"Босоо хөх монгол” ТББ-ын удирдах зөвлөлийн гишүүн асан П.Шижээравдан  энэ оны нэгдүгээр сард “Нойтон мод бэлтгэж байсан хүмүүст жавтий хүртээв” гэсэн тайлбартай бичлэгийг өөрийнхөө цахим хуудаст байршуулсан. Үүний дараахан 52 настай, эрэгтэй Г амиа егүүтгэсэн байж болзошгүйбайдалтай олдсон билээ. Тодруулбал, талийгаач Г-ийн Сэлэнгэ аймгийн Мандал сумын нутаг дахь Билүүт ууланд түлээний мод бэлтгэж байхдаа бусдад зодуулж буй бичлэг цахим орчинд түгээсэн юм. Тэрээр үүнээс болж сэтгэл санааны хямралд орж, улмаар амиа егүүтгэсэн байж болзошгүй байгаа. Тэгвэл П.Шинжээравдан, А.Дарьсүрэн нарт холбогдох шүүх хурал болжээ. Шүүхээс тэднийг гэм буруутайд тооцож, ял оноосон байна.

Энэ талаар талийгаач Г-ийн эхнэр Н.Дашнямаас тодрууллаа. Тэрбээр “Шүүх хурал болж, шүүхээс нөхрийг минь нойтон модоор зодсон А.Дарьсүрэнд хоёр жилийн ял оноолоо. Мөн түүнд нэг сая төгрөгийн торгууль ногдуулсан. Харин нөхрийн минь зодуулж буй бичлэгийг цахим орчинд нийтэлсэн П.Шинжээравданд ял оноогоогүй бөгөөд 600 мянган төгрөгөөр торгох шийдвэр гарсан. Хэрэг нэгэнт ингэж шийдэгдсэн болохоор надад өөр хэлэх зүйл алга. Үүнээс өөр мэдээлэл өгөх боломжгүй” хэмээлээ.

Талийгаач Г-ийн эхнэр Н.Дашням өмнө нь манай сэтгүүлчид өгсөн ярилцлагадаа  “Нөхөр бид хоёр ханилаад 32 жил болж байсан. Оюутан ахуй наснаасаа  үерхэж, гэр бүл болсон. Нөхөр маань Төв аймгийн гаралтай. 1995 оноос хойш бид Сэлэнгэ аймгийн Мандал суманд амьдарч байгаа. Манай хүн газар тариалангийн салбарт насаараа ажилласан. Нөхөр гэлтгүй манайх удмаараа энэ салбарт ажилладаг, хийсэн, бүтээсэн зүйл ихтэй улс. Бид хоёр хүүхэдтэй, ач, зээ нартайгаа хамт амьдардаг байлаа. Хэрэг гарснаас хойш бидний сэтгэл санаа хямарч, хэцүү байна. Манай хүн зан ааш сайтай, нутаг усандаа хүндтэй нэгэн. Олонд дандаа л тусалж явдаг. Тэгтлээ тартагтаа тулчихсан, хулгай зэлгий хийхээр хүн байгаагүй юм шүү. Нөхөр маань тэр бичлэгийг өөрөө үзээгүй. Харин ойр дотныхон болон нутгийн таньж, мэддэг хүмүүс бичлэгийн талаар хэлсэн. Бараг амтай болгон л нөхрийг минь модны хулгайч мэт ярьж байлаа. Үүнээс болж сэтгэл санааны гүн хямралд орсон нь үнэн. Олонд тустай, сайхан нэр хүндтэй, мөрөөрөө амьдарч байсан хүнийг чинь хүний нүүр харах аргагүй болтол байдалд оруулахаар яах ч билээ дээ. Үүнээс болж амиа хорлосон байж болзошгүй. Гудамжаар ч явж чадахгүй болтлоо хямарсан. Мөн манай зээ хүү тэр бичлэгийг үзэж, өвөөгөө хүнд зодуулсан гэдгийг хүртэл мэдсэн. Нялх хүүхдүүд маань өвөөгөө нэхээд уйлаад үнэхээр хэцүү байна. Үгээр хэлж болохгүй зовлон гэж байдаг юм байна. Өглөө гэрээсээ гараад л эргэж ирээгүй. Бид ирэхгүй болохоор нь ах, дүү, хамаатан саднаараа нийлж хайгаад цогцсыг нь олсон. Яаж амиа алдсаныг нь хэлэх боломжгүй байна. Хэрэг үнэн зөвөөр шийдэгдэх байх гээд л тэвчээртэй хүлээж байгаа” хэмээн ярьж байсан юм.