-Э.ЭНХБАТ ЦООЖТОЙ ХААЛГЫГ ОНГОЙЛГОЖ ЧАДААГҮЙГЭЭС БОЛЖ Н.ТҮВШИНБАЯРТ ВИСКИНЫ ШИЛЭЭР ЦОХИУЛЖ, ДУХ, ДАГЗ НЬ ЦӨМӨРСӨН ҮҮ-

         Улсын начин Э.Энхбат тархиндаа маш хүнд бэртэл авсан бөгөөд “Гэмтлээ даваад гараасай” гэж найдахаас өөр аргагүй болоод цөөнгүй хонож байгаа билээ. Тэр Гэмтлийн эмнэлгийн Эрчимт эмчилгээний тасагт олон хоног ухаангүй байна. Эмчлэгч эмч нар нь “Түүний унтуулах тариаг зогсоочихвол шинэ харвалт өгчих гээд байгаа болохоор ямар нэгэн эмчилгээ дур мэдэн хийж чадахгүй байна” гэсэн удаатай. Түүнчлэн тархинд нь хүчтэй цохилтын улмаас үүссэн хуралдсан цус шимэгдэж магадгүй гээд эмч нар ямар нэг эмчилгээ хийлгүй хүлээгээд байгаа гэдгийг эх сурвалжууд хэлж байна.

         Харин ар гэрийнхэн нь гадаадын өндөр хөгжилтэй орнуудын эмнэлгүүдэд Э.Энхбатын тархины томографикийн зураг тэргүүтэй эмчийн өвчний талаарх дүгнэлтүүдийг өнгөрсөн долоо хоногоос эхлэн явуулаад байгаа юм. БНСУ-ын нэгэн эмнэлэг “Эмчилгээ хийх боломжтой. Монгол төгрөгөөр 500 орчим сая төгрөг болно” гэсэн хариу өгсөн бололтой. Ар гэрийнхэн нь бөхчүүдээс тусламж хүсч, хандив цуглуулаад эхэлжээ. Гэхдээ ГССҮТ-ийн эмч нар “Онгоцоор явах, өөр бусад явдлын ая даахгүй. Замдаа янз бүр болчихож мэднэ шүү. Яарч хөдөлгөөн хийх дэмий. Ер нь найдвар байхгүй байгаа. Сэтгэл санааны бэлтгэлтэй байгаарай” гэж ар гэрийнхэнд нэг бус удаа хэлсэн тухай начны гэр бүлийн хүн хэвлэл мэдээллийн хэрэгслээр удаа дараа ярьсан билээ.

ГЭРЧҮҮДЭЭС МЭДҮҮЛЭГ АВЧ, ХЯНАЛТЫН КАМЕРЫН БИЧЛЭГЭЭР НОТЛОХ БАРИМТЫГ БАТАЛГААЖУУЛЖЭЭ

         Хар багын найзыгаа зодож, хүнд бэртэл, гэмтэл учруулсан олимпын алт, мөнгөн медальт, Хөдөлмөрийн баатар Н.Түвшинбаяр Цагдан хорих 461 дүгээр хорих ангид 30 хоногийн хугацаатай саатуулагдаад байгаа. Тэрбээр хорих ангийн алба хаагчдаас өвчин намдаах эм өгөхийг нэг удаа хүссэн байна. Хэргийг Хан-Уул дүүргийн цагдаагийн нэгдүгээр хэлтсээс үргэлжлүүлэн шалгаж байгаа юм. Н.Түвшинбаярыг бусдын биед санаатайгаар хүнд бэртэл гэмтэл учруулсан хэргээр эрүүгийн хуулийн 11 дүгээр зүйл ангийн 1. 2 т зааснаар шалгаж байгаа юм. Хэрэв гэм буруутай нь тогтоогдвол 40 сая төгрөгөөр торгуулах, эсвэл 2-8 жилийн хорих ялаар шийтгүүлнэ хэмээн заасан байдаг. 

          Албаны эх сурвалж “Н.Түвшинбаяр, Э.Энхбат нар хэрэг гардаг өдөр хэн хэнтэй уулзсан. Ямар зүйлс ярьж явсан. Зодооны асуудал юунаас болж өрнөсөн зэргийг шалгаж тогтоохоор ажиллаж байна. Мөн гэрчүүдээс хэргийн талаар тодорхой мэдүүлэг авч дуусаад байна” гэсэн юм.  

ЦООЖТОЙ ХААЛГАНЫ ЦААНА Н.ТҮВШИНБАЯР, Э.ЭНХБАТ НАР ГОЛЫНХОО ДУУГААР ХАШХИРЧ, ЭД ЗҮЙЛС ХЭМХЭЛЖ БАЙГАА ЮМ ШИГ ЧИМЭЭ ГАРГАЖ БАЙСАН ГЭНЭ

             Энэ сарын 2-ны өдөр Н.Түвшинбаяр, Э.Энхбат нар Сүхбаатар дүүргийн нутаг дэвсгэрт байх “Шангрила” зочид буудлын рестораны тусгай өрөөнд Булган аймгийн Засаг дарга Б.Ариун-Эрдэнэ, ИТХ-ийн дарга Д.Эрдэнэбат, аймгийн ИТХ Г.Ганбаатар, С.Гал-Эрдэнэ, Засаг даргын зөвлөх Х.Соёомбоо, МҮХАҮТ-ын Ерөнхийлөгч О.Амартүвшин, Монгол Улсын арслан Х.Мөнхбаатар, Булган аймгийн Ардчилсан эмэгтэйчүүдийн холбооны ерөнхийлөгч Х.Ундрах, найз Г.Золбоо нартай уулзсан байдаг. Тэд хоол захиалж идэхээс гадна согтууруулах ундаа ууцгаасан байна. Ингээд Н.Түвшинбаяр өөрийн ажил болох Монголын үндэсний олимпын хорооны байр руу сэтгүүлчид ярилцлага өгөхөөр түрүүлээд явсан аж.

