Хөвсгөл аймгийн Чандмань-Өндөр сумын ерөнхий боловсролын сургуулийн спорт заалны барилгын хана нурсан талаарх мэдээлэл цахим орчинд тархаад байна.  Тус барилгын ажлыг “Уул-Өвгөд” ХХК гүйцэтгэжээ. Энэ талаар “Уул-Өвгөд” ХХК-ийн захирал Б.Цогзолмаагаас тодрууллаа.

-Танай компанийн барьсан спорт заалны барилга нурсан талаарх мэдээлэл гараад байна. Хэзээ ашиглалтад орсон барилга вэ?

-Манай компанийнхан Чандмань-Өндөр сумын ерөнхий боловсролын сургуулийн спорт заалны барилгыг 2010 онд эхэлж, 2013 онд ашиглалтад оруулж, улсын комисст хүлээлгэж өгсөн байдаг. Спорт заал барьсан газар цэвдэг ихтэй. Өнгөрсөн жилийн хавар спорт заалны хажуу тал цэвдэг гэсэх үеэр нурсан нь үнэн. Бид нурсан хэсгийг засварлах гээд дулаан орохыг хүлээж байсан юм. Гэтэл амралтын өдрүүдэд болсон байгалийн гамшигт үзэгдэлээс болж гадна талын өнгөлөгөө нурсан байна. Мөн үүнд газар хөдлөлт ч нөлөөлсөн байх. Энэ асуудлыг шийдвэрлэх газар нь шийдвэрлэж, бид засварлаж, хариуцлагаа хүлээх болно.

-2020 оны хавар гэхээр нэг жил өнгөрчихсөн байна шүү дээ. Өнгөрсөн зун засвар хийж болоогүй юм уу?  

-Хөрөнгө санхүүгийн асуудлаас болж засварлах боломж байгаагүй. Биднийг анх ажил авах үеэр техник төхөөрөмж байхгүй хэцүү байсан үе. Тэгээд ч нурсан гээд байгаа спорт заалны барилгыг гурван жил дамжиж, 300-хан сая төгрөгөөр барьсан юм. Улсын төсвөөс 50 сая, 100 сая гээд цувуулж авсаар барилгын ажлаа дуусгасан.

-Хүүхдүүдийн хамгийн аюулгүй тоглож, чөлөөт цагаа өнгөрүүлэх газрын нэг нь спорт заал. Гэтэл энэ барилга нураад унах шахжээ. Яагаад ийм чанарын шаардлага хангаагүй, аюултай барилга барьсан юм бэ?

-Газар хөдлөлт, цэвдэг гээд бүх зүйл нөлөөлсөн учраас ийм зүйл болсон байх. Одоо мэргэжлийн баг гарч, шалгалтын ажиллагаа явагдана биз. Тэр үед хаана нь ямар алдаа гарсан, юунаас болсон гэдэг нь тодорхой болох байлгүй дээ. Тухайн үед бүх зүйл чанарын дагуу явагдсан болоод л улсын комисс хүлээж авсан.

-Танай компани хэдэн оноос эхэлж барилгын чиглэлээр үйл ажиллагаагаа явуулж байгаа вэ?

-Бид 2002 оноос эхэлж барилга барьж байгаа. Сургууль, цэцэрлэг болон барьж болох бүхий л барилгыг барьдаг. Ажил олдож л байвал бид хаана ч чамаагүй очиж ажилладаг. Ингэж байж л хэдэн ажилтнуудаа цалинжуулна шүү дээ.