УИХ-ын гишүүн, Дэд бүтцийн хөгжлийн сайдын үүрэг гүйцэтгэгч С.Зориг агсныг бүлэглэж, шунахайн сэдэлтээр, захиалгаар, онц харгис хэрцгий аргаар санаатай хөнөөсөн хэрэгт Т.Чимгээ, Б.Содномдаржаа, Ц.Амгаланбаатар нарыг буруутгаж, хорих ялаар шийтгэсэн. Төр нийгмийн зүтгэлтэн С.Зоригийг хөнөөсөн хэрэгт буруутгагдаж, 25 жилийн хорих ял авсан Б.Содномдаржаагийн нөхцөл байдлын талаар түүний ээж Б.Жавзмаагаас тодрууллаа. 

-Таны бие давгүй юу. Хүүтэйгээ хамгийн сүүлд хэзээ уулзсан бэ?

-Бид яах вэ, янзандаа байж л байна даа. Коронавирусийн нөхцөл байдлаас  шалгаалж хүүтэйгээ ойрдоо уулзаж чадаагүй. Өнгөрсөн оны долдугаар сараас хойш хүүгийнхээ барааг хараагүй л байна шүү дээ. Манай аймгаас хүн оруулж, гаргахгүй байгаа болохоор гэртээ л байна. Коронавирусийн халдвар намжвал хүүтэйгээ уулзах сан л гэж бодож сууна. Ер нь өдөр бүр л уулзахыг хүсдэг.

-Хүүтэйгээ утсаар ярьдаг уу. Сэтгэл санаа нь ямар байгаа бол?

-Ойрдоо холбоо барьж чадахгүй байгаа. Бүх зүйл ковидоос шалтгаалж, улам хаалттай болоод байна шүү дээ. Хорих ангийнхаа дэглэмээр л байгаа байх. Янз бүрийн зодуур, дарамт шахалт нь гайгүй байгаасай гэж найдаж байгаа. Гэхдээ л тэр их яргалал, зодуур, нүдүүр, доромжлолыг миний хүү амссан шүү дээ.  Сэтгэл санаа нь ямар олиг байв гэж. Хүү минь нэг харанхуй өрөөнд ганцаараа байдаг болохоор мэдээлэл авдаг эсэхийг ч бид мэдэхгүй юм.

-Хоёр хоногийн өмнө Ерөнхий сайд Л.Оюун-Эрдэнэ таны хүүтэй хамт нэг хэрэгт буруутгагдсан Т.Чимгээтэй очиж уулзсан талаар та мэдсэн байх. Үүний дараагаар таны хүү болон Т.Чимгээг "сулла" гэж олон нийт шаардаж байна. Та хүүгийнхээ өмгөөлөгчтэй уулзсан уу. Таны хүүг суллах боломжтой болов уу?

-Т.Чимгээтэй уулзана гэдэг чинь миний хүүтэй уулзсанаас ялгаагүй гэсэн үг. Ерөнхий сайд Л.Оюун-Эрдэнэ энэ хэрэгтэй холбоотойгоор хурал хийнэ гэж ярьсан. Тэр хурлыг л харж, хүлээж сууна даа. Одоохондоо суллах эсэх талаар ямар ч мэдээлэлгүй байна. Өмгөөлөгчтэйгөө уулзаагүй. Гэхдээ энэ хэргийг шийдэх цаг нь одоо болсон байх гэж бодож байна.

-Ерөнхий сайд Л.Оюун-Эрдэнэ хэлэхдээ “Т.Чимгээг мансууруулах бодисоор дамжуулж, биеэ хянах чадваргүй байхад нь хурууны хээ хүртэл авч ашигласан нөхцөл байдал мөрдөн шалгах явцад илэрсэн” гэж ярьсан шүү дээ. Таны хүүг ч бас ингэсэн байх болов уу гэж бодож байв уу, та?

-Тийм ээ, тийм асуудал байж л таарах байлгүй дээ. Миний хүү болон Т.Чимгээг ямар ч хамаагүй аргаар гүтгэж, үг хэлүүлж, тэрийгээ чухал баримт болгодог улс . Т.Чимгээгийн амсаж байгаа зовлон, зодуур, нүдүүрийг миний хүү ч бас ялгаагүй амсаж л байгаа байх. Адилхан гэсэн үг. Ямар байдалтай байгааг ард түмэн нүдээрээ харсан. Миний хүүг гүтгэж ял оноосон юм. Хүүг минь ялласан хууль хяналтын байгууллагынханы зөв гэж нэг ширхэг ч байхгүй. Ц.Амгаланбаатарыг ашиглаж, үгээр нь тэр хоёрыг ялласан шүү дээ.

