- “Ханталст” компани хоёр хүүгийн минь амины хариуд дөрвөн сая төгрөг, эмгэнэлийн бичиг өгсөн-

Өдийгөөс зургаан сарын өмнө 11-15 настай дөрвөн хүү тогтоол усанд осолдож, харамсалтайгаар амиа алдсан хэрэг гарсан. Тодруулбал, өнгөрсөн тавдугаар сарын 27-нд Баянзүрх дүүргийн 26 дугаар хорооны нутаг, Үндэсний цэцэрлэгт хүрээлэнгийн урд хашаан доторх тогтоол усанд тоглож байсан хүүхдүүд живж, амиа алдсан юм. Хүүхдүүдийн осолдсон “Ханталст” компанийн хашаан дотор байрлах тогтоол усанд аврагчид ойролцоогоор таван метр орчим гүнд 12 удаа шумбаж, цогцсуудыг гаргаж авсан гэдэг. "Хөөсөнцөр хөвүүлэн тоглож байтал хөмөрсөн" гэж тухайн үед хамт байсан хүүхдүүд нь хэлж байлаа. Тэгвэл энэ хэрэг хэрхэн шийдэгдэж байгаа талаар талийгаач 11 настай О, 14 настай Б нарын аав Б.Ойдовжамцтай ярилцсанаа хүргэе.

-Өдийгөөс бараг зургаан сарын өмнө таны хоёр хүү харамсалтайгаар амиа алдсан. Энэ хэрэг хэрхэн шийдэгдэж байна вэ?

-Хоёр сайхан хүүгээ нэг л өдөр хэзээ ч уулзахгүйгээр явуулчихсандаа одоо ч итгэж чадахгүй явна. Хэргийг цагдаагийн байгууллагаас шалгаж дуусаад, хавтаст хэргийг Баянзүрх дүүргийн прокурорт шилжүүлсэн байгаа.

-Тухайн үед хөвгүүдийн шөрмөс нь татсанаас болж амиа алдсан гэж зарим хүн ярьж байсан шүү дээ. Мөн сүүлд тантай холбогдоход шинжээчийн дүгнэлт гараагүй гэж байсан, одоо гарсан уу?

-Би хоёр хүүгийнхээ шүүх шинжилгээний хариутай танилцсан. Тэгэхэд шөрмөс нь татсан гэж огт бичээгүй байна лээ. Харин уушги нь бүхэлдээ усаар дүүрснээс болж амиа алдсан гэсэн байсан. Тэгэхээр шүүх шинжилгээний эцсийн дүгнэлт нь энэ мөн байх. Хэдэн сар МХЕГ-ын усны шинжилгээний хариу хүлээгдэж, хэргийн явц удаашралтай байсан. Харин саяхан дүгнэлт гарч, хариу нь бидний талд шийдэгдсэн. Хоёр хүү минь хорвоогийн мөнх бусыг харамсалтайгаар үзсэн ч хэрэг бидний талд шийдэгдэж байгаад сэтгэл арай тэнэгэр байна.

-“Ханталст” компанийнхантай та бүхнийг манай редакцын хамт олон уулзуулсан шүү дээ. Тухайн уулзалтаар ямар нэгэн шийдэлд хүрч чадсан уу?

