Сүхбаатарын талбай дээр 34 настай эрэгтэй өөр дээрээ шатахуун  асгаж харамсалтайгаар амиа алдсан хэрэг гарсан талаар бид мэдээлсэн. Талийгаач Өмнөговь аймагт  төмөр замын бүтээн байгуулалтын ажил хийдэг байжээ. Цалинг нь өгөхгүй олон сар болж эдийн засгийн хямралд  орсон учраас талийгаач ийм үйлдэл хийсэн байж болзошгүй байна. Энэ талаар Зам, тээврийн хөгжлийн сайд Л.Халтараас тодрууллаа.

-Төмөр замын бүтээн байгуулалтад ажиллаж байсан иргэн цалингүй олон сар ажилласан учраас өөрийгөө шатааж, амиа алдсан гэх мэдээлэл байна?

-Одоогоор төмөр замын бүтээн байгуулалтад оролцож байсан ажилтан өөрийгөө шатааж амиа алдсан гэх мэдээллийг би аваагүй байна. Чухам юунаас болж тийм үйлдэл гаргасныг нь мэдэхгүй.

-Төмөр замын бүтээн байгуулалтад ажиллаж байгаа иргэдийн цалинг олгохгүй байгаа гэсэн мэдээлэл байна. Энэ үнэн үү?

-Бүтээн байгуулалтад ажиллаж байгаа иргэдийн цалин хөлсийг олгох ажлыг хөөцөлдөж байгаа. Бага багаар цалин хөлсийг нь олгож байна. Оны өмнө нэг удаа санхүүжилт хийсэн. Дараагийн ээлжийн санхүүжилтийг удахгүй олгох байх.

-Зөвхөн бүтээн байгуулалтын ажилд оролцож байгаа иргэдийн цалин л доголдолтой байгаа юм уу?

-Монгол Улсын төмөр замд 16800 хүн ажилладаг. Үйл ажиллагаа явуулдаг төмөр замынхан цалингаа хэвийн авч байгаа. Төмөр зам барьж байгаа хүмүүсийн цалин доголдолтой байгаа. “Таван толгой” компаниас санхүүжилт хийгдэх ёстой тул бид хөөцөлдөж байна.