Завхан аймгийн Нөмрөг суманд барьсан ариун цэврийн байгууламж салхинд нурж унасан мэдээлэл цахим орчинд цацагдаад байгаа билээ. Тус байгууламжийг 23.9 сая төгрөгийн төсвөөр өнгөрсөн 2020 онд барьсан гэх мэдээлэл бий. Бид энэ талаар Завхан аймаг болон Нөмрөг сумын Засаг дарга, мөн аймгийн Хөрөнгө оруулалт, хөгжлийн бодлого, төлөвлөлтийн хэлтсийн дарга,  тус байгууламжийг барьсан “Энх-Өвгөдий” ХХК-ийнхнаас тодрууллаа.

Завхан аймгийн ЗДТГ-аас 2020 онд Нөмрөг суманд ариун цэврийн байгууламж барих тендер зарлажээ. Тус тендерт Завхан аймгийн Тэлмэн сумын Өвгөдий багт байрлах “Энх-Өвгөдий” ХХК оролцож, барилгын ажлыг хийж гүйцэтгэхээр болсон байна. Ингээд өнгөрсөн оны зургадугаар сараас ажилдаа орж, ирэх тавдугаар сард хүлээлгэж өгөхөөр төлөвлөөд байжээ. Харамсалтай нь, нүхэн жорлон нь ашиглалтад орж амжаагүй байхдаа нурж унасан байна.

Бид энэ талаар Нөмрөг сумын Засаг даргаас тодруулахад “Би ажлаа хүлээж аваад удаагүй байгаа учраас ямар компани, хэдэн төгрөгийн төсвөөр барьсныг нь мэдэхгүй. Тус ариун цэврийн байгууламжийг 2020 онд барьсан юм билээ. Төсөв нь манай сумаас гараагүй гэсэн байх аа” гэх мэдээллийг өгөв.

Д.ТҮВШИНЖАРГАЛ: Шуурганы улмаас нурсан барилга, байгууламжийг шалгахаар ажлын хэсэг гарсан

Ариун цэврийн байгууламжийг НҮБ-ын Хүүхдийн сангаас санхүүжүүлжээ. Завхан, Увс аймгийн хооронд хар зам ашиглалтад орсонтой холбоотойгоор бариулж байгаа аж.

Энэ талаар Завхан аймгийн Засаг дарга Д.Түвшинжаргал “Амралтын өдрүүдэд болсон шуурганы улмаас манай аймагт 6-7 барилга, байгууламжийн дээвэр болон зарим хэсэг нь нурсан. Энэ үеэр Нөмрөг суманд барьсан нийтийн ариун цэврийн байгууламж нурсан талаарх мэдээлэл ирсэн. Тус байгууламж нь өнгөрсөн онд ашиглалтад орсон юм билээ. Гэхдээ олон улсын хөрөнгө оруулалтаар аймгийн ЗДТГ-ын Хөрөнгө оруулалт, хөгжлийн бодлого, төлөвлөлтийн хэлтсээс хариуцаж хийлгэсэн гэсэн. Одоогоор ажлын хэсэг гарч, шалгалтын ажиллагаа явуулж байна” хэмээсэн юм.

Ж.БАТЦЭНГЭЛ: Нурсан ариун цэврийн байгууламжийн ажил нь дуусаагүй, хүлээж аваагүй байгаа

Тус аймгийн Засаг даргын хэлж буйгаар ариун цэврийн байгууламж нь өнгөрсөн онд ашиглалтад оржээ. Харин Завхан аймгийн ЗДТГ-ын Хөрөнгө оруулалт, хөгжлийн бодлого, төлөвлөлтийн хэлтсийн дарга Ж.БАТЦЭНГЭЛ “Олон улсын байгууллагын шугамаар хийж байгаа тул манай хэлтсээр дамжаагүй. Ажил нь дуусаагүй, хүлээж аваагүй байгууламж. Тус байгууламжийг “Энх-Өвгөдий” ХХК хариуцаж хийж байгаа гэсэн. Төсөл мөнгийг би сайн мэдэхгүй” гэлээ.