-Хэрэг гарсны дараа нийслэлийн удирдлагууд бидэнтэй ирж уулзаад, хэдэн төгрөг өгч, эмгэнэл илэрхийлээд явсан. Мөн “Ханталст” компаниас гурван эмэгтэй ирээд, эмгэнэлийн бичиг, хоёр сая төгрөг өгсөн. Хоёр хүүхдийн минь амины хариуд дөрвөн сая төгрөг өгсөн гэсэн үг. Тэрнээс барилга барих гэж ухсан нүхэнд нь хөрсний ус хуримтлагдаж, үүнийгээ тойруулан хашлага, хаалт бариагүй, хариуцлагагүй “Ханталст” компанийн удирдлага бидэнтэй уулзалгүй таван сар орчим болсон. Харин өнгөрсөн аравдугаар сард та бүхний тусламжтайгаар “Ханталст” компанийн захирал Ш.Бат-Энхтэй албан өрөөнд нь уулзсан. Баахан бичиг баримт гаргаж ирж үзүүлсэн ч олигтой шийдэлд хүрээгүй, тэгээд дахиж уулзаагүй. Хуулийн байгууллага нь хуулийнхаа дагуу шийдээд өгнө байх гэж найдаж байгаа. Хэрэв тэр захирлын хэлээд байгаа шиг хашаа, хайс өмнө нь барьчихсан байсан бол миний хоёр хүү өнөөдөр амьд байх байлаа. Дахиж л ийм аймшигт хэрэг битгий гараасай гэж бодож байна. Амьдын там гэдэг чинь үр хүүхдээ алдах л байдаг юм байна.

-Эхнэрийн тань биеийн байдал ямар байна вэ. Хөл хорио тогтоочихсон учраас та бүхэн ажлаа хийхгүй байгаа юу?

-Хэдий мөнгө байлаа гээд хоёрын хоёр хүүгээ алдчихсан бидэнд ямар олиг байх вэ дээ. Ээжийнх нь зүрх байнга өвдөж, нялх хүүхэд минь хоёр ахыгаа нэхэж уйлаад хэцүүхэн л байна. Эхнэр минь өрхийн эмнэлгийн хяналтад байгаа. Бид хоёр хүүгээ амьд байхад Зайсангийн ойролцоо байранд жижүүр, үйлчлэгч хийж байсан юм. Харин хэрэг гарснаас хойш ажлаа хийгээгүй. Ажилдаа яваад ирэхэд үлдсэн хоёр хүүхэд минь байхгүй болчих юм шиг санагдаад түгшүүртэй байгаа учраас ажлаа хийж чадахгүй болсон. Одоо хөл хорио тогтоочихсон учраас гэртээ л байна даа.

-Тэгэхээр "Ханталст" компани амиа алдсан хүүхдүүдийн эцэг эхэд хоёр сая төгрөгөөс өөр мөнгөн тусламж олгоогүй юм байна гэж ойлгож болох уу. Та бусад хүүхдийн ар гэртэй холбоотой байгаа юу?

-Нийслэлээс өгсөн хэдэн төгрөгөөр бид хашаандаа байшин барьж байгаа. “Ханталст” компанийн удирдлагатай бид нэг л удаа арай гэж уулзсан.  Гэхдээ тэднээс юу ч аваагүй. Оршуулгын зардал, эмгэнэлийн бичиг, бэлэн дөрвөн сая төгрөг л өгсөн. Бид энэ хэрэг явдал үнэн мөнөөр шийдэгдээсэй л гэж хүсэж байна. Миний хоёр хүүтэй цуг амиа алдсан хоёр хүүгийнх хуучин хашаанаасаа нүүсэн. Нэг нь хуучин хашаатайгаа ойролцоо, өөр хашаанд нүүсэн гэсэн. Харин нөгөөх нь хаачсаныг мэдэхгүй. Том болсон хүүхдүүдээ алдсан хүмүүс хүүхэд нь эргээд хүрээд ирэх юм шиг санагдаад хэцүү байсан болохоор нүүсэн болов уу.

-Шүүх хурал товлогдоогүй байгаа юу?

-Үгүй. Хэрэг сайнаар шийдэгдэж байгаа учраас шүүх хурал удахгүй болох байх.

Хөвгүүдийн амиа алдсан газар. 2020.05.30.12:00 цаг. Үндэсний цэцэрлэгт хүрээлэн, "Ханталст" ХХК-ийн эзэмшлийн газарт байрлах тогтоол ус. Гэрэл зургийг Б.Намсрай