зарим хэвлэл мэдээлээд байгаа.

Б.Дармаа: Би шинжилгээний хариу хуурамчаар үйлдээгүй

Тэгвэл эл хэрэгт нэр холбогдсон ХӨСҮТ-ийн Вирус судлалын лабораторийн эрхлэгч Б.Дармаагаас тодруулахад “Намайг хэн, хаанаас ч шалгаагүй. Надаас ганц ч удаа тайлбар, мэдүүлэг аваагүй. Шинжилгээний хариуг хуурамчаар үйлдсэн гэх хэрэгт би холбоогүй. Бид чинь өглөө 07:00 цагт ажилдаа ирээд, орой 21:00 цагт тардаг хүмүүс. Урдах ажлаа барахгүй байгаа бидэнд тэгж явах зав байхгүй. Энэ хэрэгт хэн, хэн нэр холбогдсоныг ч би мэдэхгүй байна” гэсэн билээ.

ХӨСҮТ-ийн 10 орчим эмч, ажилтан гуравдугаар сарын 4-нөөс эхлэн иргэдээс 60-80 мянган төгрөгөөр шинжилгээ авч, сөрөг гэх хариуг гаргаж өгсөн гэх. Түүнчлэн зарим тохиолдолд эмчээс ирсэн нэрсийг шинжилгээ өгсөн мэтээр бичиж, сөрөг хариу гаргадаг байсан хэмээн эх сурвалжууд дурдсан байдаг. Бүр тодруулбал, ХӨСҮТ-ийн эмч С нь  21260, М нь 18328 удаа, Н нь 8483 удаа эрүүл.гэрэгэ.мн системээр нэвтэрч, шинжилгээний хариу засварласан гэх мэдээлэл хэвлэл мэдээллийн хэрэгслээр цацагдаад байгаа.

Б.УУГАНБАЯР: Тийм олон хүний шинжилгээний хариуг өөрчлөх боломжгүй

Энэ талаар Эрүүл мэндийн яамны Хэвлэл мэдээлэл, олон нийттэй харилцах зөвлөх Б.Ууганбаяртай холбогдлоо. Тэрбээр “Эл хэргийг хууль, хяналтын байгууллага шалгаж байгаа. Бид хуулийн байгууллагын дүгнэлтийг хүлээж байна. Хэчнээн ажилтан шалгаж, хуурамчаар хэдэн шинжилгээний хариу гаргасныг бид мэдэхгүй байна. Энгийнээр бодоход олон хүний шинжилгээг хуурамчаар систем рүү оруулах боломжгүй. Гэрэгэ.мн систем хувийн компанийнх учир олон шинжилгээний хариуг өөрчилж оруулахад хянахгүй байна гэж байхгүй” гэлээ.

Б.БАТТӨР: Би шинжилгээний хариу өөрчилсөн гэх хэргийг мэдэхгүй

Харин ажилтнууд нь өргөсөн тангаргаасаа няцаж, улс эх орныхоо санаатай гэмт хэрэг үйлдсэн байж болзошгүй эл хэргийг ХӨСҮТ-ийн захирал Л.Баттөрөөс тодруулахад “Би шинжилгээний хариу өөрчилсөн гэх хэргийг мэдэхгүй. Хуулийн байгууллага хэчнээн хүн шалгаж байгааг ч мэдэхгүй” гэх тайлбар өглөө.

“ШИНЖИЛГЭЭНИЙ ХАРИУГ ШИВЭХ ЭРХ ЗӨВХӨН ХӨСҮТ БОЛОН НЭР БҮХИЙ ЛАБОРАТОРИЙН ЭМЧ НАРТ БАЙДАГ”

Шинжилгээний хариуг дураараа өөрчлөх, эерэг хариуг сөрөг болгож засах талбар болсон Гэрэгэ.мн системээс дараах мэдэгдэлийг гаргажээ. Тодруулбал, “Шинжилгээний хариуг шивэх, эрх зөвхөн ХӨСҮТ болон бусад лабораторийн эмч нарт байдаг. Шинжилгээний хариу буруу оруулсан, шинжилгээ өгсөн хүний нэр буруу шивсэн зэрэг тохиолдолд оруулсан мэдээллээ өөрчлөх тохиолдол бий. Систем дээр хийсэн бүх үйлдэл он, сар, өдөр тухайн хариуг шивсэн ПОС төхөөрөмжийн дугаар болон эмчийн мэдээлэл нэгдсэн санд бүртгэгддэг юм. Харин шинжилгээний хариу гаргах болон өөрчлөх үйлдэлд “Гэрэгэ систем” компани огт оролцдоггүй. Зөвхөн шинжилгээ хийсэн эмч хариуг системд оруулдаг. Коронавирусийн шинжилгээний бүртгэл болон тандалтын Эрүүл.мн системийн үйл ажиллагаа нь төрийн эрх бүхий байгууллагуудын нарийн хяналтад явагддаг” гэжээ. Мөн бид энэ асуудлаар уг компаниас тодруулга, мэдээлэл авах гэсэн боловч “Хуулийн байгууллагаас шалгалтын ажиллагаа явагдаж байгаа тул одоохондоо мэдээлэл өгөхгүй байхыг үүрэг болгосон” гэсэн хариу өгсөн юм.

Уг мэдэгдлээс харвал, эмч нар иргэдийн шинжилгээний хариуг бүрэн засварлах боломжтой аж. Чухам засвар оруулах бүрдээ шинжилгээний хариу өөрчилдөг байсан эсэх нь эргэлзээтэй байгаа ч хууль, хяналтын байгууллагынхан уг асуудлын хариуг удахгүй мэдээлэх биз ээ.