Сүхбаатарын талбайд 34 настай эрэгтэй өөрийгөө шатаасан хэрэг гарсан. Тодруулбал, талийгаач Э өнгөрсөн сарын 8-ны 13:32 цагийн үед өөр дээрээ шатахуун асгаж, шатааж, амиа алдсан юм. Шүүх эмнэлгийн дүгнэлтээр талийгаачийг хоолойн хөвч нь түлэгдсэнээр амьсгалын дутагдалд орсон хэмээсэн юм.

Тэгвэл эл хэргийг хаах саналыг Сүхбаатар дүүргийн цагдаагийн нэгдүгээр хэлтсээс харьяалах дүүргийн прокурорын газарт гаргажээ. Талийгаачийн биед хийсэн шинжилгээ, гэрчүүдийн мэдүүлэг, нотлох баримтуудад үндэслэн энэ хэрэг гэмт хэргийн шинжгүй, амиа хорлолт гэж үзсэн гэнэ.

Энэ талаар талийгаач Э-гийн төрсөн дүү Э-гээс тодруулахад “Талийгаачийн хэргийг хаасан дээр гэж бодож байна. Цагдаагийн байгууллагаас хаах санал гаргасан. Бид үүнтэй санал нэгдэж байгаа. Амиа хорлосон нь  тогтоогдсон юм шиг байна лээ. Гэхдээ талийгаач ахын маань фэйсбүүк хаягыг одоо хүртэл хэн нэгэн ашигласаар байгаа. Ашиглаж байгаа мэдэгдэл нь бидэнд байнга ирдэг” гэлээ.