УИХ-ын гишүүн, Дэд бүтцийн хөгжлийн сайдын үүрэг гүйцэтгэгч С.Зориг агсныг бүлэглэж, шунахайн сэдэлтээр, захиалгаар, онц харгис хэрцгий аргаар санаатай хөнөөсөн хэрэгт Т.Чимгээ, Б.Содномдаржаа, Ц.Амгаланбаатар нарыг буруутгаж, хорих ялаар шийтгэсэн. Уг С.Зоригийг хөнөөсөн хэрэгт буруутгагдаж, 20 жилийн хорих ял авч, хорих 401 дүгээр ангид хоригдож байгаа Т.Чимгээтэй Ерөнхий сайд Л.Оюун-Эрдэнэ, Хууль зүй, дотоод хэргийн сайд Х.Нямбаатар нар очиж уулзсан билээ. Энэ уулзалтын үеэр ял эдэлж буй Т.Чимгээ сэтгүүлчдийн асуултад хариулж, С.Зориг агсны хэрэгт холбоогүй, зөвхөн Ц.Амгаланбаатарын үгээр тэднийг ялласан тухай хэлсэн юм.

Уг уулзалтын дараагаар олон нийтийн сүлжээнд Т.Чимгээ, Б.Содномдаржаа нарыг суллахыг шаардаж, иргэд эсэргүүцлээ илэхийлж байв.

Тэгвэл бид ялтан Б.Содномдаржаа, Т.Чимгээ нарыг ямар тохиолдолд суллаж болохыг Б.Содномдаржаагийн өмгөөлөгч Д.Оюунчимэгээс тодруулж, дараах хариултыг авлаа.

Б.Содномдаржаагийн өмгөөлөгч Д.Оюунчимэг “Би маш нууцын зэрэглэлтэй хэргийн материалтай танилцаж, түүн дээр гарын үсэг зурсан хүн. Ямар нэгэн байдлаар хэргийн материалыг бусдад дэлгэх, ярих, нээх боломжгүй. Ийм учраас гарын үсэг зурсан шүү дээ. Хэрэв би хэргийн талаар яривал  өөрөө Эрүүгийн хариуцлага хүлээх болно. Одоо бол миний өмгөөлж буй Б.Содномдаржааг суллах боломжгүй”  хэмээн үүнээс өөрөөр мэдээлэл өгөхөөс татгалзлаа.