2018 онд тухайн үеийн ЗГХЭГ-ын дарга Г.Занданшатар, тагнуул, цагдаагийн тусгай, дотоодын цэргийн бүрэлдэхүүнтэйгээр Дундговь аймагт аймгийн прокурорын хяналтын дор тусгай ажиллагаа зохион байгуулж, Салхитын мөнгөний ордыг төрийн мэдэлд авч байв. Ингэхдээ Монгол Улсын Үндсэн хуульд заасан байгалийн баялаг ард түмний мэдэлд байх зарчимд нийцүүлэн Салхитын мөнгөний ордыг 2043 он, 2047 он хүртэл ашиглах тусгай зөвшөөрлүүдийг цуцалж, төрийн мэдэлд шилжүүлсэн билээ. Улмаар 2019 онд тус ордод хайгуул хийх, ашиглах тусгай зөвшөөрлийг “Эрдэнэс Силвер Ресурс” ХХК-д шилжүүлж, төсвийн хөрөнгө оруулалтгүйгээр олборлолтын үйл ажиллагааг нь эхлүүлсэн байдаг. Ийнхүү Салхитын мөнгөний ордыг эдийн засгийн эргэлтэд оруулснаар тэтгэврийн зээлтэй өндөр настнуудын тэтгэврийн зээлийг нэг удаа чөлөөлсөн нь Монгол Улс түүхэндээ анх удаа байгалийн баялгийн үр өгөөжийг ард иргэдэд шууд хэлбэрээр хүртээсэн сайн жишиг боллоо хэмээж байсан юм.

Тэгвэл “Эрдэнэс Силвер Ресурс” ХХК-д Авлигатай тэмцэх газраас санхүүгийн шалгалт хийхэд хэд хэдэн зөрчил илэрсэн байна. Нэгдүгээрт, тендер шалгаруулж, худалдан авалт хийх ёстой байтал тэгэлгүйгээр тоног төхөөрөмж худалдаж авсан зөрчил илэрчээ. Хоёрдугаарт, ашиг орлогоос цугларсан 37 сая ам.доллар буюу 105 тэрбум төгрөгийг Монголбанканд тушаах байтал Худалдаа хөгжлийн банканд хадгалж, хүүгээр мөнгө босгосон байж болзошгүй нөхцөл байдал илэрсэн байна. Гэхдээ эх сурвалжийн мэдээлж буйгаар өдгөө энэ мөнгийг Сангийн яаманд шилжүүлсэн гэнэ. Иймээс тус компанийн захирал Т.Мөнхбаярт дээрх хоёр үндэслэлээр хэрэг бүртгэлийн хэрэг нээж, шалгаж байгаа аж.

 “Эрдэнэс Силвер Ресурс” ХХК-ийн Гүйцэтгэх захирал Т.Мөнхбаяр Монгол Улсын Ерөнхийлөгч Х.Баттулгад ажлаа танилцуулах үеэрээ "2021 оны хоёрдугаар хоёрдугаар сарын 8-нд 105 тэрбум төгрөг буюу 37 сая ам.долларыг Монголбанканд тушааж, тэтгэврийн зээлгүй байсан ахмадуудад нэг сая төгрөг олгох ажлыг эхлүүлнэ" хэмээн мэдэгдэж байсан билээ. Өөрөөр хэлбэл, 2019 онд тэтгэврийн зээлгүй байсан ахмадуудад энэ оны тавдугаар сард багтаан нийт 210 орчим тэрбум төгрөгийг олгох юм. Гэтэл энэ мөнгө нь төрийн дансанд жилийн өмнөөс орох ёстой мөнгө байсан гэдгийг эх сурвалж хэллээ.