Булган аймаг, Сэлэнгэ сум Сэлэнгэ мөрөн. Дөрвөн настай хүүгийн тоглосон байж болзошгүй голын эрэг. 2020.03.23

Сэлэнгэ мөрний эрэг дээр тоглож байгаад алга болсон хүүг одоо хүртэл олоогүй байна. Тодруулбал, Булган аймгийн Сэлэнгэ сумын Таримал багийн I гудамжинд оршин суудаг дөрвөн настай, эрэгтэй Э өнгөрсөн 2020 оны гуравдугаар сарын 22-ны 16:00 цагийн орчимд гэрээсээ гараад алга болсон байдаг. Тэрбээр Сэлэнгэ мөрөнд осолдсон байж болзошгүй хэмээн тухайн үед мэдээлж байсан юм.

Хүүг алга болсон тухай дуудлагыг тухайн өдрийн 22:55 цагт аймгийн Онцгой байдлын газар хүлээн авч байжээ. Дуудлагын дагуу аймгийн Онцгой байдлын газрын таван алба хаагч нэг нохой, нэг автомашинтай, тус сумын Засаг даргын орлогчоор ахлуулсан 64 иргэн, ар гэрийн хоёр хүн, нийт 71 хүн эрлийн ажиллагааг эхлүүлжээ байсан юм. Энэ талаар Булган аймгийн Сэлэнгэ сумын албаны хүнээс тодруулахад “Алга болдог хүүгийн гэр Сэлэнгэ мөрнөөс 150 метрийн зайтай байдаг. Таван хүүтэй айлын хамгийн бага хүү нь алга болсон. Тухайн өдөр аав, ээж нь гэрээсээ холгүйхэн айлд очих үеэр хүү нь алга болсон юм билээ. Ах нар нь гэртээ зурагт үзээд сууж байх хойгуур ганцаараа гараад явсан гэсэн. Гэхдээ яг хүүг гол руу явсан эсэхийг харсан хүн байхгүй. Гэрийнх нь хойд талын голын эрэг хавиар самналт хийгээд, олдохгүй арга мухардаж эрлийн ажиллагааг зогсоосон. Усчин аврагч нар хэд хэдэн удаагийн шумбалт хийсэн ч үр дүнд хүрээгүй. Мөс цөмлөх ажиллагаа хийсэн ч мөн үр дүн гараагүй. Хүү очсон байж болзошгүй Сэлэнгэ мөрнийг бүхэлд нь самнасан” гэлээ.

Хүүгийн ар гэрийнхэн хүүгээ алга болсноос хойш хайгаагүй газар байхгүй гэнэ. Тэд Сэлэнгэ мөрний эргийг бүхэлд нь самнаж, арга буюу эрлийн ажиллагааг зогсоох хүсэлт гаргаж байжээ. Мөн тэд хүүгээ алга болсноос хойш гурван сарын дараа Булган аймгийн Бугат сум руу нүүжээ.

Харин сумын иргэдийн хэлж буйгаар хүү гэрээсээ гараад голын эрэг дээр очсон нь үнэн гэнэ.  Учир нь, хүү гэрийнхээ ойролцоох Сэлэнгэ мөрний эрэг дээр мод зоож, элс, хайргаар байшин бариад үлдээсэн байсан гэдэг. Мөн тухайн үед хүүтэй хамт өөрийнх нь насны найз нь явж байсан гэх мэдээлэл бий. Тэрбээр “Найз маань энэ мөс рүү орчихлоо” гэж хэлж дуулгаснаар хүүг Сэлэнгэ мөрөнд осолдсон байж болзошгүй гэж таамаглаад байгаа гэнэ.  

Хүү гэрээсээ гарч, сураггүй алга болоод нэг жил боллоо. Одоо хүртэл хүүгийн сураг гараагүй бөгөөд цогцос нь ч олдоогүй байна. Хоёр ч удаа цөн түрж, гол мөрөн гэсэж байхад Сэлэнгэ мөрөнд осолдсон байж болзошгүй гэх хүүгийн цогцос одоо хүртэл олдохгүй байгаад нутгийнхан ихэд гайхацгааж байгаа аж.