-ХӨСҮТ-ийнхөн намайг халдваргүй, буруу оношилсон гэдгээ хүлээн зөвшөөрсөн-

Нэгэн эмнэлгийн лаборантоос нэгдүгээр сарын 7-нд халдвар илэрсэн талаар ХӨСҮТ-ийн Тандалт, судалгааны албаны дарга А.Амбасэлмаа мэдээлсэн. Тэгвэл тус иргэнийг халдвартай хэмээн буруу оношилжээ. Энэ талаар иргэн Б.Г-тэй  ярилцлаа.

-Таныг халдвартай хэмээн буруу оношилж, ХӨСҮТ-д тусгаарлаж байгаа гэсэн. Энэ талаар тодорхой мэдээлэл өгөхгүй юү?

-Манай 43а байрнаас халдвар илэрсэн тул нэгдүгээр сарын 5-нд оршин суугчдаас ЗӨСҮТ-өөс ирж, шинжилгээ авсан. Нэгдүгээр сарын 7-нд буюу хоёр хоногийн дараа миний гар утсанд “Таны шинжилгээний хариу сөрөг гарлаа” гэж мессэж ирсэн. Тэр өдөртөө ажилдаа очоод байж байтал 11:50 цагт ЗӨСҮТ-өөс “Таны шинжилгээний хариу эргэлзээтэй байна. Та хаана байгаа вэ. Өөрийгөө тусгаарлаад байж байгаарай” гэж ярьсан. Надад ямар ч шинж тэмдэг илрэхгүй байсан тул би хоёр удаа өөрөөсөө түргэвчилсэн оношлуураар шинжилгээ авахад хариу нь сөрөг гарсан юм. Орой 20:00 цагийн үед ХӨСҮТ-өөс манай эмнэлгийн ажилтнуудаас ирж шинжилгээ авсан.Манай эмнэлгийн 141 хүнээс шинжилгээ авснаас нэг хүнээс халдвар илэрлээ.

Мөн миний нэгдүгээр сарын 5-нд өгсөн шинжилгээний хариу эргэлзээтэй байсан тул бид хоёрыг ХӨСҮТ-д авчирсан. ХӨСҮТ-д ирээд нэг хоногийн дараа шинжилгээ өгөхөд хариу гарсан эсэх нь тодорхойгүй байлаа. Гэтэл маргааш өглөө нь “Таны шинжилгээний хариу эргэлзээтэй байгаа тул яаралтайгаар дахин шинжилгээ авах хэрэгтэй” гэж хэлсэн. Энэ үед миний шинжилгээний хариу эргэлзээтэй буюу сөрөг гарсан байсан. Дахин нэг хоноод коронавирусийн халдвар авсан эсэх, хуучин халдвар байна уу гэдгийг илрүүлэхээр цуснаас шинжилгээ авсан. Тэр шинжилгээний хариу нь мөн сөрөг гарсан. ХӨСҮТ-ийн эмч надад “Коронавирус илрүүлэх PCR шинжилгээ хоёр удаа, цусаар авсан нэг удаагийн шинжилгээ болон уушги чинь ямар ч өөрчлөлтгүй гарсан. Коронавирусийн халдвар аваагүй нь тогтоогдсон гэсэн үг” гэж хэлсэн.

-Нэгдүгээр сарын 7-ноос одоог хүртэл ХӨСҮТ-д тусгаарлаж байгаа юу?

