-Эгч маань хоёр удаа коронавирусийн шинжилгээ өгч, халдваргүй гээд эмнэлэгт хэвтсэн-

Дөнгөж төрсөн эхийг углааш, халаадтай нь ХӨСҮТ рүү зөөвөрлөсөн хэрэг олны бухимдлыг төрүүлж буй. Энэ талаар түүний төрсөн дүү Б.Энхдалай байр сууриа илэрхийллээ.

Тэрбээр “Манай эгч Б.Мөнхцэцэг тав хоногийн өмнө төрөх эмнэлэгт очсон. Эмнэлэгт хэвтэхээс өмнө нөхөртэйгөө хамт коронавирусийн шинжилгээ өгсөн байна лээ. Эгч маань хоёр удаа коронавирусийн шинжилгээ өгч, халдваргүй гээд эмнэлэгт хэвтсэн. Өчигдөр буюу нэгдүгээр сарын 19-нд эгч над руу залгаад “08:00 цагийн үед төрж, хүүтэй боллоо” гэсэн. Гэтэл өдөр 12:00 цагийн үед хүргэн ах маань залгаад “Манай байрны дөрвөн давхрын хүнээс коронавирус илэрсэн болохоор биднээс шинжилгээ авч байна” гэж ярьсан. Хоёр цагийн дараа ХӨСҮТ-өөс ах руу залгаад “Шинжилгээний хариу эргэлзээтэй байгаа учраас дахин шинжилгээ авах шаардлагатай” гэж ярьсан байгаа юм. Тэгээд “Коронавирус илэрлээ” гээд ХӨСҮТ-д тусгаарлана гэж хэлсэн байна. Нөхрөөс нь халдвар илэрсэн учраас төрөх эмнэлэгт байсан эгчээс минь дахин шинжилгээ авсан гэсэн. Ингээд мөн эгчээс халдвар илэрсэн нь тодорхой болсон. Эмнэлэгт очихоос өмнө хоёр удаа өгсөн шинжилгээ сөрөг байхад эгчээс яагаад халдвар илэрсэн бэ гээд манай гэр бүлийнхэн гайхаж байна.

Эгч маань шинжилгээний хариугаа мэдсэний дараа бидэн рүү залгаад “Эгчийг нь ХӨСҮТ рүү авч явна гэнэ. Одоо яах вэ” гээд маш их сандарсан ярьсан. Эгчийгээ санааг дэмжиж, дархлааг нь унагаахгүй гээд тайвшруулсан. Мөн хүргэн ахын байрыг тусгаарлачихсан болохоор тэд гэрээсээ гарах ямар ч боломжгүй байсан. Ах над руу залгаад “Эгчийн чинь хувцсыг хүргэж өгөх гэхээр байрнаас гаргахгүй байна” гээд сандраад байна лээ. Халдвар илэрсэнд итгэж чадахгүй байж байтал эгчийг минь углааш, халаадтай нь эмнэлгээс гаргаж байгаа бичлэг ил гарсан. Эгч минь нимгэн өмд, оймс, халаад, углааштайгаа эмнэлгээс гараад явж байгааг хараад үнэхээр зүрх шимширсэн. Дэрээр амыг нь даруулаад гаргаж байгаа нь маш харгис байна лээ. Эгч “Биднийг зөөвөрлөж байгаа хүн намайг машинаас гарсны дараа дэрээ аваарай” гэж хэлсэн байна лээ" гэв. 

Мөн тэрбээр үргэлжлүүлэн "Бичлэгээс харахад эгч тэр хүнийг машинаас гарсны дараа дэрээ шидээд, хүүхдээ тэврээд авч байгаа харагдсан. Эгчийн хөхөнд сүү орохгүй маш хэцүү байдалтай байна. Одоо эгч, хүргэн ах, хүүхэдтэйгээ хамт ХӨСҮТ-д байгаа. Харин гурван хүүхдийг нь тусдаа өрөөнд байлгаж байгаа гэсэн. Эгч ХӨСҮТ рүү явж байхдаа над руу залгаад “Намайг хүйтэн машинд суулгаад аваад явж байна. Урдаа цагдаагийн машинтай ямар аймар юм бэ. Эгч нь хүүгээ тэврээд явж байна” гээд уйлаад ярьсан. Би эгчийгээ эцсээ хүртэл тайвшруулж, хүнд байдалд нэг шөнийг өнгөрөөлөө. Гэмт хэрэгтэн биш, дөнгөж төрсөн нярайг, ээжтэй нь хамт дуут дохио асааж, авч явах шаардлага байсан уу. Эгчийг минь хүйтэнд нүцгэн шахуу авж явчихаад ХӨСҮТ-ийн гадна шатаар дөрвөн давхар руу алхуулсан байна лээ. Хүйтэн салхинд дөрвөн давхарт нялх биетэй хүн үрээ тэврээд гарч байна гээд боддоо. Одоо эгч минь үнэхээр сэтгэл санааны хүнд байдалд байна. Эгчийг минь ийм байдалд оруулсны хариуцлагыг хэн хүлээх юм бэ. Төрийн албан хаагч тангараг өргөсөн байх ёстой. Гэтэл энэ бүх үйл явдлыг хийсэн төрийн албан хаагчдыг бүгдийг нь хал гэж хэлмээр байна. Хүн чанаргүй үйлдлээ зогсоо” хэмээлээ.