Дорнод аймгийн Халхгол сумын нутагт үйл ажиллагаа явуулдаг “Петрочайна Дачин тамсаг”-ийн монгол ажилтан ажлын байрандаа нас баржээ. Тухайлбал, өчигдөр буюу энэ сарын 23-ны өдрийн 07:40 цагт “Петрочайна Дачин тамсаг” ХХК-ийн туслан гүйцэтгэгч “Ви Эс Эм” ХХК-ийн ажилтан О газрын тос сорж авдаг донки гэж төхөөрөмжний өрөмд хавчуулагдаж, нас барсан талаар цагдаагийн байгууллагаас мэдээлсэн. Бид ажлын байрандаа амиа алдсан талийгаач О-ын эгч Ч.Энхмаатай холбогдож, цөөн асуултад хариулт авлаа.

-ДҮҮГЭЭ ГАДНЫН НӨЛӨӨТЭЙ НАС БАРСАН ГЭЖ БОДОЖ БАЙГАА. ТАЛИЙГААЧ ЯАРАН ГЭНЭ АЛДАХ ХҮН БИШ. АЖЛЫНХАН НЬ Л ОСОЛ ШИГ ХАРАГДУУЛЖ БАЙГАА ГЭЖ ХАРДАЖ БАЙНА-

-Талийгаач О-г нас барсан тухай мэдээг танд хэзээ дуулгасан бэ. Талийгаач ураны өрмийн ангид хэр удаан ажиллаж байсан юм бэ?

                    -Дүү минь “Петрочайна Дачин тамсаг”-т удаан ажиллаагүй. Наадмын өмнө хэсэг ажиллаж байгаад амралтаа аваад, эргэж ажилдаа ороод тав хоноод л амиа алдчихлаа. Намайг хөдөө байхад 22-ны орой “Дүү чинь ажил дээрээсээ алга болчихлоо” гэж надад нэг хүн хэлсэн. Тэгээд ажлынх нь менежертэй холбогдоод асуутал “Танай дүү өдрийн 15:00 цагийн үед ажил дээрээ алга болчихлоо. Компаниас бүх хүн хүч, машин техникээ дайчилж, ойрын хоёр км радиуст хайж байна” гэсэн. Шөнөжин “Хайж байна”, “Олдохгүй байна”, “Төөрчихсөн юм биш үү” гээд менежер нь надад хэлж аргацааж байтал маргааш(долдугаар сарын 23-ны) өглөө нь 07:00 цагийн үед донки гэдэг төхөөрөмжийн өрөм дороос цогцос нь хэдэн хэсэг тасарсан байдалтай олдсон.

-Сураггүй болчихсон байхад нь цагдаа, онцгойгийн байгууллагад мэдэгдэлгүй. Компаниас л хайж байсан юм уу. Хамт ажилладаг хүмүүс нь ямар нэг юм хэлсэн үү?

                    -Талийгаач дүүг маань сураггүй болсныг надад хэлэхээс өмнө дүүгийн эхнэр хамт ажилладаг нэг хүн рүү залгаж асуусан байна лээ. Өөдөөс нь “О нэг хятад ажилчинтай хамт алга болчихоод, бид нар эрж, хайгаад бөөн бужигнаан болж байна” гэсэн юм билээ. Би энэ талаар дүүгийнхээ цогцос олдох хүртэл дуулаагүй байж байгаад дүүгийнхээ эхнэрээс сонссон. Талийгаачийн эхнэр “Манай хүн өнгөрчихсөн байна. Гэрийнх нь хажууханд өрмөн дороос цогцсыг нь олжээ” гээд орилоод ярихад нь л мэдсэн.  Сураггүй болчихоод, эрэл сурал болж байхад нь нөгөө компанийн менежер хүүхэд надад “Танай дүү чинь төөрчихсөн юм биш үү” гэж хэлсэн. Ажиллаж байсан газар тийм төөрөхөөр газар биш. Тэглээ ч талийгаач маань нутагтаа төөрнө гэж байхгүй, багаасаа хөдөө, малын захад өссөн юм, хөөрхий.

