-Талийгаач “Хувийн эмнэлэг байгуулна” гэж ярьдаг байжээ-

Хөвсгөл аймгийн “Далайн-Элбэрэлт” өрхийн эрүүл мэндийн төвийн хүний их эмч  30 настай эрэгтэй А, 30 настай эмэгтэй Ц нар зам тээврийн ноцтой ослын улмаас амиа алдсан харамсалтай хэрэг гарлаа.Тодруулбал, нэгдүгээр сарын 23-ны 16:15 цагийн орчимд Хөвсгөл аймгийн Алаг-Эрдэнэ сумын нутаг дахь Хужиртын даваа гэх газар шороон замд “Toyota prius” маркийн автомашин онхолдож, машинд зорчиж байсан таван хүний гурав нь хүнд бэртэж, хоёр нь газар дээрээ амиа алджээ. Тэд “Далайн-Элбэрэлт” өрхийн эрүүл мэндийн төвийн эмч, ажилтнууд байсан аж. Хэргийн талаар талийгаач Т.Агваанжамцын эгч Т.Н-ээс тодрууллаа. 

-Таны дүү зам тээврийн ослын улмаас харамсалтайгаар амиа алджээ. Гүн эмгэнэл илэрхийлье. Таниас энэ ослын талаар тодруулж болох уу?

-Осол болохын өмнөх өдөр “Хуралтай байна” гээд, гэртээ ирж хоноогүй. Коронавирусийн халдварын шинжилгээ авах, тандалт, судалгаа хийх гээд сүүлийн үед маш их ачаалалтай ажиллаж байсан. Гэртээ ирж хоноогүй болохоор ажил ихтэй л байгаа юм байна гэж бодоод байж байлаа. Өмнө нь бас зарим тохиолдолд хонон өнжин ажилладаг байсан учраас өөрөөр юу ч гэж бодох билээ дээ. Маргааш нь 14:00 цагийн үед утас руу нь залгахад холбогдохгүй байсан. Ажлаа дуусгаад хүрээд ирэх байх л гэж бодож байлаа. Гэтэл орой цагдаагийн байгууллагаас залгаад ийм айхтар осол болсон зүйл тухай хэлсэн. Үнэхээр итгэж чадахгүй байна.

-Дүү тань албан ажлаар Хатгал руу явсан юм болов уу?

-Тэрийг сайн мэдэхгүй байна. “Хуралтай байна” гэсэн болохоор нь ажил ихтэй л гэж бодоод, залгаж саад болоогүй. Бид Хатгал руу явсан гэдгийг нь ч мэдээгүй. Шаардлагатай алсын дуудлага гараад л явсан байх гэж бодож байна. Одоогоор чухам ямар ажлаар явсан гэдгийг нь мэдэх сөхөөтэй хүн алга.

-Аав, ээж нь ослын талаар мэдсэн үү. Талийгаач айлын хэд дэх хүүхэд вэ?

-Өндөр настай аав, ээж минь сэтгэл санааны гүн шоконд орсон байдалтай байна. Гэнэтийн зүйл болохоор бидэнд ч бас маш хэцүү байна. Юу болж байгаа, юу болсныг ч бодоход хэцүү байна шүү дээ.  Манайх ам бүл тавуулаа. Талийгаач дүү минь ихрийн өрөөсөн. Би төрсөн ганц эгч нь байгаа юм.

-Талийгаач дүү тань “Далайн-Элбэрэлт” өрхийн эмнэлэгт ажиллаад хэр удаж байгаа вэ?

-Миний дүү сургуулиа төгсөөд, сум, орон нутагтаа ажиллахаар ирээд удаагүй байсан юм. Өрхийн эмнэлэгт ажиллаад хоёр жил орчим болж байсан байх. Ур чадвараа дээшлүүлж, туршлагатай болоод “Хувийн эмнэлэг байгуулна” гэж ярьдаг, мөрөөдөмтгий хүүхэд байсан. Гэнэн, цайлган, дөлгөөхөн, эзэмшсэн мэргэжилдээ эзэн болж явсан, жаахан дүү минь юм шүү дээ.

-Дүү нь хүүхэдтэй юү?

-Эхнэр нь эмч болохоор өөр газар ажилладаг байсан. Ганц охинтой. Охиноо өөрөө харж, ажилдаа явсан хойгуур нь бид хардаг юм. Одоо энэ жаахан амьтан аавгүй яаж амьдрах юм бол... Үнэхээр хэлж мэдэхгүй, бодож зүрхлэхгүй нь.