Хэнтий аймгийн Баянмөнх сумын малчин У-ийн нохой цасны гуталтай өрөөсөн хөл зууж ирсэн тухай дуудлага цагдаагийн байгууллагад бүртгэгдсэн талаар бид өмнө нь мэдээлсэн билээ. Тодруулбал, нохой зууж ирсэн өрөөсөн хөл нь өнгөрсөн оны аравдугаар сард Хэнтий аймгийн Мөрөн сумаас алга болсон  53 настай эмэгтэйнх байжээ. Бид энэ хэргийн талаар дараах сурвалжилгыг бэлтгэлээ.

Малчин У-ийнх Баянмөнх сумын төвөөс 10 гаруй километрийн зайтай өвөлжиж байсан аж. Гуравдугаар сарын 8-ны өдөр тэдний нохой цасны гуталтай, ялзарч, өмхийрсөн өрөөсөн хөл зууж ирснийг гэрийн эзэд мэдээд сандарч, цагдаагийн байгууллагад дуудлага өгсөн гэнэ. Дуудлагын дагуу Баянмөнх, Бор-Өндөр сумын цагдаагийн хэсгийн алба хаагчид хэргийн газарт ажиллаж, 53 настай эмэгтэйн цогцосынх болохыг тогтоосон байна. Цогцос малчин У-гийнхаас холгүй байх жалганаас олджээ. Цогцос хөрсөн дээр олон сар байсан учраас муудаж, ялзарч, хөл, гар нь тасарсан байсан гэнэ.

Б.БААТАРХҮҮ: Наранд удаан байсан цогцос муудаж, хөл нь тасарсан байсан

Бид хэргийн талаар ЦЕГ-ын Хэвлэл мэдээллийн төвийн дарга Б.Баатархүүгээс тодруулахад

“Талийгаачийг гаднын нөлөөтэйгөөр нас барсан эсэх, мөн сэтгэцийн өвчтэй байсан уу, үгүй юү гэдэг нь одоогоор тогтоогдоогүй байна. Цогцос нь наранд удаан байснаас үүдэн муудаж, нэг хөл нь тасарсан байдалтай олдсон. Мөрдөн шалгах ажиллагаа үргэлжилж байгаа учраас дэлгэрэнгүй мэдээлэл өгөх боломжгүй” гэсэн юм.

Талийгаач гэрээсээ 90 километр зайд амиа алдсан байжээ

Талийгаач эмэгтэй Хэнтий аймгийн Мөрөн сумаас явган алхаж, Баянмөнх сумын нутаг дэвсгэрт ирээд, амиа алджээ. Тэрээр 90 гаруй киломтер ганцаараа алхсан бололтой байна. Талийгаачийн цогцос малчин У-ийнхаас гурван километр орчмын зайтай байсан гэнэ. Бид малчин У-аас хэргийн талаар тодруулах гэсэн боловч мэдээлэл өгөхөөс татгалзсан юм. Харин эх сурвалжийн мэдээлж буйгаар “Цогцос манай сумын Дулаан багаас олдсон. Хүмүүсийн ярьж байгаагаар гаднын нөлөөтэй нас барсан байж магадгүй гэж байна лээ. Учир нь, цогцос хэсэг хэсэг болон тасарч, хүн харахын аргагүй болсон байсан гэсэн. Талийгаач Мөрөн сумын харьяат эмэгтэй юм билээ. Талийгаачийн хүүхдүүд болон ах, дүү нар нь манай суманд ирээд, цогцсыг нь авч явсан” гэв.

Талийгаач сэтгэцийн өвчтэй байсан гэв

Эх сурвалжийн мэдээлсний дагуу талийгаач эмэгтэй Мөрөн сумын харьяат, өрх толгойлсон эмэгтэй гэнэ. Бид талийгаач эмэгтэйн талаар Хэнтийн аймгийн Мөрөн сумын Засаг даргаас тодрууллаа. Тэрбээр “Талийгаач эмэгтэйг 2020 оны аравдугаар сараас хайж эхэлсэн. Төрийн алба хаагчид талийгаачийн ар гэрийнхэн, цагдаагийн алба хаагчидтай хамтарч, хоёр ч удаа нэгдсэн байдлаар эрэл хийсэн. Тодорхой үр дүнд хүрч чадаагүй учир эрлийг зогсоогоод байлаа. Талийгаач сэтгэцийн өвчтэй байсан. Хаашаа ч хамаагүй явган гүйчихдэг байсан юм билээ. Өмнө нь хэд хэдэн удаа алга болж байсан” гэлээ.