-Талийгаачийн цогцос олдсон ажлынх байран дээр очиж харсан уу?

                    -Дүүгийн маань ажилладаг байсан газар төв замаасаа 20 орчим км-ын зайд байдаг юм билээ. Хятад ажилчдын хэдэн вагон, монгол ажилчдын гурван гэртэй. Хөдөө болохоор гар утас сүлжээгүй үед ажилчид утсаар ярихаар донки гэх төхөөрөмжийн хажуу талын чингэлэг дээр гарч, сүлжээ оруулаад, утсаар ярьдаг гэсэн. Харин талийгаачийн цогцос олдсон донки төхөөрөмжийн өрөм золсолтгүй улайраад л эргэлдэж байдаг юм  билээ. Дотор нь орох бүү хэл, ойртсон хүн л орвол “Тас татуулж, хэрчүүлэх юм байна” гэдгийг ойлгож байхад дүү минь болгоомж алдаж, өрөм рүү орох хүн биш.

-Хамт сураггүй болсон хятад ажилчин нь яасан юм бэ. Компанийнх зүгээс танай гэр бүлтэй холбогдсон уу?

                    -Дүүгээ бүрлээч болсныг сонсоод ажилладаг байсан газар нь очих хүртлээ гурван цаг гаруй хугацаанд нөгөө менежер хүүхэн рүү залгасан. Өнгөрсөн шөнө нь элдэв юм хэлж, аргацааж байсан ч арга ядаад залгахад минь утсаа аваагүй. Дүүгийнхээ эхнэртэй талийгаачийн ажил дээр очоод “Хятадтай хамт алга болсон” гэж хэлсэн найзаас нь “Ямар хятадтай цуг алга болсон юм бэ” гэж асуутал “Ямар хятад. О ганцаараа алга болсон” гэж мэлзсэн. Тэндэхийн монгол ажилчид их хэцүү суудаг юм билээ. Биднийг очиход ямар нэг юм хэлэх гээд байгаа ч нэг юмнаас айгаад, хэлж чадахгүй байсан.

                    Харин хүнээс сонсох нь ээ дүүтэй маань хамт сураггүй болсон хятад ажилчин талийгаачийн цогцос олддог өглөө гарч ирсэн байна лээ. Тэр хятад талийгаачийн цогцос олдсон газраас ажилчдын байрладаг кэмп рүү алхаж ирээд, монгол тогооч өвгөнийг дагуулж яваад дүүгийн маань цогцсыг олж, цагдаад дуудлага өгсөн гэсэн. Бид гомдолтой байгаа. Дүүгээ ямар нэгэн гаднын нөлөөтэй нас барсан гэж бодож байгаа. Гаднын нөлөөтэй нас барсан дүүг маань хүмүүст хэлэлгүй, намайг “Дүү чинь алга болчихлоо” гэж аргацааж байгаад, үүрээр цогцсыг нь тэнд аваачиж тавьж, осол шиг харагдуулж байгаа гэж хардаж байна. Ямартай ч цагдаад “Гомдолтой байгаа” гэдгээ хэлсэн. Удахгүй шүүх шинжилгээнд оруулж, үнэн мөнийг нь гаргаад ирэх байлгүй дээ. Дүү минь яаран болгоомж алдах хүн биш. Гаднын л нөлөөтэй байх.

-Талийгаач ам бүл хэдүүлээ байсан юм бэ. Эхнэртэй нь холбоотой байгаа юу?

                    -Дүү маань 48 настай, эхнэр, хоёр хүүхдийн хамт амьдардаг байлаа. Нэг нь оюутан, нөгөө нь сургуулийн сурагч. Гэр бүлээрээ хэдэн үхэр, үнээ маллаж амьдардаг. “Намар болохоос өрмийн ангид гарч ажиллаад, хэдэн үхэртээ өвсний мөнгө цуглуулна” гэж яваад л амиа алдчихна гэж бид яаж санах билээ дээ. Хөөрхий, эхнэр нь хоёр хүүхдэдээ хэлж чадахгүй хэчнээн зовж байгааг бодохоор л элэг эмтэрч байна.