Баянхонгор аймгийн Шинэжинст сумын ерөнхий боловсролын сургуулийн дотуур байранд амьдарч байсан сурагчид хоолны хордлгод оржээ. Тодруулбал, гуравдугаар сарын 10-ны 10:00 цагийн орчимд дотуур байрны сурагчдад халуурах, бөөлжих шинж тэмдэг илэрч эмнэлгийн байгууллагад ханджээ.

 Энэ талаар Шинэжинст сумын ЗДТГ-ын Санхүүгийн албаны дарга Х.Давгажаваас тодруулахад “Манай сумын сургуулийн дотуур байранд 79 хүүхэд амьдардаг. Үүнээс 42 нь хоолны хордлого авсан байж болзошгүй байгаа. Одоогийн байдлаар найман хүүхдийн биеийн байдал хүнд, 12 хүүхэд хүндэвтэр байгаа. Одоогоор манай суманд аймгийн Эрүүл мэндийн газар,  Мэргэжлийн хяналтын алба, Онцгой комисс ажиллаж байна. Хүүхдүүдийг ямар хоолноос хордсоныг нь сайн мэдэхгүй байна” гэв.

Харин хүүхдүүд ямар хоолноос хордлого авсан талаар Шинэжинст сумын ерөнхий боловсролын сургуулийн захиралаас тодруулахад “Нарийн мэдээлэл өгөх боломжгүй. Биеийн байдал нь хүнд байгаа найман хүүхдийг аймгийн Нэгдсэн эмнэлэг рүү зөөвөрлөх гэж байна” гэв.

Мөн бид тус сумын Шуурхай штабын даргаас энэ талаар тодруулахад "Хүүхдүүд аарц, пүнтүүзтэй хоол идсэн гэсэн" гэв.