ХӨСҮТ-ийн нэр бүхий ажилтнууд  PCR шинжилгээний хариуг хуурамчаар үйлдэж, улмаар коронавирусийн халдвар нийслэлээс орон нутаг руу зөөвөрлөгдөн тархсан байж болзошгүй нөхцөл байдал үүссэн талаар бид өнгөрсөн гуравдугаар сарын 24-нд мэдээлсэн билээ. ХӨСҮТ-ийн эмч, ажилтнууд иргэдийн шинжилгээний хариуг хуурамчаар гаргаж өгөн зарахаас гадна өөр олон ноцтой зөрчил гаргасныг илрүүлжээ. Өчигдөр ТЕГ, Эрүүгийн цагдаагийн албаны Эдийн засгийн гэмт хэрэгтэй тэмцэх хэлтсийн алба хаагчид ХӨСҮТ-д ажиллаж, нэгжлэг хийсэн байна.

            Шалгалтаар ХӨСҮТ-ийн хэчнээн ажилтан энэ хэрэгт холбогдсон, хэдэн төгрөг завшсан, хэдэн иргэний шинжилгээний хариуг хуурамчаар үйлдсэн гэдгийг тогтоох аж. Одоогийн байдлаар шалгалтын хариу гараагүй бөгөөд ХӨСҮТ-ийн нэр бүхий ажилтнуудаас тайлбар, мэдүүлэг авч байгаа гэнэ. Улс орны эсрэг үйлдсэн гэмт хэрэг байж болзошгүй эл хэргийг тагнуул, цагдаагийн байгууллагаас шалгаж байна. Мөн энэ хэргээс гадна ХӨСҮТ-ийн албан тушаалтнууд цар тахлын үед хууль бусаар тендер зохион байгуулж, мөнгө завшсан байж болзошгүй хэргийг цагдаагийн байгууллага шалгаж, хэргийг АТГ руу шилжүүлжээ.

ХӨСҮТ-ийн 10 орчим эмч, ажилтан гуравдугаар сарын 4-нөөс эхлэн иргэдээс 60-80 мянган төгрөгөөр шинжилгээ авч, сөрөг гэх хариуг гаргаж өгчээ

            Иргэдийн шинжилгээний хариуг хуурамчаар үйлдэж, их хэмжээний мөнгө хувьдаа завшсан байж болзошгүй эл хэрэгт ХӨСҮТ-ийн Вирус судлалын лабораторийн эрхлэгч, ЭМЯ-ны лабораторийн ерөнхий мэргэжилтэн, анагаах ухааны доктор, клиникийн профессор Б.Дармаа тэргүүтэй 10 орчим хүн нэр холбогдоод байгаа гэдгийг зарим хэвлэл мэдээлж эхэллээ. Тодруулбал, ХӨСҮТ-ийн 10 орчим эмч, ажилтан гуравдугаар сарын 4-нөөс эхлэн иргэдээс 60-80 мянган төгрөгөөр шинжилгээ авч, сөрөг гэх хариуг гаргаж өгчээ. Түүнчлэн зарим тохиолдолд эмчээс ирсэн нэрсийг шинжилгээ өгсөн мэтээр бичиж, сөрөг хариу гаргадаг байсан гэнэ.

                    Эх сурвалжийн мэдээлж буйгаар “Энэ хэрэгт ганцхан сувилагч ч бус хууль бусаар шинжилгээний хариу гаргаж, дамлан зардаг бүлэглэл ХӨСҮТ-д бий болсон гэдэг нь илэрсэн. Олон оролцогчтой хэрэг юм билээ. ХӨСҮТ-д коронавирус илрүүлэх дөрвөн лаборатори байдаг. Үүний нэг нь шинжилгээний хариу хуурамчаар гаргаж, нэг тус бүрийг 60-80 мянган төгрөгөөр зардаг байсан нь нотлогдсон байх” гэв.

"Би "Гялс" төвийн захирлыг танихгүй"

Бид эл хэрэгт нэр холбогдоод байгаа ХӨСҮТ-ийн Вирус судлалын лабораторийн эрхлэгч, ЭМЯ-ны лабораторийн ерөнхий мэргэжилтэн, анагаах ухааны доктор, клиникийн профессор Б.Дармаатай холбогдож, зарим зүйлийг тодрууллаа.

            -Таныг коронавирусийн шинжилгээг хуурамчаар үйлдэж, сөрөг гэх хариуг зардаг байсан гэх мэдээлэл бий. Энэ талаар та тайлбар өгөхгүй юу?

-Би энэ талаар сайн мэдэхгүй байна. Ийм мэдээлэл гарсанд үнэхээр их гайхаж байгаа. Бид чинь өглөө 07:00 цагт ажилдаа ирээд, орой 21:00 цагт тардаг хүмүүс. Урдах ажлаа барахгүй байгаа бидэнд тэгж явах зав байхгүй.

-Таныг тагнуул болон цагдаагийн газраас шалгаж байгаа гэсэн шүү дээ?

-Намайг хэн, хаанаас ч шалгаагүй. Надаас ганц ч удаа тайлбар, мэдүүлэг аваагүй. Шинжилгээний хариуг хуурамчаар үйлдсэн гэх хэрэгт би холбоогүй. Холбоогүй учраас намайг шалгахгүй байгаа шүү дээ. Ийм мэдээлэл гарсанд харамсаж, шүүхэд ханддаг юм уу гэж бодож байна. Би одоо ажлаа хийгээд, хүний шинжилгээний хариу гаргах гээд сууж байна.

-Таныг өөрийн найз “Гялс” төвийн захиралтай хувилдаж, олон хүнтэй аж ахуйн нэгжээс төлбөртэй шинжилгээ авсан гэсэн?

-Энэ бол оргүй худлаа мэдээлэл байна. Би тэгж шинжилгээ авсан удаа байхгүй.

-Та “Гялс” төвийн захирлыг танихгүй гэж үү?

-Би тийм хүн танихгүй.

-Таны нэртэй, баримт гарч ирсэн байна лээ?

-Ямар ч баримт байхгүй. Цагаан цаасан дээр хараар бичсэнийг баримт гэж үзэхгүй биз дээ. Тэрийг хэн ч бичиж чадах байлгүй дээ.

-Тэгвэл танай тасгийн хоёр эмчийг шалгаж байгаа юм билээ. Та тэр хоёрыг хуурамч шинжилгээний хариу гаргаж байхад мэдээгүй гэж үү. Та нягталж, шалгах ёстой байх аа?

-Би өөрөөсөө өөр хүнийг мэдэхгүй.