-Таны хүү уулзахаараа танд юу гэж хэлдэг вэ, хэргийн талаар?

-Миний хүү ээждээ

“Ямар ч хэрэг хийгээгүй нь батлагдах болно. Хүү нь эцсээ хүртэл тэмцэнэ. Би энэ хэргийг хийгээгүй. Миний хэрэг үнэн зөвөөр шийдэгдэхийг би харна. Ээж минь, би үнэн, зөв гэж байдаг бол тэрийг л хүлээж, харж байгаа шүү. Би хийсэн хэрэггүй юм чинь зүтгэхээс өөр яах юм” гэж дандаа хэлдэг.

Бид ч бас хүүгийнхээ төлөө эцсээ хүртэл тэмцэнэ. 80 дөхөж яваа надад үүнээс өөр хүсэх юм байхгүй. Миний хүүг нууцаар баривчлаад л хорьчихсон юм шүү дээ. Тухайн үед буюу хүүг минь баривчлаад явсны дараа надад яваагүй газар, уулзаагүй хүн гэж байхгүй. Орхон аймгийн бүх шорон, цагдаагийн байраар хүүгээ хайгаад олоогүй.  

Одоогийн байдлаар би хууль хяналт, төрийн эрх мэдэлтэнгүүдэд 120 гаруй захидал бичээд байна.

Эрүүдэн шүүсэн, хавтаст хэргийг худал бүрдүүлсэн нь үнэн болж, бүх зүйл гүтгэлэг байсан нь нотлогдчихоод байна шүү дээ. Мөн энэ хэргийн цорын ганц гэрч Б.Булган “Энэ хоёр хүн хэрэг хийгээгүй”, Ц.Амгаланбаатар “Би энэ хоёр хүнийг гүтгэсэн” гэдгээ хүртэл хүлээчихээд байхад өөр юу хэрэгтэй гэж вэ. Хууль хяналтын байгууллагынхан зохион байгуулалттай хэлмэгдүүлэлт хийсэн учраас л айгаад, хэргийн үнэнийг олохгүй байна гэж боддог.

-Хэрэг гарах үед буюу 1998 оны аравдугаар сард таны хүү хаана байсан юм бэ. Та хүүгээ хэрэг хийгээгүй, аав, ээжтэйгээ хамт байсан гэдгийг баталдаг шүү дээ?

-Миний хүү чинь тухайн үед хот хүрээ орж үзээгүй, 21 настай байсан шүү дээ. Зүг чигээ ч мэдэхгүй малдаа явж байсан үе нь. Эх, эцгийнхээ хараанаас гараагүй, малчин байсан хүүхдийг л яллаад аваад явсан. Миний хүү юу хэрэгтэй гэж тэр хэргийг хийх юм бэ. Ямар улс төрийн мэдлэг байх биш дээ. Улс төрийнхөн өөрсдийн хийсэн хэргээ л дарахын тулд малчин ардын хүүхдийг гүтгэж байгаа юм.

-Та гэрч гэх Б.Булгантай уулзаж байсан гэдэг байх аа. Танд юу гэж хэлдэг вэ?

-Шүүх хурлын үеэр бид хэд хэдэн удаа таарч байсан. Тэрнээс хамт суугаад юм ярьж үзээгүй улс. Ер нь бид Б.Булгантай уулзаад байх ч хэрэг байхгүй.

-Та хэдийн амьдрал ахуй ямар байна вэ?

-Сүйрсэн гэж хэлж болно. Аав нь даралт ихтэй, харваж нүдгүй болсон. Бид чинь 80 нас гарсан хүмүүс шүү дээ. Миний хүү чинь долоон хүүхдийн аав. Долоон хүүхдийн ахуй амьдрал, эрүүл мэнд хохирч, нэг айлын амьдрал зургаан жилийн хугацаанд сүйрчихэээд байна шүү дээ. Бид яаж амьдраад байгаагаа ойлгож ч чадахгүй хэцүү байна. Миний хүү суллагдаад аав, ээж, үр хүүхэд, хань ижилдээ хүрээд ирээсэй л гэж бодож байна.