Энэ жил нийслэлийн хэмжээнд 47 сургууль гурван ээлжээр хичээллэж байгаа юм байна. Анги танхимын хүрэлцээ муутайгаас нийслэлийн ихэнх сургуулийн нэг ангид 50, 60 хүүхэд хичээллэдэг. Ширээн дээрээ шахцалдаж, гурваараа суух нь байтугай ширээ, сандалгүй хоосон танхимд өвдөг дээр нь дэвтэр номыг нь тавиулаад хичээллэж байгаа сургууль ч нийслэлд байна. 

         Бид нийслэлийн 53 дугаар бүрэн дунд сургуулийн зарим анги  “Сандал, ширээгүй хичлээллэж байна” гэх мэдээллийн мөрөөр бид тус сургууль дээр очиж нөхцөл байдлыг газар дээрээс нь сурвалжиллаа.

         Хичээлийн шинэ жил эхлээд удаагүй, сурагчийн шинэхэн дүрэмт хувцсаар ижилссэн хүүхдүүд нааш цааш гүйлдэнэ. Бид 16:00 цагийн үед тус сургууль дээр очиход ахлах ангийнхан тарчихсан, дунд бага ангийн бололтой хүүхдүүд сургуулийн гадна гүйлдэж байгаа харагдлаа.

   Биднийг очиход сандал, ширээгүй гэх зургадугаар ангийн сурагчид урт хөндлөн сандал дээр эгнэн суугаад хичээлээ хийж, багш нь хичээлээ тайлбарлан ярьж байгаа бололтой зогсож байв. 50 гаруй сурагчтай тус танхимд нэг ч сурагчийн  ширээ байхгүй, хүүхдүүд өвдөг дээрээ цүнхээ  тавиад хичээлээ бичиж байлаа. Мөн өглөөний ээлжийн 50 гаруй сурагчтай анги яг энэ маягаар хичээлээ хийдэг гэнэ.  Тэгэхээр 53 дугаар сургуулийн  100 гаруй сурагч, суух ширээ, сандалгүй өвдөг дээрээ дэвтэр, номоо дэлгээд хичээлээ хийж байгаа гэсэн үг.

      Хүүхдүүдээс хэзээнээс ширээ, сандалгүй хичээллэж байгаа талаар асуухад “Есдүгээр сарын 1-нд захирал “Удахгүй сандал, ширээ  ирнэ гэж хэлсэн. Манай анги 54 сурагчтай, ямартай ч хичээлээ таслахгүйн тулд ширээгүй ч байсан тонгойж суугаад хичээлээ хийж байна” гэсэн юм.

     Харин тус ангийн багш Г.Г “Энэ танхимд хичээллэж байсан анги өргөтгөлийн байр руу нүүхдээ ширээ, сандлаа авч явсан юм. Тийм болохоор бид урлаг заалны сандлуудыг оруулж ирээд, хичээлээ хийж байна.  Сургуулиас “Хуучин сандал, ширээгээ засаж янзалж өгнө” гэсэн. Удахгүй түүнийг нь засаж сэлбээд хүүхдүүдээ ширээтэй болгоно. Хуучин ширээнүүдийг засаад ширээтэй болох ч бүх хүүхдэд хүрэлцэхээргүй. Гурөв, дөрвөөрөө ч болов суугаад хичээлээ хийнэ дээ. Шинээр ширээ, сандал иртэл өөр арга байхгүй гэсэн,  Өөр тайлбар өгмөөргүй байна” гэлээ.

Биднийг ийн ярилцах зуур тус ангийн сурагчийн ээж хүүхдээ авахаар сургууль дээр нь ирсэн байв. Нэрээ нууцлахыг хүссэн түүнээс "Хүүхдүүд нь ширээгүй хичээллэж байгаа талаар мэдсэн үү" гэж асуухад “Мэдэхгүй, хичээл эхлэхэд л ийм байсан юм шиг байна лээ.  Хүүхдүүдэд удаан хугацаанд ингэж хичээл хийх хэцүү байх. Шинэ хичээлийн жил эхлэж байхад ямар ч бэлтгэлгүй байгаа нь харагдаж байна” гэв.
 

