Төв аймгийн Батсүмбэр сумын нутагт байрлах Ахмад настны үндэсний төвд амьдарч байсан 62 настай, Т осгож, амиа алджээ. Тодруулбал, өнгөрсөн нэгдүгээр сарын 3-нд талийгаач Т хог асгахаар яваад, зүрх нь хаагдаж нас барсан байна. Харин асрамжийн газрынхан талийгаачийг нас барсныг нэг хоногийн дараа мэдсэн гэх мэдээлэл гараад буй. Хэргийн талаар Батсүмбэрийн Ахмад настны үндэсний төвийн дарга Л.Эрдэнэхүүгээс тодрууллаа.

-Нэг сарын өмнө танай асрамжийн газарт амьдарч байсан Т нас барсан хэрэг гарчээ. Энэ талаар та тодорхой мэдээлэл өгөхгүй юү?

-Нэгдүгээр сарын 3-ны 16:00 цагийн орчимд талийгаач Т хог асгахаар асрамжийн газрын байрнаас гарсан байгаа юм. Тэгээд хогийн цэгийн орчимд зүрх нь хаагдаж, нас барсан байдалтай олдсон. Зүрх хаагдсан нь шүүх шинжилгээний дүгнэлтээр батлагдсан. Талийгаач оройны хоолондоо ороогүй учраас бид 18:00 цагаас эхэлж хайж эхэлсэн юм. Гэтэл тэр өдөртөө олдоогүй, өглөө нь хогийн цэгийн хажуу талаас олдсон. Цогцос олдсон даруйд цагдаагийн байгууллагад мэдэгдэж, шалгалтын ажиллагаа явуулсан.

-Алга болсон өдөр нь цагдаагийн байгууллагад яагаад хандаагүй юм бэ. Талийгаачийг алга болсныг нэг хоногийн дараа мэдсэн гэх мэдээлэл байсан шүү дээ?

-Тухайн өдөр асрамжийн газарт ажиллаж байсан хариуцлагатай жижүүр, сувилагчид алга болсныг нь мэдэж, хайсан. Маргааш нь мэдсэн гэдэг худал мэдээлэл.

-Талийгаачийг хогийн цэг рүү явсан гэдгийг мэдэж байсан юм бол яагаад тэр хавиар хайгаагүй юм бэ?

-Хогийн цэг орчмоор хайсан. Манайх хогийн цэгээ блокоор хийчихсэн юм. Гэтэл цэгийн хойд талд гараад уначихсан байсныг олохгүй, дутуу хайгаад байсан юм билээ.

-Маргааш өглөө нь яаж олсон юм бэ?

-Тэр хавиар дахин хайж, манай нэг эмч олсон.

-Асрамжийн газрын хүмүүсээ өдөр бүр бүртгэдэггүй юм уу?

-Манайд одоогийн байдлаар 155 хүн амьдарч байгаа. Өдөр бүр хүмүүсийнхээ халууныг гурван удаа үзэж, бүртгэдэг.

-Талийгаач танай байгууллагад хэзээнээс эхэлж амьдарсан бэ. Хүүхэдтэй юү?

-Манайд харж хандах хүнгүй, ганц бие, бие даан амьдрах чадваргүй хүмүүс ирдэг. Хэргийн талаар ар гэрийнхэнд нь мэдэгдэж, цогцсыг хүлээлгэж өгсөн.

-Талийгаач зүрхний өвчтэй байсан юм уу?      

-Өмнө нь зүрхний эмчилгээ 10 хоног хийлгэж байсан.

-Холбогдох яамнаас энэ хэргийг шалгаж байгаа юу. Тухайн өдөр ажиллаж байсан хүмүүст хариуцлага тооцсон уу?

-Хөл хориотой байсан учраас хэргийн талаарх мэдээллийг ХНХЯ-нд байнга хүргүүлж байсан. Яамнаас өнөөдөр манайд ирж ажиллаж байна. Яг одоо нөхцөл байдалтай газар дээр нь танилцаж, ажиллаж байна гэсэн үг. Тухайн өдөр ажиллаж байсан жижүүр, хариуцлагатай жижүүрийг үүрэгт ажлаас нь чөлөөлсөн.