"Түгжрэлийг бууруулах богино хугацааны шийдэл нь нийтийн тээврийн үйлчилгээг сайжруулах юм байна" гэж Түгжрэлийг бууруулах үндэсний хороотой болсон даруйдаа сайд нь мэдэгдэж, 2023 оны төсөвт чамгүй хөрөнгө суулгасан. Ингэхдээ 2023 оны төсөвт зөвхөн нийтийн тээврийг шинэчлэхэд 420 тэрбум төгрөг төсвөөс гаргаж, нийтийн тээврийг нийтээр өөрчлөх зорилт тавьж байлаа.            

      Тодруулбал, энэ ондоо багтааж нийтийн тээврийн парк шинэчлэлийн хүрээнд 1225 автобус оруулж ирэхээр хөрөнгө мөнгийг нь шийдээд хуучин автобуснуудаа бүгдийг нь актанд гаргана гэх амлалт эрх баригчид өгөөд буй. Харин эхний ээлжинд 415 автобус оруулж ирсэн бөгөөд өнгөрсөн хавраас үйлчилгээнд хагас нь явж эхэлсэн. Үүний 189 автобусыг “Эрдэм транс” ХХК БНСУ-аас оруулж ирэхдээ улсаас санхүүжилтээ авсан гэдэг. Гэтэл мөнөөх нийтийн тээврийн парк шинэчлэлд зарцуулсан хөрөнгө нь нохойн замаар орно гэгч болж байгаа бололтой.

"ЭРДЭМ ТРАНС" КОМПАНИЙН УДИРДЛАГУУДЫН АЛБАН ӨРӨӨНД ЭРҮҮГИЙН ЦАГДААГИЙН АЛБАНААС  НЭГЖЛЭГ ХИЙЖЭЭ

       Өөрөөр хэлбэл, БНСУ-д үйлдвэрлэгдсэн “Хьюндай” маркийн 135 автобусандаа хуурамч бичиг баримт бүрдүүлж, арлын дугаар, оныг нь засварласан. Ингэхдээ “Шинэ автобус оруулж ирсэн” гэж улсын төсвөөс санхүүжилт авч, Авто тээврийн үндэсний төв болон Нийтийн тээврийн газарт бүртгүүлсэн байж болзошгүй хэргээр "Эрдэм транс" ХХК-ийн удирдлагууд шалгуулж эхэлсэн байна.

    Энэ сарын 12-ны өдөр Эрүүгийн цагдаагийн газраас тус компанийн захирал Я.Эрдэмбилэг, гүйцэтгэл захирал Д.Хатанбаатар нарын албан өрөөнд нэгжлэг хийсэн байна.

    Энэ талаар  Цагдаагийн ерөнхий газрын хэвлэл мэдээлэл олон нийттэй харилцах хэлтсийн мэргэжилтэн Б.Дэлгэрхангайгаас тодруулахад “Эрүүгийн цагдаагийн газраас “Эрдэм транс” ХХК-ийн удирдлагуудыг шалгаж эхэлсэн нь үнэн. Одоохондоо ямар үндэслэлээр шалгаж эхэлсэн талаар мэдээлэл өгөх боломжгүй” гэх тайлбар өгөөд буй.
 

    “Эрдэм транс” ХХК нь арав гаруй жил үйл ажиллагаа явуулж байгаа бөгөөд нийтийн тээвэрт 230 орчим автобусаар үйлчилгээ үзүүлдэг. Ажлын өдөрт 21 чиглэлд 167, амралтын өдрүүдэд 20 чиглэлд 116 гаралтаар зорчигч тээвэрлэдэг байна. Мөн уг компанийн охин компани Д.Хатанбаатарын нэр дээр "Эрдэм авто транс" ХХК гэх нэрээр Хэнтий аймгийн Хэрлэн суманд бүртгэлтэй. Тус аймагт нийтийн тээврийн үйл ажиллагаа явуулдаг байна.

Гэвч өнгөрсөн хугацаанд тус компанийн удирдлагууд хэд хэдэн хэрэгт холбогдож байсан гэх мэдээллүүд ч бий. 

     Тухайлбал,“Эрдэм транс” ХХК 2010 онд улсаас 30 автобус авсан ч өнөөдрийг хүртэл мөнгийг нь төлөөгүй аж.  Засгийн газраас  400 автобусыг төрийн болоод хувийн өмчийн компаниудад эргэн төлөгдөх нөхцөлөөр өгч байжээ. Ингэхдээ таван жилийн хугацаанд Монгол Улсыг хөгжүүлэх санд эргүүлж төлөхөөр гэрээ байгуулсан байна. Гэтэл хувийн хэвшлийн компаниуд эргэн төлөлтөө хийгээгүй байна. Үүний нэг нь “Эрдэм транс” ХХК юм. Нэг ёсондоо төрөөс авсан автобусаараа арав гаруй жил орлого олж байгаа ч төлбөрөө төлөөгүй байна гэсэн үг.

     Мөн 2019-2020 онд 120 гаруй автобусныхаа арлын дугаарыг сольж, үйлдвэрлэсэн оныг нь засварласан байж болзошгүй хэрэгт холбогдож байсан  ч хэрэг хэрхэн шийдэгдсэн нь тодорхойгүй байгаа талаар бид өмнө нь мэдээлж байсан билээ.