 НИЙСЛЭЛИЙН ЕРӨНХИЙ БОЛОВСРОЛЫН 53 ДУГААР СУРГУУЛИЙН ЗАХИРАЛ Л.АМАРСАНАА: Аравдугаар сарын 1 гэхэд шинэ ширээ сандал ирэх байх, тэр болтол аргална 
 

      Хүүхдүүдийг ширээ сандалгүй суулгаж байгаа талаар тус сургуулийн захирал Л.Амарсанаагаас тодрууллаа.  Тухайн сургууль 1300 гаруй хүүхдийн багтаамжтай ч одоогийн байдлаар  4400 орчим сурагч суралцаж байгаа аж. Улмаар 2021 онд шинэ өргөтгөлийн байр барьсан ч анги танхим хангалттай хүрэлцэхгүй, өөр сургуулийн байр түрээслэж, гурван хэсэг хувааж хичээллэж байгаа юм байна. Түүнчлэн тус сургуулийн 00 засвартай хүүхдүүд өргөтгөлийн байр руу орж, бие засдаг гэж байлаа.

-Танай сургуульд ширээ, сандалгүй хэдэн анги байгаа вэ?

               -Нэг хичээлийн танхим байгаа. Уг танхим дунд бүлгийн хоёр анги ээлжилж хичээллэдэг. Маргааш гэхэд сургуулийн нөөц боломжоо ашиглаж, хуучин ширээ, сандлаа засаж, хэрэглэнэ.  Нийслэлийн боловсролын газраас хичээл эхлэхээс өмнө 80 ширээ, 160 сандал өгсөн. Нийслэлээс Азийн хөгжлийн банкны тендер зарлагдаж, эзэн нь тодорсны дараа ширээ, сандал нэмж өгөх талаар ярьж байгаа.  Ойролцоогоор аравдугаар сарын 1 гэхэд ирэх байх.   

-Шинэ хичээлийн жил эхлэхээс өмнө бэлтгэл ажлаа хангалттай хангаагүй юм биш үү?

               -Бид шаардлагатай тоогоо өгсөн. Нийслэлийн хэмжээнд олон сургууль сандал, ширээгүй байгаа гэсэн.  Манай сургууль өгсөн бичгийнх нь дагуу өглөө эрт дугаарлаж байгаад л авчирсан нь 80 ширээ, 160 сандал юм.  Манай сургууль ямартай ч хуучин ширээ, сандлаа сэлбэж, засаад л явж байна. Шинэ ширээ сандал иртэл аргалахаас өөр арга байхгүй.

-Ширээ, сандлаас гадна танай сургуулийн засварын ажил бүрэн дуусаагүй, сурагчид ариун цэврийн өрөөгүй байгаа юм байна. Энэ ажил хэзээ дуусах вэ?

               -Манай сургууль дээр ариун цэврийн өрөөний төсөл хэрэгжиж байгаа. Тендерийн шалгаруулалтаас хамаарч оройтож эхэлсэн. Ерөнхийдөө засварын ажил дуусах дөхөж байгаа. Манай сургууль 68 дугаар сургуультай хамтран урд байр түрээсэлж, зургаан анги хичээллүүлдэг. Ирэх жил сурагчдын тоо тооцоолсон хэмжээнээс өсөх магадлалтай учир эртнээс хүсэлт илгээе гэж бодож байгаа.  Үнэндээ түрээсийн байр олдохгүй. Хэрэв өргөтгөл барихаар бол сургуулийн голд байрлах спорт талбай болон автомашины зогсоолын талбайг танаж барина" гэх тайлбар өглөө. 

       БОЛОВСРОЛЫН ЕРӨНХИЙ ГАЗРЫН ДАРГА Т.НЯМ-ОЧИР: Боловсролын ерөнхий газраас хэрэгцээтэй ширээ, сандлыг нь хүлээлгэж өгсөн

         Энэ талаар Боловсролын ерөнхий газрын дарга Т.Ням-Очироос тодруулахад "Нийслэлийн боловсролын газар наймдугаар сарын 25-нд Боловсролын ерөнхий газарт ширээ, сандлын захиалга өгсөн.  Мөн захиалгынхаа дагуу хэрэгцээтэй ширээ, сандлаа хүлээж авсан.  Тиймээс хуваарилалт, нөөцийн талаар бид мэдэхгүй байна" гэлээ.

      Ийн хаана нь хариуцлага алдсан нь мэдэгдэхгүй хичээлийн шинэ жил дөнгөж эхэлж байхад ямар ч бэлтгэл хангагдаагүй, сурагчдын суралцах эрх зөрчигдсөөр байна. Хүүхдүүдийн  аюулгүй орчинд сурах орчинг хангаж чадаагүй 53 дугаар сургуулийн удирдлагууддаа хариуцлага тооцъё, Л.Энх-Амгалан сайд аа.