Авлигатай тэмцэх газрын Мөрдөн шалгах хэлтэс 2023 оны есдүгээр сарын 4-8-ны өдрүүдэд гэмт хэргийн шинжтэй 109 гомдол, мэдээллийг шалгажээ. Үүнээс 11 гомдол, мэдээлэлд хэрэг бүртгэлтийн хэрэг нээж, 18 гомдол, мэдээлэлд хэрэг бүртгэлтийн хэрэг нээхээс татгалзах, нэг гомдол мэдээллийг харьяаллын дагуу шилжүүлэх саналтайгаар прокурорт шилжүүлсэн бөгөөд одоогоор 79 гомдол, мэдээллийг хянан шалгаж байгаа аж.

Түүнчлэн эрүүгийн 861 хэрэгт мөрдөн байцаалтын ажиллагаа явуулснаас өнгөрсөн долоо хоногт дөрвөн хэргийг шүүхэд шилжүүлэх, 11 хэргийг хаах, дөрвөн хэргийг харьяаллын дагуу шилжүүлэх саналтай прокурорт хүргүүлж, хоёр хэргийг нэгтгэн шалгаж байна. Мөрдөн шалгах ажиллагаанд одоогоор 840 хэрэг шалгагдаж байна. Гэмт хэрэг гарахад нөлөөлсөн шалтгаан, нөхцөлийг арилгуулахаар хүргүүлсэн нэг мэдэгдэл, хууль хэрэгжүүлж ажиллах хоёр албан бичгийг холбогдох байгууллагад хүргүүлжээ.

Тодруулбал, Баянзүрх дүүргийн Газар зохион байгуулалтын албан тушаалтнаар ажиллаж байх сан С нь ажиллах хугацаандаа хахууль авсан хэрэгт холбогджээ. Түүнд холбогдох хэргийг шалгаж дуусаад, прокурорт хүргүүлжээ.