    Харин Булган аймгийн ИТХ-ийн дарга Д.Эрдэнэбат, начин Э.Энхбат, ИТХ-ын төлөөлөгч С.Гал-Эрдэнэ тэргүүт нэр бүхий хүмүүс Хан-Уул дүүргийн нутаг дэвсгэрт байрлах С.Гал-Эрдэнийн компанийн байр руу очицгоожээ. Өөрөөр хэлбэл, өдрөөс эхэлж архидсан хүмүүс С.Гал-Эрдэнийн өрөөнд үргэлжлүүлэн уусан байна. Ингээд начин Э.Энхбат Н.Түвшинбаяр руу утасдаж дуудсан бололтой. Согтуу, хөлчүү хүмүүс бие биедээ үг чулуудаж, өмнөх барилдаануудын найрааны өгөө аваанаас эхлээд “Эрдэнэт” үйлдвэрийн тендерт бараа материал нийлүүлсэн зэрэг асуудлууд ч яригдсан байна. Үүнээс үүдэн Булган аймгийн ИТХ-ын дарга Д.Эрдэнэбат олимпын аваргад Э.Энхбатын талаар таагүй зүйлс ярьж, өдөөн турхирч, зодооны эхлэлийг тавьсан гэх мэдээлэл бий.

         Зодоон эхлэхийн өмнөхөн олимпын аваргатай ирсэн Г гэх эмэгтэй тэндээс гараад явсан байна. Түүний дараа Н.Түвшинбаяр, Э.Энхбат нарын дунд яс хаяж зодолдуулсан гэгдээд байгаа Булган аймгийн ИТХ-ын дарга Д.Эрдэнэбат гарчээ. Тэрбээр цахилгаан шатанд суухаасаа өмнө хана түшиж, хэсэг зогсож байгаад гуйвж дайван явсан нь камерийн бичлэгт үлджээ. Түүний араас С.Гал-Эрдэнэ ч мөн гарсан байна. Ингэхдээ өрөөнийхөө хаалгыг хааж байгаа нь камерт мөн бичигдсэн байгаа аж. Ингээд дотор Н.Түвшинбаяр, Э.Энхбат нар үлдсэн байна. Хэсэг хугацааны даргаа олимпын аваргатай хамт орж ирсэн Г гэх эмэгтэй эргэж орж ирсэн боловч, тэдний байгаа өрөө рүү орж чадаагүй байна. Тэрбээр хэргийг шалгаж байгаа цагдаа нарт “Би гар утсаа мартчихаад эргэж орсон. Гэтэл өрөөн дотор хүмүүс зодолдож, орилж хашхирч байгаа дуу чимээ гарсан. “Хаалгаа онгойлго. Юу болоод байгаа юм бэ” гэж хашхирсан боловч хаалга онгойлгож өгөөгүй. Тиймээс тусламж дуудсан” гэх утга бүхий мэдүүлэг өгчээ. Хэрэг явдал цааш үргэлжилж, Н.Түвшинбаярын жолооч нар нийлж хаалгыг нь эвдэж орсон байна. Мөн удалгүй Нийслэлийн шуурхай удирдлагын төвд ирсэн гомдлын дагуу Хан-Уул дүүргийн цагдаагийн нэгдүгээр хэлтсийн алба хаагчид ирцгээсэн байна. Зодооны талаар Н.Түвшинбаяр “Яг юу болсон. Яагаад зодоон болсон бэ гэдгийг санахгүй байна” гэх утга бүхий тайлбар өгчээ.

ЗОДООНЫ ГОЛ ЗАНГИЛАА Д.ЭРДЭНЭБАТ, С.ГАЛ-ЭРДЭНЭ НАРТ БАЙНА УУ

    Хэргийг шалгаж байгаа цагдаа нар “Н.Түвшинбаяр, Э.Энхбат нарын дунд яс хаяж зодолдуулсан байж болзошгүй гэгдээд байгаа Булган аймгийн ИТХ-ын дарга Д.Эрдэнэбатыг шалгаж байна. Мөн өөрийнхөө компанийн байран дээр архидалт зохион байгуулсан, хоорондоо муудалцсан хүмүүсийг өрөөндөө орхиод явсан С.Гал-Эрдэнийг ч шалгаж эхэлсэн. Хэрэв тэр хоёрыг үлдээлгүй аваад гарсан бол зодоон болохгүй байсан. Зодоон болсон ч салгаж, нэгнийгээ хүнд бэртээхгүй байх боломж байсан. Мөн кодоор онгойлгодог хаалгатай байсан учраас Э.Энхбат зодоон эхлэх үеэр хаалга онгойлгож чадаагүй. Тиймээс Н.Түвшинбаярт тийм болтлоо зодуулсан байж болзошгүй байгаа” гэсэн юм. Өөрөөр хэлбэл, С.Гал-Эрдэнийг өрөөгөө санаатайгаар цоожилсон уу, үгүй юү гэдгийг шалгаж байгаа аж. Гэхдээ Д.Эрдэнэбат, С.Гал-Эрдэнэ нар өөрсдийгөө өмгөөлж, хамгаалсан, зодооны хэрэгт ямар ч хамааралгүй гэх утга бүхий мэдүүлэг өгч байгаа гэх. Хэргийг үргэлжлүүлэн шалгаж байна.