Баянзүрх дүүргийн 21, 27 дугаар хороо Дарь-Эх орчимд үер бууж, таван хүн амь эрсдээд байна. Тодруулбал, нийслэлд орсон түр зуурын борооны улмаас Дарь-Эх орчим үерт автаж, арван сартай нярайтайгаа автомашинд зорчиж явсан гэр бүлийн хүмүүс үерт урсаж, хүүхэд нь эндсэн харамсалтай нь хэрэг гарсан. Талийгаач хүүхдийн аав, ээжийн биеийн байдал хүнд Гэмтэл согог судлалын үндэсний төвд хэвтэн эмчлүүлж байна. Хүүхдийн цогцсыг машин урссан газраас нэг км орчмын зайнаас буюу гүүрэн доороос олж, шүүх шинжилгээний хүрээлэнд хүлээлгэн өгсөн байдаг.Хүүхдийн аав, ээж ухаан орсон даруйдаа эмнэлгийн ажилтнуудад хүүхэдтэй явсан гэдгээ мэдэгдэж, эмч нар цагдаагийн байгууллагад дуудлага, мэдээлэл өгсөн. Үүний дагуу эрэн хайх, аврах ажиллагааг эхлүүлсэн ч харамсалтай нь хүүхэд амьсгал хураасан байдалтай олдсон юм. Үерийн усанд эндсэн арван сартай нярайг өнөөдөр хөдөөлүүллээ.

            Эх сурвалжаас авсан мэдээллээр “Талийгаач хүүгийн аав, ээж нь эмнэлгээс хэзээ гарах нь тодорхойгүй байна. Биеийн байдал нь сайжирч өгөхгүй байгаа. Оршуулах ёслол болсон. Залуу хосууд хүүтэйгээ ч салах ёслол гүйцэтгэж чадсангүй. Маш харамсалтай байна” гэлээ.

Мөн энэ талаар ЦЕГ-ын Хэвлэл мэдээллийн төвөөс тодруулахад “Энэ хэргийг шалгаж байгаа. Гэмт хэргийн шинжтэй биш, байгалийн давагдашгүй хүчин зүйлээс болж ийм хэрэг гарсан шүү дээ” гэлээ.

Талийгаач хүүгийн цогцост хийсэн шүүх шинжилгээний дүгнэлт 21 хоногийн дараа гарна.