Найзындаа очих гэж гэрээсээ гараад сураггүй болсон иргэн амиа алдсан байдалтай олджээ. Тодруулбал, 47 настай эрэгтэй Б нь гуравдугаар сарын 2-нд гэрээсээ гараад сураггүй болсон байна. Тэрээр Сонгинохайрхан дүүргийн 33 дугаар хорооны Шижирийн даваа гэх газарт нутагладаг найзындаа очихоор явсан ч  сураггүй болсон тул ар гэрийнхэн нь өчигдөр Онцгой байдлын газарт дуудлага өгчээ. Дуудлагын дагуу онцгой байдлын алба хаагчид эрлийн ажиллагаа явуулахад Чингэлтэй дүүргийн иргэн Б нь Шижирийн давааны өврөөс нас барсан байсныг олж, цагдаагийн байгууллагад шилжүүлсэн байна. Цагдаагийн байгууллагаас хэрэг бүртгэл нээн, нас барсан шалтгаан нөхцөлийг тодруулахаар ажиллаж байгаа аж.