УИХ-ын гишүүн агсан Г.Батхүү 2019 оны тавдугаар сарын 17-ны өдөр Төрийн ордонд учир битүүлгээр амиа алдсан. Тухайн үед талийгаачийг Төрийн ордны хоёр давхрын гонхноос доош унаж амиа алдсан байдалтай хэвтэж байхад нь үйлчилгээний ажилтан харж, 19:48 цагт Нийслэлийн цагдаагийн Шуурхай удирдлагын төвийн 102 дугаарт утсанд “Төрийн ордны нэгэн ажилтан нэг давхрын баруун жигүүрт хүн нас барсан байна” гэх дуудлага өгсөн мэдээлэл бий.

Өнгөрсөн оны нэгдүгээр сарын 22-ны өдөр буюу найман сарын дараа анх удаа Г.Батхүү агсны ар гэрийнхэн болон өмгөөлөгч Ж.Батхуяг хэвлэлийн бага хурал хийсэн юм.

Тус хурлын үеэр том хүү Б.Ганхөлөг “Бид найман сарын турш тэвчээртэй ажиглаж суулаа. Бидний хувьд их хэцүү найман сар өнгөрлөө. Дөрвөн настай бага дүү минь бэтгэрээд хоол ундаа идэхгүй их хэцүү байна. Цоо эрүүл аав минь өглөө гэрээсээ гараад явсан. Төрийн албанд төрийн тусгай обьектод, төрийн тусгай хамгаалттай газар ажлын цагаар албан үүргээ гүйцэтгэж яваад эргэж ирсэнгүй. Бид энэ хэргийг гаднын нөлөөтэй гэж үзэж байна. Өндрөөс унасан гэж байгаа ч унасан талын нүд нь хэвийн. Нөгөө талын нүд нь нэлээд том хавдартай байсан. Хүзүүн дээр гарсан улайлт нь заамдалтын улмаас гарсан гэж бид хардаж байгаа” гэсэн юм.   

Харин уг хэрэгт өмгөөлөгчөөр ажиллаж буй өмгөөлөгч Ж.Батхуяг

“Талийгаачийн баруун нүдний чиглэлд хүч үйлчилснээр зовхинд цус хуралт, ухархайн дээд хананы хугарал үүссэн. Баруун нүдэнд хөхрөл, хавдар үүссэн. Мөн задлан шинжилгээний явцад хүзүүний зүүн хажууд 7х0.5 см урттай улайлт үүссэн. Энэ бол боолтын улмаас үүсч болдог улайлт юм.

Хэвлэл мэдээллийн хэрэгслээр өвчний улмаас цус харвасан гэсэн мэдээлэл гарсан. Харин шүүх шинжилгээний дүгнэлтээр өвчний улмаас цус харваагүй, гэмтлийн гаралтай цус харвалт тархинд үүссэн байна гэсэн дүгнэлт гарсан. Уг хэрэгтэй холбоотойгоор нэр бүхий УИХ-ын гишүүнээс полиграфийн тест авсан. Тестийн дүгнэлтээр асуусан асуултад хариулахдаа сэтгэл санааны хувьд гэм буруугийн түгшүүрийн мэдрэмж өндөр гэсэн дүгнэлт гарсан. Хэргийн газрын үзлэг хийх явцад талийгаачийн хэрэглэж байсан гар утсыг хураан авч, үзлэг шинжилгээ хийгээд эргүүлэн хүлээн өгсөн бөгөөд тухайн утсан дээр ямар ч мэдээлэл байгаагүй, шинэ утас шиг болсон байсан. Шинжилгээний дүгнэлтэд ч гар утсанд ямар нэг мэдээлэл байгаагүй, сэргээх боломжгүй гэж гарсан. Задлан шинжилгээний өмнө ар гэрийнхэн нь MRI аппаратанд оруулж, рентген зураг авахуулахыг хүссэн ч шүүх эмнэлгийнхэн яаралтай гэсэн шалтгаанаар хүлээн аваагүй. Шинжилгээний явцад онош дутуу тавьсан, шинжилгээг дутуу хийсэн зүйлс тогтоогдсон” хэмээн мэдээлсэн юм.

Уг хэрэг хэрхэн шийдэгдэж буй талаар Монгол Улсын ерөнхий прокурорын газраас тодруулахад “УИХ-ын гишүүн агсан Г.Батхүүгийн Төрийн ордонд амиа алдсан хэргийг мөрдөн шалгаж байгаа. Шалгалтын талаар дэлгэрэнгүй мэдээлэл өгөх боломжгүй” гэсэн юм.