-Жолооч хурд хэтрүүлэн давхиж явахдаа  хоёрдугаар эгнээнээс  огцом  нэгдүгээр эгнээ рүү шилжих хөдөлгөөн хийж, машиныхаа хойд хэсгээр мөргөсөн  нь хяналтын камерт бичигдэн үлджээ-

Үндэсний  аюулгүй байдлын зөвлөлийн ажлын албаны дарга А.Гансүхтэй холбоотой хэд хэдэн ноцтой асуудал яригдах болсон. МАН-ын зарим нэр бүхий гишүүдээс эхлээд Хууль зүйн сайд, Ерөнхий сайд  Л.Оюун-Эрдэнэ хүртэл түүнийг ноцтой  гэмт хэрэгт холбоотой хэмээн мэдэгдсэн. Мөн Ерөнхийлөгч Х.Баттулгад ажлаас нь халах арга хэмжээ авах  хүсэлт бүхий саналыг албан бичгээр хүргүүлсэн  юм. А.Гансүхийг төр нийгмийн зүтгэлтэн С.Зоригийн амийг хөнөөсөн хэргийг удаашруулахтай холбоотой материалд холбогдож байгаа  гэх мэдээлэл ч гарсан. Мөн ОХУ-аас их хэмжээний ам. Долларыг улсын хилээр нэвтрүүлэн авчирсан гэх зүйлс олон нийтийн сүлжээнд тавигдаад буй. Үүнтэй холбоотойгоор ҮАБЗ-ийн ажлын албаны дарга, хуульч А.Гансүх гуравдугаар сарын 9-нд хэвлэлд тайлбар өгсөн юм. А.Гансүх хэвлэл мэдээллийн хэрэгслээр нэр нь холбогдоод байгаа асуудлын талаар ярилцлага өгсний дараа түүний аав, зам тээврийн осолд өртөж, хүнд гэмтэл авчээ. Тэрбээр аав нь бэртсэн ослыг зохион байгууллалттай хэмээн өөрийнхөө цахим хуудаст мэдэгдээд байгаа.

А.ГАНСҮХ: Аав минь автомашинд дайрууллаа. Үүнийг би тохиолдол гэж бодохгүй байна

Тэрбээр өөрийн цахим хуудсандаа “Ерөнхий сайд Л.Оюун эрдэнэ, Хууль зүй, дотоод хэргийн сайд Х.Нямбаатар УИХ-ын гишүүн У.Хүрэлсүх нарт. Өнөөдрийг хүртэл болж буй үйл явдлыг улс төр, гэхдээ их бохир улс төр гэж бодож явлаа. ҮАБ-ыг хамгаалдаг хамт олныг гүтгэхээр нь нийгэмд хагарал талцал үүсгэхээс сэргийлж мэдээлэл өгсөн. Гэтэл тэр өдрийн орой 17:50 цагт өндөр настай аавыг минь явган хүний гарц гарч явахад нь автомашинаар дайрлаа. Аав минь хүнд гэмтэл авч, одоо ГССҮТ-д эрчимт эмчилгээ хийлгэж байна. Үүнийг би тохиолдолд гэж бодохгүй байна. Миний гэр бүл, ойр дотны хүмүүс рүү халдлага хийж байна шү дээ. Дараа нь юу болох вэ.Та нарт хэлэх үг байна. Эр хүний зориг гаргаад зөвхөн надтай л тул. Миний настай аав, ээж, дүү, эхнэр хүүхдүүд, найз нөхөд, хамт олныг орхичих. Тэд маань Монгол Улсын жирийн иргэд. Монгол төр иргэдээ хэлмэгдүүлэхгүй гэж найдаж байна. Хууль хүчний байгууллагад итгэхгүй байгаа учир нийгэм рүү хандлаа.Шуурхай арга хэмжээ авч амийг нь аварсан эмч нарт маш их баярлаж, итгэж байгаа шүү” гэжээ.

“А.Гансүхийн аавыг автомашинаар мөргөсөн хэрэг шалгагдаж байгаа”

Түүнийг аав А-г Хан-Уул дүүргийн 15 дугаар хорооны нутаг дэвсгэрт байрлах “Хурд” хорооллын урд талын замд дайрч, гэмтээжээ. Явган хүний зам гарч явахад нь автомашинаар дайрч, биед нь хүнд гэмтэл учруулсан гэнэ. Бид энэ хэргийн талаар ЦЕГ-ын Хэвлэл мэдээллийн төвийн дарга, дэд хурандаа Б.Баатархүүгээс тодруулахад “ҮАБЗ-ийн ажлын албаны дарга, хуульч А.Гансүхийн аавыг автомашинаар мөргөсөн хэрэг цагдаагийн байгууллагад шалгагдаж байгаа. Энэ хэргийн талаар Тээврийн цагдаагийн албанаас тодруулаарай” гэсэн юм.

Дрифт хийж байсан залуус иргэн А-г дайрсан уу

Эх сурвалжийн мэдээлж буйгаар “Хурд” хорооллын урд талын замд явсан жолооч залуу хурдтай явж байхдаа А.Гансүхийн аав А-г мөргөсөн гэх. Хяналтын камерт үлдсэн бичлэгээр хоёрдугаар эгнээгээр давхиж явсан автомашины жолооч гэнэт нэгдүгээр эгнээний зам руу огцом дарж орсон. Үүний дараа тоормос гишгэж, кардан татсан. Ингээд машин зам дээр хөндөлсөж гарцаар алхаж явсан А-г мөргөж  хүнд бэртэл учруулжээ. Түүгээр ч зогсохгүй хэргийн газрыг орхиж явахыг оролдсон байж болзошгүй гэнэ. Зам тээврийн ноцтой осол гаргаж, хүнийг хүндээр гэмтээсэн автомашины жолоочийг илрүүлсэн эсэхийг бид Тээврийн цагдаагийн албаны Урьдчилан сэргийлэх хэлтсийн дарга, цагдаагийн хошууч Э.Энхболдоос тодруулсан юм. Тэрбээр “Хэний аав гэдгийг нь би мэдэхгүй. Манайд гуравдугаар сарын 9-ны 18:00 цагийн орчимд Хан-Уул дүүрэг, “Хурд” хорооллын автозамд явган зорчигч шүргүүлсэн гэх хэрэг бүртгэгдсэн. Мөрдөн шалгах ажиллагаа үргэлжилж байна. Тухайн иргэнийг мөргөсөн суудлын автомашины жолоочийг илрүүлсэн” гэв.

Харин бид ҮАБЗ-ийн ажлын албаны дарга, хуульч А.Гансүхээс хэргийн талаар тодруулах гэсэн боловч утсаа аваагүй юм. Зарим эх сурвалжийн  бидэнд өгсөн мэдээллээр хохирогч А-ын хавирга хугарч, тархиндаа гэмтэл авсан гэнэ. Санамсар болгоомжгүй байдлаас үүдэн гарсан авто осол уу, эсвэл хэн нэгний санаатай үйлдсэн гэмт хэрэг  байсан уу гэдгийг  үргэлжлүүлэн хүргэх болно.