-Долоон жил ээжийнхээ үхсэн, амьдыг мэдэх гэж шар махтайгаа хатсаны эцэст цогцсыг нь олж, гэмт хэрэгтнийг байх ёстой газар руу нь явууллаа-

Долоон жилийн өмнө гэрээсээ гараад сураггүй алга болсон М гэх эмэгтэйн цогцос Баянзүрх дүүргийн 28 дугаар хорооны ... гудамжны ... тоотоос өнгөрсөн наймдугаар сард олдсон билээ. Талийгаач 2013 оны аравдугаар сарын 31-нд 14:00 цагт гэрээсээ гарч, төрсөн эгчээсээ “Мөнгө аваад ирье” гээд явсан байдаг. Гэвч эгчтэйгээ ч уулзаагүй, утсаа унтраагаад ор сураггүй алга болсон юм. Алга болсон өдрийнхөө 23:00 цагийн үед том охин руугаа танихгүй дугаараас залгаад “Ээж нь багын найзтайгаа таараад, гэрт нь ирчихсэн байна. Өнөөдөр очиж чадахгүй. Баянхошуунд хол, уулын аманд байна. Маргааш өглөө эрт яваад очно. Дүүтэй нь 07:00 цагт эмнэлэгт уулзъя. Хоёр зээг миний өмнөөс үнсээрэй” гэж хамгийн сүүлчийн удаа ярьсан гэдэг.

Үүнээс  гурав хоногийн дараа ээжийнхээ эрэлд хатсан охид цагдаагийн байгууллагад өргөдөл гаргасан байгаа юм. Тэдний ганц баримжаалах зүйл ээжийнх нь хамгийн сүүлд ярьсан танихгүй хүний утасны дугаар. Өнөөх утасны дугаарын эзнийг буюу гэмт хэрэгтэн Г-г цагдаа нар дуудаж авчирсан гэдэг. Гэмт хэрэгтэн Г цагдаад “Би аравдугаар сарын 31-ний 20:00 цагийн үед утсаа алга болгосон” гэж хэлээд утсаа унтрааж, долоон жил ор сураггүй алга болжээ. Харин түүнийг цагдаагийн байгууллагаас өнгөрсөн оны наймдугаар сард баривчилж, саатуулсан билээ. Тэгвэл тус хэрэгт холбогдох шүүх хурал өнгөрсөн арванхоёрдугаар сарын 3-нд болжээ. Энэ талаар талийгаачийн том охин Э.Мөнхгэрэлээс тодрууллаа.

-Шүүх хурал болсон гэсэн. Шүүхээс ямар шийдвэр гаргасан бэ?

-Дүү бид хоёр өмгөөлөгчгүй шүүх хуралд оролцсон. Ээжийг минь хөнөөсөн этгээдийг өнгөрсөн оны арванхоёрдугаар сарын 3-нд шүүлээ. Шүүхээс ээжийг онц хэрцгийгээр хөнөөж, худагт булж, долоон жил нуун дарагдуулсан гэмт хэрэгтэн Г-д 15 жилийн ял оноосон. Шүүх хурал хүртэл саатуулагдсан хоёр сарын хугацаа нь хасагдаад, 14 жил гаруйн хугацаанд ял эдлэхээр болсон доо. Санаатайгаар хүн амины хэрэг үйлдэж, долоон жил нуун дарагдуулж, биднийг амьдын тамд байлгасан түүнд яагаад ийм бага ял оноосныг мэдэхгүй. Хуулийн мэдлэг дутуу учраас яах учраа олохгүй байсаар 14 хоног өнгөрөөж, давж заалдах шатны шүүхэд хандаж чадаагүй.

-Шүүхээс нөхөн төлбөр гаргуулах шийдвэр гарсан уу?

-Ээж минь нэг л өглөө алга болсон шигээ долоон жилийн дараа цогцос нь гэнэт л олдчихсон. Тухайн үед мөнгөний бололцоо бага байсан болохоор дүү бид хоёр ах, дүү, хамаатан садантайгаа нийлээд 10 гаруй сая төгрөг олж, буяны ажлыг нь гүйцэтгэсэн. Ихэнхийг нь хүнээс зээлчихсэн байсан юм. Шүүх хурал болохоос өмнө гэмт хэрэгтний ах, дүү нар бидэнд таван сая төгрөг өгсөн. Харин шүүхээс буяны ажилд зарцуулсан мөнгийг нь гаргуулах шийдвэр гарсан ч тэд одоо хүртэл үлдэгдэл мөнгийг нь өгөөгүй байгаа. Гэмт хэрэгтний ар гэрийнхэн рүү залгаж, хэзээ өгөхийг нь асуухад “Одоо наад хүн чинь бидэнд хамаагүй” гэдэг тайлбар өгсөн. Ийм үед ямар арга хэмжээ авдгийг сайн мэдэхгүй болохоор арга мухардчихаад л сууж байна.

-Шүүх хурлын үеэр гэмт хэрэгтэн та хоёр хандаж юм хэлсэн үү?

-Бидэнд асуух асуулт маш олон байсан. Шүүх хурлын үеэр хэд хэдэн асуулт асуусан ч гэмт хэрэгтэн Г ганц ч үг дуугараагүй. Буруугаа хүлээхээс өөрөөр үг хэлээгүй. Ядаж “Миний ээжийг яагаад хөнөөж байгаа юм. Хоёр охиныг нь дагуулаад ээжийг минь хайж байхдаа юу бодож байсан” гээд асуухыг хүссэн олон асуулт байсан даа. Даанч тэр юу ч дуугараагүй, бидэн рүү харж ч чадахгүй байсан.

-Таны сэтгэл санаа хэр байна вэ. Шокын байдлаасаа гарч чадаж байна уу?

-Цогцос олдсоноос хойш сэтгэл тавгүй, эсвэл сэтгэл амарчихсан юм шиг тийм мэдрэмжтэй хэсэг амьдарсан. Ээжийгээ тэр олон жил харанхуй нүхэнд хүлээтэй, хүн ёсоор нойрсож чадахгүй тарчилсныг бодохоор гол зураад байдаг юм. Гэмт хэрэгтэн миний ээжийн хэвлий, хүзүү, үснээс хүртэл олсоор ороосон байсан нь нүдэнд харагдаад байдаг. Миний ээжийг хэдэн цаг олсоор хүлж, амийг нь хөнөөсөн бол гэж бодохоор үнэхээр аймшигтай. Тэгээд эцэст нь худаг руу шидээд, дээрээс нь шороо хийчихсэн гэхээр...

Долоон жил ээжийнхээ үхсэн амьдыг мэдэх гэж шар махтайгаа хатсаны эцэст цогцсыг нь олж, гэмт хэрэгтнийг байх ёстой газар руу нь явууллаа.