“Энх-Өвгөдий” ХХК: Хоёр суманд нүхэн жорлон барих 23.9 сая төгрөгийн төсөл авсан

Анх тендер зарлахдаа орчин үеийн ариун цэврийн боловсон байгууламж бариулахаар төлөвлөжээ. Гэтэл тендерт ялсан “Энх-Өвгөдий” ХХК нь уламжлалт нүхэн жорлон барьсан гэнэ. Ашиглалтад оруулж, хүлээлгэж өгөхөд бэлэн болсон нүхэн жорлон ганцхан өдрийн салхинд унасан талаар “Энх-Өвгөдий” ХХК-ийн удирдах ажилтан Э.Төмөрболдоос тодруулахад “Өнгөрсөн жил Завхан аймгийн Сонгино, Нөмрөг суманд ариун цэврийн байгууламж барих тендер зарласан. Тус тендерт манай компани зохих журмын дагуу оролцож, гүйцэтгэлийн ажил хийхээр болсон. Уг ажил нь төсвийн мөнгөөр биш, олон улсын төслөөр хийгдэж байгаа юм билээ. Өнгөрсөн жил хүлээлгэж өгч амжаагүй тул ирэх тавдугаар сард ашиглалтад оруулахаар төлөвлөж байгаа. Хэвлэл мэдээллийн хэрэгслээр 23.9 сая төгрөгөөр ганцхан суманд ариун цэврийн байгууламж барьсан юм шиг бичиж байна. Гэтэл энэ мөнгөөр Нөмрөг, Сонгино суманд тус бүр нэг нүхэн жорлон барьсан. Мөн ариун цэврийн боловсон байгууламж биш, нүхэн жорлон барьсан. Нэгийг нь 10 гаруй сая төгрөгийн төсвөөр гүйцэтгэж байгаа. Одоогийн байдлаар төсвийнх нь 70 хувь нь орж ирээгүй байна. Ажлаа хүлээж аваагүй, мөнгө нь дутуу байгаа гэсэн үг. Таван хүн орох багтаамжтай, бетон суурьтай, дотор талыг нь хавтандаж, гадна талыг нь төмрөөр хийгээд сайтинк хийсэн. Дээд талын кабен хэсэг нь зөөвөрлөх зориулалтай. Хариуцаж хийсэн ажилтнууд нь бэхэлгээг нь дутуу хийснээс болж ийм зүйл болжээ. Өөрөөр хэлбэл, дөрвөн талаас нь бэхэлгээ хийгээд гол хэсэгт нь хийж амжаагүй байхад нурсан. Гэхдээ бид энэ хариуцлагаа хүлээж, засварлаж, ирэх тавдугаар сард ашиглалтад оруулж өгнө” гэлээ.

Модон тавцантай, таван хүний багтаамжтай хоёр ширхэг нүхэн жорлонг 23.9 сая төгрөгөөр барьсан “Энх-Өвгөдий” ХХК нь өнгөрсөн 2018 оны нэгдүгээр сарын 1-нд үйл ажиллагаагаа эхлүүлж байжээ. Компанийн эзэмшигч нь Ж.Энхбаяр гэж хүн байдаг аж. Тус компани нь анх барилгын чиглэлээр бус, бөөний төвийн чиглэлээр үйл ажиллагаагаа явуулж, тендерт оролцож эхэлсэн байна.

Албаныханд ашиглалтад орсон, ороогүй гэхээс өөр мэдээлэл байхгүй. Тэр бүү хэл санхүүжилт нь улсын төсөв биш, гадны хөрөнгө оруулт гэдгийг л тэд гагцхүү мэдэж байлаа. Хэний ч мөнгө байсан сум орон нутагтаа хийгдэж буй байгуулалтад анхаарал хандаалдаг баймаар. Нөгөө талаар гүйцэтгэлийн ажил хийж буй компанийн ажилтнууд төсөв мөнгө нь дутуу гэдгээр чанаргүй энэ мэт барилгыг барьж болно гэж үү.