Засгийн газрын шийдвэрийн дагуу энэ сарын 10-25-ныг хүртэл хатуу хөл хорио тогтоогоод байгаа билээ. Тэгвэл өчигдөр загвар өмсөгч Ээгий буюу С.Эрдэнэцогт өөрийн цахим хаягтаа “Цагдаа найзтай байх ийм сайхан” хэмээн цагдаагийн алба хаагчаар жолоогоо бариулан яваа бичлэгээ нийтэлсэн нь шүүмжлэл дагуулаад байна.

Хөл хорионы хугацаанд зөвшөөрөгдсөн 15 чиглэлийн ажилтнууд ажиллаж байгаа билээ. Мөн цагдаагийн албан хаагчид хамгаалалтад гарч ажиллаж байгаа. Тэгвэл албан үүргээ гүйцэтгэх ёстой цагдаагийн алба хаагч загвар өмсөгчийн жолооч хийж яваа хэргийг цагдаагийн байгууллагаас шалгаж байна гэнэ.

Энэ талаар ЦЕГ-ын Хэвлэл мэдээллийн төвийн дарга Б.Баатархүүгээс тодруулахад “Хөл хорионы үеэр загвар өмсөгч С.Эрдэнэцогтод үйлчилсэн цагдаагийн алба хаагчид хариуцлага тооцно. Одоогийн байдлаар ямар хариуцлага тооцсон талаар мэдээлэл аваагүй учир хэлэх боломжгүй байна” гэв. Харин эх сурвалжийн мэдээлснээр тус алба хаагчийг алба тушаал буруулж байгаа гэх мэдээлэл бий.  

Өөрөөс нь болж цагдаагийн алба хаагч албан тушаал буурч, хариуцлага тооцуулсан талаар хэлж,  зарим зүйлийг С.Эрдэнэцогтоос тодруулахад “Би цагдаагийн байгууллагад цагдаа найзтайгаа хамт мэдүүлэг өгч байна (Өчигдрийн 16:30 цагийн үед). Манай найзыг тушаал буруулсан гэж битгийн худлаа хэлж, ш..г..д байгаарай. Би хэнд ч мэдээлэл өгөхгүй, з..л” зэргээр хараалын үг урсгаж, бухимдав.

Ташрамд дурдахад, загвар өмсөгч С.Эрдэнэцогтийн найз бүсгүй Г.Г сошиал хаягтаа найз залуудаа зодуулсан гэх нотлох баримтууд дэлгэж, шуугиан тарьж байсан цаг саяхан. С.Эрдэнэцогтыг гэр бүлийн маргааны улмаас Зөрчлийн хуулиар торгож, “Баривчлах байр”-нд 15 хоног саатуулсан билээ. Модель залуу баривчилгаанд явсан талаараа “UB Сomеdу” залуусын нэвтрүүлэгт оролцохдоо ярьсан байдаг. Тэрбээр “Би Зөрчлийн хуулиас болж хэд хоног хоригдсон. Би гэхдээ төлбөртэй өрөөнд байсан. Төлбөртэй өрөө гэж байдаг юм билээ. Төлбөртэй өрөөнд орсон тохиолдолд ариун цэврийн өрөө орох зэрэг асуудалгүй. Харин нийтийн өрөөнд байгаа тохиолдолд ариун цэврийн өрөө рүү цагаар ордог. Үүнээс болж нэг хүн өмдөндөө бие засаж байлаа. Тэгээд уурандаа гэртээ очоод, эхнэрээ хөнөөчихсөн” зэрэг зүйлийг ярьж, олны дургүйцлийг хүргээд удаагүй байгаа билээ.