Архангай аймгийн Жаргалант сумын иргэн В дөрөвдүгээр сарын 2-нд сумынхаа эмнэлэгт эрүүл саруул амаржжээ. Тэрбээр хоёр хүүхэдтэй бөгөөд гурав дахь төрөлт нь энэ байсан гэнэ. Харамсалтай нь, хүүхдээ төрүүлсэн шөнөө бие нь муудаж, их хэмжээний цус алдсанаас болж амиа алджээ.

         Талийгаач В сумынхаа эмнэлэгт амаржихаар хэд хоногийн өмнө хөдөө гэрээсээ иржээ. Тэрээр нөхөр хоёр хүүхдийн хамт Жаргалант сумын Зуслан багт амьдардаг байсан байна. Дөрөвдүгээр сарын 2-ны 19:00 цагийн орчимд хүндрэлгүй төрж, хүүтэй болсон гэнэ. Харин түүнийг эх барьж авсан эмч нь ихэсийг нь дутуу авснаас болж, дотуур цус алдаж, амиа алдсан гэдгийг эх сурвалж мэдээллээ.

Энэ талаар бид талийгаачийн хамаатан Б-ээс тодруулахад “Талийгаач В нь 1990 онд төрсөн. Өмнө нь хоёр удаа төрөхдөө хүндрэлгүй төрж байсан юм билээ. Давтан төрөлт байсан учраас сумынхаа эмнэлэгт төрөхөөр хөдөө гэрээсээ ирсэн гэсэн. Хяналтдаа хамрагдаж, төрөхийн хожуу үеийн хордлого өгөөгүй учраас суманд төрөхөөр төлөвлөсөн байх. Хэн ийм аймшигтай хэрэг болно гэж санах билээ. Хүндрэлгүй төрж, төрснийхөө дараа гэнэт цус алдаж, бие нь муудсан гэсэн. Эмнэлгийнхэн манай хамаатны хүүхдийг дуудаж, “Цус алдаад байна. Яаралтай эм, тариа аваад ир” гээд эмийн сан явуулсан байна лээ. Манай суманд эмийн сан 24 цагаар ажилладаггүй болохоор эмзүйчийг гэрээс нь авч, эм, тариагаа авсан гэсэн. Тэгээд захисан эм, тариаг нь аваад очиход талийгаач хэдийнэ өнгөрчихсөн байсан гэнэ лээ. Нөхөр нь тухайн үед гэртээ, хоёр хүүхэдтэйгээ малаа хараад үлдсэн юм билээ. Хөдөө гэр нь сүлжээгүй болохоор нөхөр рүүгээ холбоо бариагүй гэсэн” гэв.

Талийгаачийн нярай хүү сумын эмнэлэгт байгаа аж. Хүүг төрсний дараа ээж нь амлуулж, ангир уургаа хөхүүлж амжсан байжээ. Харин одоо түүнийг нэмэлт тэжээлээр угжиж байгаа гэнэ.

Бид энэ хэргийн талаар Жаргалант сумын Эрүүл мэндийн төвийн эрхлэгч Б.Раднаасэдээс тодрууллаа. Тэрбээр “Манай эмнэлэг сумандаа эхчүүдээ төрүүлдэг. Эмчийн хяналтад байхдаа хүндрэл, зовиургүй бол сумын эмнэлэгт төрөх боломжтой. Манай эмнэлэгт амаржсан эх эндсэнтэй холбоотойгоор аймгийн Нэгдсэн эмнэлгээс ажлын хэсэг ирж, шалгалтын ажиллагаа хийгээд явсан. Манай эмч нар хийх ёстой бүх зүйлээ хийсэн. Төрөхийн дараах дотуур цус алдалтаар л нас барсан. Талийгаачийг эх барьж авсан эмч нь манай эмнэлэгт 7-8 жил эх барих, эмэгтэйчүүдийн эмч хийж байгаа туршлагатай. Талийгаачийн ихэсийг дутуу авсан эсэхийг мэргэжлийн байгууллага тогтооно. Эхийг төрөх үед манай эмнэлэгт анхан тусламжийн эм, тариа хангалттай байсан. Нярайн бие хэвийн байгаа” гэлээ. 

Талийгаач В-ийн ар гэрийнхний өгч буй мэдээллээр Эмч нар  бидэнд “Эгч чинь төрөхийн хүндрэлээс болж цус алдаад байна. Эмийн сангаас эм, тариа аваад ир” гэж хэлээд, очиход нь өнгөрчихсөн байсан” гэсэн юм. Мөн тэд “Ах, эгч минь малчин хүмүүс учраас хэргээ нуун далдлахын тулд ар гэрийнхэнд нь худлаа хэлж байна. Хэрэв ихэсийг нь гүйцэт авсан бол цус алдаж, амиа алдахгүй байсан” гэлээ.

Мөн зарим эх сурвалжийн мэдээлж буйгаар “Жаргалант суманд хөл хорио тогтоосонтой холбоотойгоор талийгаачийн аав, ээж, нөхөр нь хөдөөнөөс сум руу нэвтрэх гэж цаг алдсан. Тэднээс өнөөдөр (өчигдөр) шинжилгээ авч байж арай чүү сум руу нэвтрүүлсэн гэсэн” гэлээ.

          Бид энэ талаар Жаргалант сумын Засаг даргаас тодруулахад “Сум, баг хоорондын хөдөлгөөнийг зогсоосон. Талийгаач В-ийн гэр сумын төвөөс 30 гаруй километрийн зайтай байдаг. Бид шаардлагатай хүмүүсээ сумын төв рүү нэвтэрхийг зөвшөөрч байгаа. Талийгаачийн ар гэрийнхэн ирсэн байгаа. Бид эх эндсэнтэй холбоотойгоор Эрүүл мэндийн төвийн эмч нартай очиж уулзсан. Тэдний хэлж буйгаар шаардлагатай арга хэмжээг авсан гэсэн. Дөрвөн литр орчим цус сэлбэж, шингэж залгаж, тариа хийсэн юм билээ. Юунаас болж эл хэрэг гарсныг Шүүх эмнэлэг, Нэгдсэн эмнэлгийн шалгалтын баг тогтоох байх. Залуу хүүхэд харамсалтайгаар амиа алдсанд үнэхээр их харамсаж байна” гэлээ.