Засгийн газрын Хэрэг эрхлэх газрын тушаалаар энэ оны нэгдүгээр сарын 29-нөөс хойш зарлагдсан тендерүүдийг танилцуулж байна. Хэрэг эрхлэх газрын дарга Ц.Нямдоржийг томилогдсоноос хойш цэвэрлэгээний материал, цайны ханд, автомашины дугуй авах тэргүүтэй 2.5 орчим тэрбум төгрөгийн тендер зарлажээ.   

Хот, хөдөө, орон нутагт үйлчилгээ үзүүлэх автомашинд шатахуун нийлүүлэх 995.638.700 төгрөгийн тендер зарлажээ

Засгийн газрын авто баазаас хөдөө, орон нутагт үйлчилгээ үзүүлэх автомашинд шатахуун нийлүүлэх 257.612.400 төгрөгийн тендерийг нэгдүгээр сарын 29-нд зарлажээ. Тендерт оролцох хугацаа нь гуравдугаар сарын 1-ний 09:30 цаг хүртэл байсан аж. Тендерийг нээлттэй зарласан бөгөөд санхүүжүүлтийн эх үүсвэр нь Засгийн газрын Хэрэг эрхлэх газар байжээ.

Мөн нэгдүгээр сарын 29-ны өдөр Засгийн газрын авто баазаас хот дотор үйлчилгээ үзүүлэх автомашинд шатахуун нийлүүлэх 738.026.300 тендер зарласан байна. Тендерийг нээлттэй зарласан бөгөөд санхүүжүүлтийн эх үүсвэр нь мөн адил аж.

91.5 сая төгрөгөөр автомашины дугуй худалдаж авна

Хоёрдугаар сарын 3-ны өдөр Засгийн газрын авто баазаас автомашины дугуй худалдан авах 91.530 төгрөгийн нээлттэй тендер зарлажээ. Тодруулбал, жижиг машины дугуй 45 сая төгрөг, том оврын автомашины дугуй 46.3 сая төгрөг байхаар төсөвлөсөн байна. Мөн эл тендерийг Засгийн газрын авто баазын хөрөнгөөр санхүүжүүлсэн аж. Тендерт оролцох хугацаа нь гуравдугаар сарын 5-ний 10:30 цаг хүртэл байжээ.

Спорт заалны дээврийг 39 сая төгрөгөөр засварлана

Засгийн газрын байруудын нийтлэг үйлчилгээний газраас өөрийн хөрөнгөөр Засгийн газрын II байрын спорт заалны дээврийг 39 сая төгрөгөөр засварлах нээлттэй тендерийг хоёрдугаар сарын 3-нд зарлажээ. Тендерт оролцох хүсэлт авах хугацаа нь гуравдугаар сарын 1 хүртэл байжээ.

Ариун цэврийн өрөөг засварлахад 41 сая төгрөг төсөвлөжээ

Засгийн газрын XI байрны 206 тоот, мөн тус байрны ариун цэврийн өрөөнүүдийг тусгаарлан хуваан засварлахад Засгийн газрын байруудын нийтлэг үйлчилгээний газраас 41 сая төгрөг төсөвлөжээ. Ингэхдээ эл засварыг өөрийн хөрөнгөөр хийх тухай тусгасан байна. Тендерт оролцох хүсэлт авах хугацаа нь гуравдугаар сарын 1-нд дуусжээ.  

Засгийн газрын авто баазын автомашинуудыг 86.6 сая төгрөгөөр даатгалд хамруулна

Засгийн газрын авто баазаас баазын автомашинуудыг 86.6 сая төгрөгөөр даатгалд хамруулах нээлттэй тендерийг өнгөрсөн хоёрдугаар сарын 4-нд зарлажээ. Тендерт оролцох хүсэлт авах хугацаа нь гуравдугаар сарын 9 хүртэл байсан аж. Санхүүжилтийн эх үүсвэр нь өөрийн хөрөнгө хэмээн тендерийн урилгатаа дурджээ.

Мөн Засгийн газрын авто баазаас автомашины тос, масло худалдан авахад 25 сая төгрөг төсөвлөж, нээлттэй тендер зарласан байна. Тендерт оролцох хугацаа дөрөвдүгээр сарын 5-наар дуусгавар болжээ.

Төрийн бодлогын баримт бичгүүдийг 145 сая төгрөгөөр хэвлүүлнэ

Засгийн газрын Хэрэг эрхлэх газраас улсын төсөвийн 145 сая төгрөгөөр Төрийн бодлогын баримт бичгүүдийг хэвлүүлэх нээлттэй тендер зарлажээ. Тодруулбал, урт хугацааны хөгжлийн бодлогын баримт бичгийг хэвлэхэд 100 сая, дунд болон богино хугацааны хөгжлийн бодлогын баримт бичгийг хэвлэхэд 45 сая төгрөгийг нь зарцуулах гэнэ. Тендерт оролцохын тулд эргэж төлөгдөхгүй нөхцөлтэйгээр  50000 төгрөг, эсхүл түүнтэй тэнцэх хэмжээний чөлөөтэй хөрвөх валютаар цахим тендерийн хураамжийг дөрөвдүгээр сарын 5-наас өмнө төлж, тендерт оролцох боломжтой.