-Тийм ээ, ийм зүйл болсон ч гэсэн халдварын голомтод байгаа тул 14 хоног тусгаарлана гэж хэлсэн. Мөн нэгдүгээр сарын 21-нд ХӨСҮТ-өөс гарах ч Хан-Уул дүүргийн 300 ортой эмнэлэгт дахин 7-14 хоног тусгаарлана гэнэ лээ. Би халдваргүй гэдэг нь тогтоогдчихоод байхад “Гэртээ тусгаарлагдаж болох уу” гэж асуухад эмч “Тушаал бол тушаал. Ямар ч гэсэн чамайг долоо хоног Хан-Уулын эмнэлэгт тусгаарлах байх” гэж хэлсэн. Тэгэхээр нь би тэнд тусгаарлагдаж чадахгүй гэдгээ хэлэхэд “Цэрэг, цагдаагийнхан байгаа болохоор чамайг хүчээр оруулна. Тэгж онигоогоо дэлгэж байхаар зүгээр тусгаарлагдсан нь дээр” гэж хэлнэ лээ. Халдваргүй, буруу оношилсон гэдгээ хүлээн зөвшөөрчихөөд яагаад ингэж байгааг ойлгохгүй байна.

-Яагаад ийм алдаа гарсан талаар танд хэлсэн үү?

-Шинжилгээний хариу гардаг программын алдаа гэж хэлсэн. Хамгийн эхний буюу нэгдүгээр сарын 5-нд өгсөн шинжилгээний хариу эерэг, бусад шинжилгээ сөрөг гарсан гэж хэлнэ лээ.

-Гэр бүлийн хүмүүсийг нь тусгаарласан уу?

-Миний ойрын хавьтал болох ажил болон гэр бүлийн 30 гаруй хүнийг “Амар” зочид буудалд тусгаарлаад байгаа. Намайг тусгаарладаг өдөр буюу нэгдүгээр сарын 7-нд албаныхан эхнэр рүү минь залгаад “Танай нөхрийн шинжилгээний хариу эргэлзээтэй байгаа тул таниас шинжилгээ авна. Та ажил дээрээ өөрийгөө тусгаарлаад байж байгаарай” гээд ярьсан байгаа юм. Эхнэр маань оройжин шинжилгээ ирж авахыг хүлээгээд, арга буюу ажил дээрээ хоносон. Албаныхан “Гарч болохгүй” гэж хэлсэн болохоор миний долоон настай хүү гэртээ ганцаараа хоносон. Өглөө эхнэр маань шинжилгээ авах хүмүүс рүү залгахад “Та гэртээ хариад байж бай. Бид гэрээс чинь очоод шинжилгээ авна” гэж хэлж байгаа юм даа. Тийм л байсан юм бол яагаад тэр орой гэрт нь хариулж болоогүй юм бэ. Эхнэрийг өглөө гэртээ очиход Баянгол дүүргийн V, VI дугаар хороо хөл хорио тогтоочихсон, гэр рүү оруулахгүй хэсэг болсон. Арай гэж гуйгаад гэртээ ороод байж байхад хүүтэй маань хамт зочид буудалд тусгаарлахаар авч явсан. Өнөөдөр (өчигдөр) дөрөв дэх удаагаа PCR шинжилгээ авсан гэсэн. Эхний шинжилгээнүүд нь сөрөг гарсан.

-Тухайн үед ХӨСҮТ-ийн Тандалт, судалгааны албаны дарга А.Амбасэлмаа “Баянгол дүүргийн 43а байрны зургаан хүнээс халдвар илэрлээ” гэж байсан шүү дээ. Тантай адилхан буруу оношлогдсон хүн байгаа юу?

-Манай байрны дөрвөн давхрын нэг залуугийн шинжилгээний хариу надтай яг адилхан гарсан байна лээ. Одоо мөн л ХӨСҮТ-д халдваргүй гэдэг нь тогтоогдчихсон байж байна. Өөрөөр хэлбэл, гэрээс ирж авсан шинжилгээний хариу эерэг, бусад нь сөрөг гарсан гэсэн үг. Бусад хүнтэй холбогдож чадаагүй болохоор сайн мэдэхгүй байна.

-Тэгээд та нарт эмчилгээ хийхгүй байгаа юм уу?

-Өдөрт витамин С 500 мл-ээр уулгаж, дархлаа дэмждэг лаа өгдөг. Эмч нь өдөрт нэг удаа даралт үзэж, цээж чагнадаг.