-Унтах гээд хэвтэл үеэр тэнгэр дуугарч, аянга цохиж байгаа юм шиг болсон-

Газар хөдлөлтийн голомт болох Баянтал суманд нөхцөл байдал ямар байгаа талаар Төмөр замын 16 дугаар зөрлөгийн ахмад төмөр замчин П.Оюунбилэгээс тодрууллаа.

-Өчигдөр хэдэн цагийн үед газар хөдөлсөн бэ. Одоогийн нөхцөл байдлын талаар та мэдээлэл өгөхгүй юу?

-Хүмүүс өчигдөр орой маш их сандарсан байсан. Одоо хүмүүсийн сэтгэл санаа хэвийн болоод байна. Өчигдөр орой 22:43 цагийн үед унтах гээд хэвтэж байтал гурван удаа тэнгэр дуугарч, аянга цохиж байгаа шиг болсон. Төд удалгүй гэрийн шилэн эдлэл дуугарч, хананд өлгөөтэй байсан эд зүйлс нурж, тэнгэр газар нийлж байгаа юм шиг болсон. Эд зүйлс хөдлөөд эхлэхээр нь л газар хөдөлж байна гэж мэдсэн. Маш их дуутай, хүржигнээд байсан. Төмөр замын 16 дугаар зөрлөгт 16 айлын хоёр давхар орон сууц, гадна талд нь найман айл гээд нийт 22 айл амьдардаг юм. Газар хөдлөлт болсоны дараа хүмүүсийн даралт маш их ихэссэн. 25-40 насны залуучуудын даралт 180-аас буухгүй, 50 болон түүнээс дээш настай хүмүүсийнх 200 болж өссөн гэсэн. Сумын эмнэлгийн түргэний эмч ирж бидэнд анхан шатны тусламж үзүүлсэн.

Баянтал сумын 16 дугаар зөрлөгийн 22 айлын орон сууц. 2021.03.24-ний 10:00 цаг

-Айлуудын хана цуурч, тааз нурсан гэсэн үү. Та энэ талаар тодруулахгүй юу?

-Төмөр замын ажилтнуудын хоёр давхар орон сууцны гадна тал 5-10 см хэмжээтэй цуурч, ангайсан байна лээ. Өчигдөр орой харахад байрны хана энд, тэндгүй нарийн зураас болчихсон байсан. Гэтэл өглөө босоход том хэмжээтэй, ангайгаад хагарчихсан байна. Мөн айлуудын тааз 3-5 см хэмжээтэй цуурсан. Манай том өрөө болон ариун цэврийн өрөөний тааз цуурч, шавар нь унасан. Манай байранд тааз, хана нь цуураагүй айл гэж байхгүй. Дахиж газар хөдлөвөл манай байр нурахад бэлэн болоод байх шиг байна.

-Танайх сумын төвөөсөө хэдэн километрийн зайтай байдаг вэ?

-Манай зөрлөг сумын төвөөс 25-29 километрийн зайтай байдаг. Гэхдээ газар хөдлөлтийн голомт нь манайхаас 10 километрийн зайтай буюу маш ойрхон болсон. Голомт хэсэгт нь ганц, хоёр отрын айл амьдардаг юм. Тэд гэрт амьдардаг учраас харьцангүй гайгүй байсан гэсэн. Эд зүйл нь нурж, хохирол амссан айл бараг байхгүй. Гэхдээ сандарч, айсан юм шиг байна лээ. Арга ч үгүй биз дээ, анхан шатны мэдлэггүй бид айхаас өөр юу ч хийж чадахгүй байлаа. Газар хөдлөлтийн үеэр унтаж байсан таван настай охин минь “Авраачээ” гээд уйлаад байсан.

-Гадна талын орчин ямар байгаа вэ. Газар хагарсан, ус гарсан хэсэг байгаа юу?

-Тийм зүйл байхгүй. Аймаг болон сумын удирдлагууд газар дээр нь ирээд үзээд явсан.