325 сая төгрөгөөр цэвэрлэгээний материал, цайны ханд авна

Засгийн газрын байруудын нийтлэг үйлчилгээний газраас цэвэрлэгээ болон цайны нормын материал, цэвэрлэгээний багаж хэрэгсэлийг өөрийн хөрөнгөөр худалдан авах 325 сая төгрөгийн нээлттэй тендер зарлажээ. Тендерт оролцох хугацаа нь гуравдугаар сарын 12-ноос дөрөвдүгээр сарын 12 хүртэл аж. Өөрөөр хэлбэл, цайны ханд, цэвэрлэгээний материал авахад зориулагдсан тендер нь гурван хоногийн дараа дуусах юм байна. Тендерт оролцохын тулд 50000 төгрөг төлөх бөгөөд өнгөрсөн хоёр жилийн хугацаанд санал болгож буй үнийн дүнгийн 40 хувиас багагүй үнийн дүнтэй ижил төстэй ажлыг гүйцэтгэсэн байх шаардлагатай.

396 сая төгрөгөөр  сантехник, цахилгааны урсгал засвар хийнэ

Мөн эл газраас барилга, мужаан, сантехник, цахилгааны урсгал засварын материал худалдан авах 396 сая төгрөгийн нээлттэй тендер өнгөрсөн гуравдугаар сарын 26-нд зарласан байна. Тодруулбал, цахилгаан хангамжийн материалд 200 сая, сантехникийн материалд 100 сая, мужаан, барилга засварын материалд 50 сая, гал, хөдөлмөрийн аюулгүй байдлын анхан шатны материал авахад 46 сая төгрөг төсөвлөжээ. Тендерт оролцох хүсэлт хүлээж авах хугацаа дөрөвдүгээр сарын 26 бөгөөд 16 хоногийн дараа дуусна.

Саравч засах 50 сая төгрөгийн нээлттэй тендер зарлажээ

Засгийн газрын Хэрэг эрхлэх газрын харьяа Радио телевизийн үндэсний сүлжээнээс ТТС-ын барилгын дээврийн засвар хийх, үүдний хэсгийн хаалганы саравчийг засах 50 сая төгрөгийн нээлттэй тендер зарлажээ. Тендерт оролцох хугацаа дөрөвдүгээр сарын 6-нд дуусгавар болсон байна.

Мөл эл газраас усны хаялага болон муудсан дээврийн засварыг 50 сая төгрөгийг Засгийн газрын Хэрэг эрхлэх газрын төсөвөөр хийхээр төлөвлөжээ.

Инженерийн шугам сүлжээний хэсэгчилсэн засварт 100 сая төгрөг төсөвлөжээ

ЗГБНҮГ-ын харьяа Засгийн газрын байруудын инженерийн шугам сүлжээний хэсэгчилсэн засвар, шинэчлэлт хийхэд 100 сая төгрөг төсөвлөжээ. Тендерт оролцох хүсэлтийг дөрөвдүгээр сарын 21-нийг хүртэл хүлээж авах аж. Ороцогчид тендерийн хамт хоёр сая төгрөгийн дүнтэй тендерийн баталгаа ирүүлэх тухай журамд заажээ.

Програм худалдаж авах 36.3 сая төгрөгийн тендер

Үндэсний хөгжлийн газар нь сонгогдсон эрх бүхий тендерт оролцогчдоос байгууллагын үйлчилгээг цахимжуулах цогц програм худалдаж авах, гүйцэтгэх үнийг саналыг дөрөвдүгээр сарын 14-нийг хүртэл хүлээж авах аж. Өөрөөр хэлбэл, улсын 36.3 сая төгрөгөөр байгууллагын үйлчилгээг цахимжуулах цогц програм худалдаж авах тендер зарласан байна.

Албан тасалгааны өрөөнүүдэд 75 сая урсгал засвар хийнэ

Засгийн газрын байруудын албан тасалгааны өрөөнүүдэд урсгал засвар, тохижилтын ажил хийх 75 сая төгрөгийн төсөвтэй тендер зарлажээ. Эл тендерийг Засгийн газрын байруудын нийтлэг үйлчилгээний газраас зарласан бөгөөд дөрөвдүгээр сарын 15-нийг хүртэл оролцогчдийн хүсэлтийг хүлээж авах аж.

Ташрамд дурдахад, 2021 онд Ц.Нямдорж даргыг томилогдохоос өмнө ганц ч тендер зарлагдаагүй аж.