Сэлэнгэ аймгийн малчин айлд Улаанбаатар хотоос очсон 16 настай хүү хонь хариулахаар явганаар гараад сураггүй алга болсон талаар бид мэдээлсэн билээ. Тодруулбал, Баянгол сумын Баян багийн Баяны энгэр болон Хавчуу гэдэг газарт өнгөрсөн нэгдүгээр сарын 30-ны өдрийн 10:00 цагийн орчимд 16 настай эрэгтэй А нь хонь хариулахаар яваад одоог хүртэл сураггүй байна.

Энэ талаар Баянгол сумын ИТХ-ын даргаас тодруулахад “Алга болсон хүү манай сумын малчин О-гынд буюу эмээгийндээ Улаанбаатар хотоос өнгөрсөн оны арванхоёрдугаар сард ирсэн юм билээ. Хүү ирснээсээ хойш хонь хариулсан бөгөөд өвөлжиж байгаа газрынхаа газар усыг багагүй мэддэг болсон гэсэн. Одоогийн байдлаар 100 гаруй хүний бүрэлдэхүүнтэй  баг эрлийг үргэлжлүүлж байгаа бөгөөд хүү олдоогүй байна. Онцгой байдал, ЗДТГ-ынхан, малчид морь болон машинтай хайж байгаа. Хүүгийн аав, ээж болох хүмүүс Улаанбаатар хотоос ирээд байна. Хүүг алга болдог өдөр цас орж, шөнөдөө шуурсан учраас мэдэгдэх мөр  байхгүй. Хариулж явсан хонь нь тэр оройдоо хашааныхаа гадаа өөрсдөө хүрээд ирсэн гэсэн. Малчин О-гынх сумын төвөөс 10 гаруй километрийн зайтай өвөлждөг. Тэднийх морьгүй учраас явганаар хонио хариулдаг юм билээ” гэв.