“Street dreams” шоуны ялагч реппер Orice буюу М.Алтан-Оргил өнгөрсөн долдугаар сард таван давхраас учир битүүлгээр унаж, амиа алдсан. Хэргийн талаар түүний аав Х.Мөнхцогттой ярилцсанаа хүргэе.

-Таны хүү учир битүүлгээр амиа алдсан. Энэ хэрэг ямар шатандаа явж байна вэ. Та мэдээлэл өгөх боломжтой юу?

-Хэрэг мөрдөн байцаах шатандаа явж байгаа учраас нарийн мэдээлэл өгөх боломжгүй. Коронавирусийн халдварын улмаас хэрэг удаашралтай, хүлээлгийн байдалтай байна. Мэдэх зүйлээр хомс л байна даа. Хүүтэй минь холбоотой хоёр хэрэг шалгагдаж байгаа. Нэгдүгээрт амиа алдсан хэрэг, хоёрдугаарт амиа алдахаасаа өмнө хүнд зодуулж, өргөдөл гаргасан хэрэг нь.

-Талийгаачийн шүүх шинжилгээний дүгнэлт юу гэж гарсан бэ?

-Тухайн үед орны даавуу унжуулж, таван давхраас бууж байх явцдаа амиа алдсан гэж байсан. Харин дараа нь шүүх шинжилгээний дүгнэлтээр зүүгдэж буусан гэх даавуу нь байх ёстой хэмжээндээ байна гэж гарсан. Өөрөөр хэлбэл, даавуу унжуулж буусан гэдэг нь худлаа болж байгаа юм. Мөн гадны нөлөөтэй, нөлөөгүй гэдэг нь тодорхой бус байна лээ. Энгийн бид тийм ч тодорхой ойлгохооргүй дүгнэлт гарсан. Мөрдөн байцаалтын шатандаа яваа учраас шүүх хурал товлогдоогүй байгаа.

-Хэрэг хаагдах гэж байгаа талаарх мэдээлэл хэвлэлээр цацагдаад байсан. Энэ худлаа юу?

-Нэг удаа хэрэг хаагдах санал гарсан. Хаагдах шахаад, бид дахин шалгах шаардлагатай гэж хүсэлт гаргаж байж хаагаагүй. Манайх дөрвөн өмгөөлөгчтэй ажиллаж байгаа.

-Тухайн үед юу болсон талаар та нэхэн сануулахгүй юу?

-Эхнэр бид хоёр руу долдугаар сарын 27-ны өглөө цагдаагаас залгаад “Гэмтлийн эмнэлэг дээр хүрээд ир” гэхээр нь очиход миний хүү ухаангүй байсан. Очоод хүүгээ ухаан ортол хүлээсэн. Ухаан орчих байх гэж найдаж байлаа. Цагдаагаас “Танай хүүхэд нэг охинтой хамт байсан. Тэгээд ааваас нь айгаад цагаан даавуу залгаж таван давхрын цонхоор буух гэж байгаад унасан юм билээ” гэж бидэнд хэлсэн. Бид тийм л юм байна гэж ойлгосон. Цагдаа нар ч тэгж ойлгосон байж магадгүй. Бид ч миний хүүхэд ингээд үсэрчихдэг юм байх даа гээд гайхаад өнгөрсөн. Маргааш нь цагдаа нар “Бид хэргийн газрын үзлэгээ хийчихсэн” гэхэд нь “Дутуу юм үлдээчих вий” гэж хэлэхэд “Бид ажлаа мэдэж байна” гэсэн. Харин бидэн рүү нэг хүн яриад “Танай хүүгээс өргөдөл ирсэн байна. Та хүрээд ирэхгүй юү” гэж утсаар хэллээ. Миний хүү эмнэлэгт очихоосоо өмнө цагдаа нарын хэлээд байгаа найз охин гэх эмэгтэйгийн аавд зодуулж, цагдаагийн байгууллагад гомдол бичээд, “Хүзүүгээ хөдөлгөж болохгүй байна, IPhone 6 plus  утсыг маань дээрэмдсэн” гээд өргөдөл өгөхөд нь “Шүүхийн шинжилгээний дүнгээ авчир” гэж явуулсан байгаа юм.

 Миний хүү хүнд зодуулж, аюултай байдалд байгаагаа цагдаа нарт өргөдлөөр  тодорхой хэлээд, тусламж гуйж байхад яагаад тэд тэр айл руу нь очоод шалгаж болоогүй юм бэ. Цагдаагийн байцаагч надад “Хэргийн газарт хэсгийн байцаагч дуудаад очсон”, эсвэл “102-ын дуудлагаар очсон” гэсэн зөрүүтэй мэдээлэл өгөөд байгаа. Хэргийн газарт очиход нэг танихгүй охин найз охин нь болоод гараад ирчихсэн. Хэрэг үүсээд намайг дуудахад танихгүй охин “Би найз охин нь” гээд зогсож байсан. Би тэр охины эцэг миний хүүг алсан гэж ойлгож байгаа. Миний хүү зодуулсан хүнийхээ гэрт ороод, таван давхраас нь унасан юм билээ. Гэхдээ яг унасан уу, түлхсэн үү гэдгийг бид мэдэхгүй.

-ГССҮТ-д та хоёрыг очиход хүү тань ямар байдалтай байсан бэ. Ил харагдах шарх, сорви байсан уу?

-Ухаан орохгүй байсаар хүү маань амьсгал хураасан. Ганц ч үг сольж чадаагүй. Миний хүү ядаж ганц үг ч болов хэлээсэй гээд зөндөө залбирсан. Хүүгийнхээ хажуунаас ганц ч алхам холдоогүй. Биднийг очиход хүүгийн маань хоолой хүнд боолгоод улайчихсан, цээж, гар хэсэгт нь хөхөрчихсөн байсан.

-Хэрэг гарахаас өмнө та хамгийн сүүлд хэзээ хүүтэйгээ уулзсан бэ?

-Ер нь хоёр хоног уулзаагүй шүү. Өөрийнхөө, бидний мэддэг найз охиныд байсан. Хүүхдүүдийн хоорондын асуудал болохоор бид тэднийг хэзээ хамгийн сүүлд ярьсныг мэдэхгүй. Харин охин руу “Хайр аа, би гэрээс чинь гараад явж байна шүү” гэж бичсэн байгаа юм. Тэгээд тэрнээс хойш ганц ч яриагүй гэсэн. Найз охин нь оройжин, шөнөжин залгасан гэсэн. Утас нь нэг холбогдоод, нэг унтраад байсан болохоос ганц ч удаа утсаа аваагүй юм билээ. Хэдийгээр миний хүү найз охинтойгоо үерхээд удаж байгаа ч гэсэн цаг нь болоогүй байсан болохоор энэ хоёр маань хүүхэдтэй болж амжаагүй байсан. Хэрэв ядаж өөрийнхөө оронд хүн үлдээгээд явсан болж надад хэчнээн сайхан байх сан гэж санана. 

-Хүүг тань гэр рүүгээ дуудсан охин болон түүний ааваас мэдүүлэг авсан уу?

-Олон хүнээс мэдүүлэг авч байгаа. Тэр хоёроос ч бас мэдүүлэг авсан.